ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਲੰਘੇ ਕੱਲ ਭਾਵ 10 ਮਈ 2026 ਨੂੰ ਹੈਦਰਾਬਾਦ ’ਚ ਇਕ ਰੈਲੀ ਦੌਰਾਨ ਦੇਸ਼ ਵਾਸੀਆਂ ਨੂੰ ਇਕ ਸਾਲ ਤੱਕ ਸੋਨਾ ਨਾ ਖਰੀਦਣ ਦੀ ਅਪੀਲ ਨੇ ਜਿਊਲਰੀ ਇੰਡਸਟਰੀ ’ਚ ਭੜਥੂ ਪਾ ਦਿੱਤਾ ਹੈ। ਦਿੱਲੀ ਸਮੇਤ ਪੂਰੇ ਦੇਸ਼ ਦੇ ਜਿਊਲਰੀ ਵਪਾਰੀ, ਸੁਨਿਆਰੇ ਅਤੇ ਛੋਟੇ ਕਾਰੋਬਾਰੀ ਇਸ ਅਪੀਲ ਤੋਂ ਬੇਹੱਦ ਚਿੰਤਤ ਨਜ਼ਰ ਆ ਰਹੇ ਹਨ।
ਚੈਂਬਰ ਆਫ ਟਰੇਡ ਐਂਡ ਇੰਡਸਟਰੀ (ਸੀ. ਟੀ. ਆਈ.) ਦੇ ਚੇਅਰਮੈਨ ਬ੍ਰਿਜੇਸ਼ ਗੋਇਲ ਨੇ ਇਸ ਮੁੱਦੇ ’ਤੇ ਵਿਸਥਾਰ ਨਾਲ ਗੱਲ ਕਰਦੇ ਹੋਏ ਦੱਸਿਆ ਕਿ ਅਪੀਲ ਸਾਹਮਣੇ ਆਉਂਦਿਆਂ ਹੀ ਸੈਂਕੜੇ ਵਪਾਰੀਆਂ ਨੇ ਉਨ੍ਹਾਂ ਨਾਲ ਸੰਪਰਕ ਕੀਤਾ ਅਤੇ ਆਪਣੀ ਡੂੰਘੀ ਚਿੰਤਾ ਪ੍ਰਗਟਾਈ ਹੈ।
ਗੋਇਲ ਨੇ ਕਿਹਾ ਕਿ ਵਿਆਹਾਂ ਦਾ ਪੀਕ ਸੀਜ਼ਨ ਚੱਲ ਰਿਹਾ ਹੈ ਅਤੇ ਇਸ ਸਮੇਂ ਪ੍ਰਧਾਨ ਮੰਤਰੀ ਦੀ ਇਸ ਅਪੀਲ ਨਾਲ ਗਹਿਣਿਆਂ ਅਤੇ ਜਿਊਲਰੀ ਦੀ ਮੰਗ ’ਚ ਭਾਰੀ ਗਿਰਾਵਟ ਆਉਣ ਦਾ ਖਦਸ਼ਾ ਹੈ।
ਖਪਤ 800 ਟਨ ਤੋਂ ਘਟ ਕੇ 500 ਟਨ ਰਹਿਣ ਦਾ ਅੰਦਾਜ਼ਾ
ਭਾਰਤ ਚੀਨ ਤੋਂ ਬਾਅਦ ਦੁਨੀਆ ਦਾ ਦੂਜਾ ਸਭ ਤੋਂ ਵੱਡਾ ਸੋਨੇ ਦਾ ਖਪਤਕਾਰ ਦੇਸ਼ ਹੈ। ਸੀ. ਟੀ. ਆਈ. ਅਨੁਸਾਰ ਦੇਸ਼ ’ਚ ਹਰ ਸਾਲ ਔਸਤਨ 700 ਤੋਂ 800 ਟਨ ਸੋਨੇ ਦੀ ਖਪਤ ਹੁੰਦੀ ਹੈ। ਬ੍ਰਿਜੇਸ਼ ਗੋਇਲ ਦਾ ਕਹਿਣਾ ਹੈ ਕਿ ਪੀ. ਐੱਮ. ਮੋਦੀ ਦੀ ਇਸ ਅਪੀਲ ਤੋਂ ਬਾਅਦ ਸੋਨੇ ਦੀ ਖਪਤ 800 ਟਨ ਤੋਂ ਘਟ ਕੇ 500 ਟਨ ਤੱਕ ਰਹਿ ਸਕਦੀ ਹੈ।
ਛੋਟੇ ਜਿਊਲਰਜ਼, ਸੁਨਿਆਰੇ ਅਤੇ ਕਾਰੀਗਰਾਂ ’ਤੇ ਛਾਂਟੀ ਦਾ ਖਤਰਾ
ਸੀ. ਟੀ. ਆਈ. ਚੇਅਰਮੈਨ ਨੇ ਚਿਤਾਵਨੀ ਦਿੰਦੇ ਹੋਏ ਕਿਹਾ ਕਿ ਜੇਕਰ ਇਕ ਸਾਲ ਤੱਕ ਸੋਨੇ ਦੀ ਵਿਕਰੀ ਪ੍ਰਭਾਵਿਤ ਰਹੀ ਤਾਂ ਛੋਟੇ ਜਿਊਲਰਜ਼, ਸੁਨਿਆਰੇ ਅਤੇ ਕਾਰੀਗਰਾਂ ਨੂੰ ਆਪਣੇ ਕਰਮਚਾਰੀਆਂ ਨੂੰ ਤਨਖਾਹ ਦੇਣ ’ਚ ਵੱਡੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਅਜਿਹੇ ’ਚ ਕਈ ਥਾਵਾਂ ’ਤੇ ਮਜਬੂਰਨ ਕਰਮਚਾਰੀਆਂ ਦੀ ਛਾਂਟੀ ਕਰਨੀ ਪੈ ਸਕਦੀ ਹੈ। ਜਿਊਲਰਜ਼ ਦਾ ਮੰਨਣਾ ਹੈ ਕਿ ਇਸ ਤਰ੍ਹਾਂ ਦੀ ਅਪੀਲ ਨਾਲ ਗਾਹਕਾਂ ਦੇ ਮਨ ’ਚ ਡਰ ਦਾ ਮਾਹੌਲ ਬਣ ਜਾਂਦਾ ਹੈ, ਜਿਸ ਕਾਰਨ ਸੋਨੇ ਦੀ ਵਿਕਰੀ ਖਾਸ ਕਰ ਕੇ ਵਿਆਹਾਂ ਦੇ ਸੀਜ਼ਨ ’ਚ ਕਾਫੀ ਘੱਟ ਹੋ ਸਕਦੀ ਹੈ।
ਸੋਨਾ ਸੱਭਿਆਚਾਰ ਦਾ ਹਿੱਸਾ ਹੈ
ਸੀ. ਟੀ. ਆਈ. ਜਨਰਲ ਸਕੱਤਰ ਗੁਰਮੀਤ ਅਰੋੜਾ ਅਤੇ ਰਮੇਸ਼ ਆਹੂਜਾ ਨੇ ਕਿਹਾ ਕਿ ਸੋਨਾ ਸਿਰਫ ਇਕ ਧਾਤੂ ਜਾਂ ਨਿਵੇਸ਼ ਦਾ ਸਾਧਨ ਨਹੀਂ ਹੈ, ਸਗੋਂ ਭਾਰਤੀ ਸੱਭਿਆਚਾਰ ਨਾਲ ਡੂੰਘਾਈ ਨਾਲ ਜੁੜਿਆ ਹੋਇਆ ਹੈ। ਵਿਆਹਾਂ ’ਚ ਗਹਿਣੇ ਲੱਗਭਗ ਲਾਜ਼ਮੀ ਮੰਨੇ ਜਾਂਦੇ ਹਨ, ਇਸ ਲਈ ਇਹ ਅਪੀਲ ਜਿਊਲਰੀ ਇੰਡਸਟਰੀ ਦੇ ਨਾਲ-ਨਾਲ ਆਮ ਲੋਕਾਂ ਲਈ ਵੀ ਕਾਫੀ ਚੁਣੌਤੀਪੂਰਨ ਸਮਾਂ ਪੈਦਾ ਕਰ ਰਹੀ ਹੈ।