ਵਰਲਡ ਗੋਲਡ ਕੌਂਸਲ ਦੀ ਤਾਜ਼ਾ ਰਿਪੋਰਟ ਅਨੁਸਾਰ ਅਕਤੂਬਰ ਮਹੀਨੇ ਦੌਰਾਨ ਦੁਨੀਆ ਭਰ ਦੇ ਕੇਂਦਰੀ ਬੈਂਕਾਂ ਨੇ 53 ਟਨ ਸੋਨੇ ਦੀ ਖਰੀਦ ਕੀਤੀ ਹੈ। ਰਿਪੋਰਟ ਮੁਤਾਬਕ ਅਕਤੂਬਰ ਤੱਕ ਕੁਲ ਰਿਪੋਰਟਿਡ ਨੈੱਟ ਖਰੀਦ 2025 ’ਚ 254 ਟਨ ਰਹੀ ਹੈ, ਜੋ ਪਿਛਲੇ 3 ਸਾਲਾਂ ਦੀ ਤੁਲਨਾ ’ਚ ਸੁਸਤ ਹੈ। 2025 ’ਚ ਪੋਲੈਂਡ ਨੇ 83 ਟਨ, ਜਦੋਂਕਿ ਕਜ਼ਾਖਿਸਤਾਨ ਨੇ 41 ਟਨ ਸੋਨਾ ਖਰੀਦਿਆ ਹੈ। ਪੋਲੈਂਡ ਦਾ ਕੇਂਦਰੀ ਬੈਂਕ ਕੁਝ ਮਹੀਨਿਆਂ ਤੱਕ ਸ਼ਾਂਤ ਰਹਿਣ ਤੋਂ ਬਾਅਦ ਅਕਤੂਬਰ ’ਚ ਦੁਬਾਰਾ ਬਾਜ਼ਾਰ ’ਚ ਪਰਤ ਆਇਆ ਹੈ।
ਇਸ ਤੋਂ ਪਹਿਲਾਂ ਪੋਲੈਂਡ ਨੇ ਆਖਰੀ ਵਾਰ ਮਈ ’ਚ ਕੇਂਦਰੀ ਬੈਂਕ ਜ਼ਰੀਏ ਸੋਨਾ ਖਰੀਦਿਆ ਸੀ। ਪੋਲੈਂਡ ਨੇ ਅਕਤੂਬਰ ਮਹੀਨੇ ਦੌਰਾਨ 16 ਟਨ ਸੋਨਾ ਖਰੀਦਿਆ ਹੈ ਅਤੇ ਹੁਣ ਉਸ ਕੋਲ 531 ਟਨ ਸੋਨਾ ਹੈ, ਜੋ ਉਸ ਦੇ ਕੋ-ਰਿਜ਼ਰਵ ਦਾ 26 ਫੀਸਦੀ ਹੈ।
ਵਰਲਡ ਗੋਲਡ ਕੌਂਸਲ ਦੇ ਸੀਨੀਅਰ ਐਨਾਲਿਸਟ ਕ੍ਰਿਸ਼ਣਨ ਗੋਪਾਲ ਨੇ ਦੱਸਿਆ ਕਿ ਅਕਤੂਬਰ ਮਹੀਨੇ ਦੌਰਾਨ ਬ੍ਰਾਜ਼ੀਲ ਨੇ ਵੀ 16 ਟਨ ਸੋਨਾ ਖਰੀਦਿਆ ਹੈ ਅਤੇ ਹੁਣ ਉਸ ਕੋਲ 161 ਟਨ ਸੋਨਾ ਹੋ ਗਿਆ ਹੈ, ਜੋ ਉਸ ਦੇ ਕੁੱਲ ਰਿਜ਼ਰਵ ਦਾ 6 ਫੀਸਦੀ ਹੈ, ਜਦੋਂਕਿ ਉਜ਼ਬੇਕਿਸਤਾਨ ਨੇ 9 ਟਨ, ਇੰਡੋਨੇਸ਼ੀਆ ਨੇ 4 ਟਨ, ਤੁਰਕੀ ਨੇ 3 ਟਨ, ਚੈੱਕ ਗਣਰਾਜ ਨੇ 2 ਟਨ, ਕਿਰਗਿਸਤਾਨ ਨੇ 2 ਟਨ, ਘਾਨਾ, ਚੀਨ ਅਤੇ ਫਿਲਪੀਨਸ ਨੇ 1-1 ਟਨ ਤੋਂ ਵੱਧ ਸੋਨਾ ਖਰੀਦਿਆ ਹੈ।
ਅਕਤੂਬਰ ’ਚ ਇਕਮਾਤਰ ਵਿਕ੍ਰੇਤਾ ਰੂਸ ਰਿਹਾ ਹੈ, ਜਿਸ ਨੇ ਅਕਤੂਬਰ ’ਚ 3 ਟਨ ਸੋਨਾ ਵੇਚਿਆ ਹੈ ਅਤੇ ਹੁਣ ਰੂਸ ਦਾ ਗੋਲਡ ਰਿਜ਼ਰਵ 2,327 ਟਨ ਰਹਿ ਗਿਆ ਹੈ। ਰਿਪੋਰਟਸ ਅਨੁਸਾਰ ਰੂਸ ਆਪਣੇ ਵਿਦੇਸ਼ੀ ਭੁਗਤਾਨ ਅਤੇ ਘਰੇਲੂ ਮੰਗ ਨੂੰ ਪੂਰਾ ਕਰਨ ਲਈ ਸੋਨਾ ਵੇਚ ਰਿਹਾ ਹੈ।