ਟਾਟਾ ਕੰਸਲਟੈਂਸੀ ਸਰਵਿਸਿਜ਼ (ਟੀ. ਸੀ. ਐੱਸ.) ਨੇ ਵਿੱਤੀ ਸਾਲ 26 ਦੀ ਤੀਜੀ ਤਿਮਾਹੀ ਦੇ ਨਤੀਜਿਆਂ ਦਾ ਐਲਾਨ ਕਰ ਦਿੱਤਾ ਹੈ। ਕੰਪਨੀ ਦਾ ਤੀਜੀ ਤਿਮਾਹੀ ’ਚ ਕੰਸੋਲੀਡੇਟਿਡ ਨੈੱਟ ਪ੍ਰਾਫਿਟ ਸਾਲਾਨਾ ਆਧਾਰ ’ਤੇ 14 ਫੀਸਦੀ ਡਿੱਗ ਕੇ 10,657 ਕਰੋੜ ਰੁਪਏ ਰਹਿ ਗਿਆ। ਇਹ ਅੰਕੜਾ ਮਾਰਕੀਟ ਦੇ ਅੰਦਾਜ਼ੇ ਤੋਂ ਕਾਫੀ ਘੱਟ ਰਿਹਾ। ਸਟਾਕ ਐਕਸਚੇਂਜ ਨੂੰ ਦਿੱਤੀ ਗਈ ਜਾਣਕਾਰੀ ਮੁਤਾਬਕ ਅਕਤੂਬਰ-ਦਸੰਬਰ ਤਿਮਾਹੀ ’ਚ ਟੀ. ਸੀ. ਐੱਸ. ਦੀ ਆਮਦਨ 5 ਫੀਸਦੀ ਵਧ ਕੇ 67,087 ਕਰੋੜ ਰੁਪਏ ਹੋ ਗਈ।
ਨਾਲ ਹੀ ਟੀ. ਸੀ. ਐੱਸ. ਨੇ ਆਪਣੇ ਸ਼ੇਅਰਧਾਰਕਾਂ ਲਈ 11 ਰੁਪਏ ਪ੍ਰਤੀ ਸ਼ੇਅਰ ਦਾ ਅੰਤ੍ਰਿਮ ਡਿਵੀਡੈਂਡ ਅਤੇ 46 ਰੁਪਏ ਪ੍ਰਤੀ ਸ਼ੇਅਰ ਦਾ ਸਪੈਸ਼ਲ ਡਿਵੀਡੈਂਡ ਮਨਜ਼ੂਰ ਕੀਤਾ ਹੈ, ਭਾਵ ਕਿ ਨਿਵੇਸ਼ਕਾਂ ਨੂੰ ਕੁੱਲ 57 ਰੁਪਏ ਪ੍ਰਤੀ ਸ਼ੇਅਰ ਦਾ ਭੁਗਤਾਨ ਹੋਵੇਗਾ। ਨਤੀਜਿਆਂ ਤੋਂ ਪਹਿਲਾਂ ਅੱਜ ਐੱਨ. ਐੱਸ. ਈ. ’ਤੇ ਟੀ. ਸੀ. ਐੱਸ. ਦਾ ਸ਼ੇਅਰ 1.1 ਫੀਸਦੀ ਚੜ੍ਹ ਕੇ 3,243 ਰੁਪਏ ’ਤੇ ਬੰਦ ਹੋਇਆ।