ਚੰਡੀਗੜ੍ਹ : ਸ਼ਹਿਰ ਦੇ ਜਿਨ੍ਹਾਂ ਸੈਕਟਰਾਂ ’ਚ ਪਾਈਪਡ ਨੈਚੁਰਲ ਗੈਸ (ਪੀ. ਐੱਨ. ਜੀ.) ਦੀ ਸਹੂਲਤ ਪੂਰੀ ਤਰ੍ਹਾਂ ਉਪਲੱਬਧ ਹੋ ਚੁੱਕੀ ਹੈ, ਉੱਥੇ ਆਉਣ ਵਾਲੇ ਤਿੰਨ ਮਹੀਨਿਆਂ ਬਾਅਦ ਰਸੋਈ ਗੈਸ (ਐੱਲ. ਪੀ. ਜੀ.) ਸਿਲੰਡਰਾਂ ਦੀ ਸਪਲਾਈ ਬੰਦ ਕਰ ਦਿੱਤੀ ਜਾਵੇਗੀ। ਕੇਂਦਰ ਸਰਕਾਰ ਵੱਲੋਂ ਜਾਰੀ ‘ਨੈਚੁਰਲ ਗੈਸ ਐਂਡ ਪੈਟਰੋਲੀਅਮ ਪ੍ਰੋਡਕਟਸ ਡਿਸਟ੍ਰੀਬਿਊਸ਼ਨ ਆਰਡਰ-2026’ ਤਹਿਤ ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਸ਼ਹਿਰ ਵਾਸੀਆਂ ਨੂੰ ਐੱਲ. ਪੀ. ਜੀ. ਛੱਡ ਕੇ ਪੀ. ਐੱਨ. ਜੀ. ਅਪਨਾਉਣ ਦੀ ਐਡਵਾਈਜ਼ਰੀ ਜਾਰੀ ਕੀਤੀ ਹੈ ਤਾਂ ਜੋ ਭਵਿੱਖ ’ਚ ਰਸੋਈ ਗੈਸ ਦੀ ਸਪਲਾਈ ’ਚ ਕੋਈ ਦਿੱਕਤ ਨਾ ਆਵੇ। ਪ੍ਰਸ਼ਾਸਨ ਵੱਲੋਂ ਸ਼ਹਿਰ ’ਚ ਪੀ. ਐੱਨ. ਜੀ. ਨੈੱਟਵਰਕ ਦਾ ਤੇਜ਼ੀ ਨਾਲ ਵਿਸਥਾਰ ਕੀਤਾ ਜਾ ਰਿਹਾ ਹੈ। ਮੌਜੂਦਾ ਸਮੇਂ ਸੈਕਟਰ 32 ਤੋਂ 38, 40, 42 ਤੋਂ 44, 46 ਤੇ 48 ਤੋਂ 51 ’ਚ ਪੀ. ਐੱਨ. ਜੀ. ਪੂਰੀ ਤਰ੍ਹਾਂ ਉਪਲੱਬਧ ਹੈ।
ਇਸ ਤੋਂ ਇਲਾਵਾ ਸੈਕਟਰ 10, 11, 17, 22, 26, 28, 30, 41, 47, ਮਨੀਮਾਜਰਾ ਤੇ ਇੰਡਸਟ੍ਰੀਅਲ ਏਰੀਆ ਫੇਜ਼-1 ਤੇ 2 ’ਚ ਇਹ ਸਹੂਲਤ ਅੰਸ਼ਕ ਤੌਰ ’ਤੇ ਮਿਲ ਰਹੀ ਹੈ। ਪ੍ਰਸ਼ਾਸਨ ਨੇ ਪੂਰੀ ਤਰ੍ਹਾਂ ਕਵਰ ਹੋ ਚੁੱਕੇ ਸੈਕਟਰਾਂ ਦੇ ਵਸਨੀਕਾਂ ਨੂੰ ਜਲਦ ਤੋਂ ਜਲਦ ਪੀ. ਐੱਨ. ਜੀ. ਕੁਨੈਕਸ਼ਨ ਲੈਣ ਲਈ ਕਿਹਾ ਹੈ ਤੇ ਅੰਸ਼ਕ ਤੌਰ ’ਤੇ ਕਵਰ ਵਾਲੇ ਇਲਾਕਿਆਂ ਦੇ ਲੋਕ ਕੁਨੈਕਸ਼ਨ ਦੀ ਸੰਭਾਵਨਾ ਜਾਣਨ ਲਈ ਸਰਵਿਸ ਪ੍ਰੋਵਾਈਡਰ ਨਾਲ ਸੰਪਰਕ ਕਰ ਸਕਦੇ ਹਨ। ਕੇਂਦਰ ਸਰਕਾਰ ਦੇ ਨਵੇਂ ਨਿਯਮਾਂ ਮੁਤਾਬਕ ਜਿੱਥੇ ਪੀ. ਐੱਨ. ਜੀ. ਦਾ ਢਾਂਚਾ ਪੂਰੀ ਤਰ੍ਹਾਂ ਕੰਮ ਕਰਨਾ ਸ਼ੁਰੂ ਕਰ ਦਿੰਦਾ ਹੈ, ਉੱਥੇ ਨੋਟੀਫਿਕੇਸ਼ਨ ਜਾਰੀ ਹੋਣ ਦੇ ਤਿੰਨ ਮਹੀਨਿਆਂ ਬਾਅਦ ਘਰੇਲੂ ਵਰਤੋਂ ਵਾਲੀ ਐੱਲ. ਪੀ. ਜੀ. ਦੀ ਸਪਲਾਈ ਰੋਕਣੀ ਲਾਜ਼ਮੀ ਹੈ। ਪੀ. ਐੱਨ. ਜੀ. ਨੂੰ ਐੱਲ. ਪੀ. ਜੀ. ਦੇ ਮੁਕਾਬਲੇ ਵਧੇਰੇ ਸੁਰੱਖਿਅਤ ਤੇ ਸੁਵਿਧਾਜਨਕ ਦੱਸਦਿਆਂ ਪ੍ਰਸ਼ਾਸਨ ਨੇ ਸਪੱਸ਼ਟ ਕੀਤਾ ਹੈ ਕਿ ਇਸ ਨਾਲ ਸਿਲੰਡਰ ਬੁੱਕ ਕਰਨ ਤੇ ਭਰਵਾਉਣ ਦਾ ਝੰਜਟ ਖ਼ਤਮ ਹੋ ਜਾਂਦਾ ਹੈ।
ਪੀ. ਐੱਨ. ਜੀ. ਹਵਾ ਤੋਂ ਹਲਕੀ ਹੋਣ ਕਾਰਨ ਲੀਕ ਹੋਣ ’ਤੇ ਜਲਦੀ ਫੈਲ ਜਾਂਦੀ ਹੈ ਅਤੇ ਇਸ ਨਾਲ ਅੱਗ ਲੱਗਣ ਦਾ ਖ਼ਤਰਾ ਘੱਟਦਾ ਹੈ। ਇਹ ਘੱਟ ਪ੍ਰੈਸ਼ਰ ’ਤੇ ਕੰਮ ਕਰਦੀ ਹੈ ਤੇ ਇਸ ਦੀ ਬਿਲਿੰਗ ‘ਪੇ-ਐਜ਼-ਯੂ-ਯੂਜ਼’ (ਜਿੰਨੀ ਵਰਤੋਂ, ਓਨਾ ਬਿੱਲ) ਆਧਾਰਿਤ ਹੋਣ ਕਰਕੇ ਇਹ ਆਰਥਿਕ ਪੱਖੋਂ ਵੀ ਫ਼ਾਇਦੇਮੰਦ ਹੈ। ਭਾਰੀ ਸਿਲੰਡਰ ਚੁੱਕਣ ਦੀ ਲੋੜ ਨਾ ਹੋਣ ਕਾਰਨ ਇਹ ਬਜ਼ੁਰਗਾਂ ਤੇ ਅਪਾਰਟਮੈਂਟਾਂ ’ਚ ਰਹਿਣ ਵਾਲੇ ਲੋਕਾਂ ਲਈ ਬਹੁਤ ਲਾਹੇਵੰਦ ਹੈ। ਨਵੇਂ ਪੀ. ਐੱਨ. ਜੀ. ਕੁਨੈਕਸ਼ਨ ਜਾਂ ਇਸ ਸਬੰਧੀ ਕਿਸੇ ਵੀ ਤਰ੍ਹਾਂ ਦੀ ਜਾਣਕਾਰੀ ਤੇ ਸਹਾਇਤਾ ਲਈ ਸ਼ਹਿਰ ਵਾਸੀ ਇੰਡੀਅਨ ਆਇਲ ਕਾਰਪੋਰੇਸ਼ਨ ਲਿਮਟਿਡ ਦੇ ਜੁਆਇੰਟ ਵੈਂਚਰ ਪਾਰਟਨਰ ਦੇ ਟੋਲ-ਫ੍ਰੀ ਕਸਟਮਰ ਕੇਅਰ ਨੰਬਰ 1800-233-55666 ’ਤੇ ਸੰਪਰਕ ਕਰ ਸਕਦੇ ਹਨ। ਪ੍ਰਸ਼ਾਸਨ ਨੇ ਸ਼ਹਿਰ ’ਚ ਇਕ ਸੁਰੱਖਿਅਤ, ਕੁਸ਼ਲ ਤੇ ਵਾਤਾਵਰਣ-ਪੱਖੀ ਊਰਜਾ ਪ੍ਰਣਾਲੀ ਨੂੰ ਯਕੀਨੀ ਬਣਾਉਣ ਲਈ ਸਾਰੇ ਵਸਨੀਕਾਂ ਤੋਂ ਸਹਿਯੋਗ ਦੀ ਮੰਗ ਕੀਤੀ ਹੈ।