ਚੀਨ ਦੀ ਅਰਥਵਿਵਸਥਾ 2025 ’ਚ ਮਜ਼ਬੂਤ ਬਰਾਮਦ ਦੇ ਦਮ ’ਤੇ 5 ਫੀਸਦੀ ਦੀ ਸਾਲਾਨਾ ਦਰ ਨਾਲ ਵਧੀ। ਸਰਕਾਰ ਨੇ ਦੱਸਿਆ ਕਿ ਸਾਲ ਦੀ ਆਖਰੀ ਤਿਮਾਹੀ ’ਚ ਹਾਲਾਂਕਿ ਵਿਕਾਸ ਦਰ ਸੁਸਤ ਹੋ ਕੇ 4.5 ਫੀਸਦੀ ਰਹਿ ਗਈ। ਕੋਵਿਡ-19 ਗਲੋਬਲ ਮਹਾਮਾਰੀ ਦੌਰਾਨ 2022 ਦੇ ਅੰਤ ਤੋਂ ਬਾਅਦ ਇਹ ਸਭ ਤੋਂ ਸੁਸਤ ਤਿਮਾਹੀ ਵਿਕਾਸ ਸੀ।
ਦੁਨੀਆ ਦੀ ਦੂਜੀ ਸਭ ਤੋਂ ਵੱਡੀ ਅਰਥਵਿਵਸਥਾ ਪਿਛਲੀ ਤਿਮਾਹੀ ’ਚ 4.8 ਫੀਸਦੀ ਦੀ ਸਾਲਾਨਾ ਦਰ ਨਾਲ ਵਧੀ ਸੀ। ਚੀਨ ਦੇ ਨੇਤਾ ਜਾਇਦਾਦ ਬਾਜ਼ਾਰ ’ਚ ਆਈ ਮੰਦੀ ਅਤੇ ਗਲੋਬਲ ਮਹਾਮਾਰੀ ਕਾਰਨ ਅਰਥਵਿਵਸਥਾ ’ਚ ਆਏ ਵਿਘਨਾਂ ਤੋਂ ਬਾਅਦ ਅਰਥਵਿਵਸਥਾ ਨੂੰ ਹੋਰ ਰਫਤਾਰ ਦੇਣ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਮਜ਼ਬੂਤ ਬਰਾਮਦ ਨੇ ਕਮਜ਼ੋਰ ਖਪਤਕਾਰ ਖਰਚ ਅਤੇ ਵਪਾਰਕ ਨਿਵੇਸ਼ ਦੀ ਪੂਰਤੀ ਕਰਨ ’ਚ ਮਦਦ ਕੀਤੀ, ਜਿਸ ਨਾਲ 1200 ਅਰਬ ਅਮਰੀਕੀ ਡਾਲਰ ਦਾ ਰਿਕਾਰਡ ਵਪਾਰਕ ਸਰਪਲੱਸ ਪ੍ਰਾਪਤ ਹੋਇਆ। ਉਮੀਦ ਮੁਤਾਬਕ ਪਿਛਲੇ ਸਾਲ ਦਾ ਸਾਲਾਨਾ ਵਿਕਾਸ ਸਰਕਾਰ ਦੇ ‘ਲੱਗਭਗ 5 ਫੀਸਦੀ’ ਦੇ ਅਧਿਕਾਰਕ ਟੀਚੇ ਦੇ ਅਨੁਕੂਲ ਰਿਹਾ।