ਡਿਜੀਟਲ ਭੁਗਤਾਨ ਪਲੇਟਫਾਰਮ ਫੋਨਪੇ ਨੇ ਜਨਤਕ ਟ੍ਰਾਂਸਪੋਰਟ ਯਾਤਰੀਆਂ ਲਈ ‘ਫੋਨਪੇ ਰੂਪੇ ਆਨ-ਦਿ-ਗੋ ਕਾਰਡ’ ਪੇਸ਼ ਕੀਤਾ ਹੈ। ਇਹ ਇਕ ਰਾਸ਼ਟਰੀ ਜਨਤਕ ਟ੍ਰਾਂਸਪੋਰਟ ਕਾਰਡ (ਐੱਨ. ਸੀ. ਐੱਮ. ਸੀ.) ਹੈ, ਜੋ ਸਰਕਾਰ ਦੀ ‘ਇਕ ਦੇਸ਼, ਇਕ ਕਾਰਡ’ ਪਹਿਲ ਅਨੁਸਾਰ ਦੇਸ਼ ਭਰ ’ਚ ਯਾਤਰਾ ਭੁਗਤਾਨ ਨੂੰ ਆਸਾਨ ਬਣਾਉਣ ਦਾ ਟੀਚਾ ਰੱਖਦਾ ਹੈ। ਇਹ ਕਾਰਡ ਮੈਟਰੋ, ਬੱਸ, ਟ੍ਰੇਨ, ਟੋਲ ਅਤੇ ਪਾਰਕਿੰਗ ਵਰਗੀਆਂ ਐੱਨ. ਸੀ. ਐੱਮ. ਸੀ.-ਸਮਰੱਥ ਸੇਵਾਵਾਂ ’ਤੇ ‘ਟੈਪ ਐਂਡ ਪੇ’ ਰਾਹੀਂ ਤੁਰੰਤ ਭੁਗਤਾਨ ਦੀ ਸਹੂਲਤ ਦਿੰਦਾ ਹੈ। ਇਸ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ’ਚ ਭੁਗਤਾਨ ਲਈ ਇੰਟਰਨੈੱਟ ਦੀ ਲੋੜ ਨਹੀਂ ਹੁੰਦੀ। ਕਾਰਡ ਐਡਵਾਂਸ-ਪੇਮੈਂਟ ਅਾਧਾਰਿਤ ਸਟੋਰਡ ਵੈਲਿਊ ਮਾਡਲ ’ਤੇ ਕੰਮ ਕਰਦਾ ਹੈ, ਜਿਸ ’ਚ ਰਾਸ਼ੀ ਸਿੱਧੀ ਕਾਰਡ ਦੀ ਚਿੱਪ ’ਚ ਸੁਰੱਖਿਅਤ ਰਹਿੰਦੀ ਹੈ।
ਯੂਜ਼ਰ ਇਸ ਕਾਰਡ ’ਚ ਵੱਧ ਤੋਂ ਵੱਧ 2,000 ਰੁਪਏ ਤੱਕ ਦੀ ਰਾਸ਼ੀ ਜਮ੍ਹਾ ਕਰ ਸਕਦੇ ਹਨ, ਜਦਕਿ ਇਕ ਵਾਰ ’ਚ ਬਿਨਾਂ ਇੰਟਰਨੈੱਟ ਦੇ ਵੱਧ ਤੋਂ ਵੱਧ 500 ਰੁਪਏ ਤੱਕ ਦਾ ਭੁਗਤਾਨ ਕੀਤਾ ਜਾ ਸਕਦਾ ਹੈ। ਫੋਨਪੇ ’ਚ ਭੁਗਤਾਨ ਵਿਭਾਗ ਦੇ ਮੁਖੀ ਦੀਪ ਅਗਰਵਾਲ ਨੇ ਕਿਹਾ ਕਿ ਇਹ ਕਾਰਡ ਰੋਜ਼ਾਨਾ ਜਨਤਕ ਟ੍ਰਾਂਸਪੋਰਟ ਦੀ ਵਰਤੋਂ ਕਰਨ ਵਾਲੇ ਕਰੋੜਾਂ ਯਾਤਰੀਆਂ ਲਈ ਸੁਵਿਧਾਜਨਕ ਅਤੇ ਸੁਰੱਖਿਅਤ ਤਜਰਬਾ ਪ੍ਰਦਾਨ ਕਰੇਗਾ।
ਇਸ ਸੇਵਾ ਦੀ ਸ਼ੁਰੂਆਤ ਫਿਲਹਾਲ ਹੈਦਰਾਬਾਦ ਮੈਟਰੋ ਤੋਂ ਕੀਤੀ ਗਈ ਹੈ, ਜਿਸ ਨੂੰ ਐੱਲ. ਐਂਡ ਟੀ. ਮੈਟਰੋ ਰੇਲ ਹੈਦਰਾਬਾਦ ਲਿਮਟਿਡ ਨਾਲ ਸਾਂਝੇਦਾਰੀ ’ਚ ਲਾਗੂ ਕੀਤਾ ਗਿਆ ਹੈ। ਯਾਤਰੀ ਮੈਟਰੋ ਟਿਕਟ ਕਾਊਂਟਰ ਤੋਂ ਫ਼ੋਨ ਨੰਬਰ ਦੀ ਵੈਰੀਫਿਕੇਸ਼ਨ ਤੋਂ ਬਾਅਦ ਇਹ ਕਾਰਡ ਪ੍ਰਾਪਤ ਕਰ ਸਕਦੇ ਹਨ ਅਤੇ ਇਸ ਨੂੰ ਯੂ. ਪੀ. ਆਈ., ਨਕਦ ਜਾਂ ਕਾਰਡ ਰਾਹੀਂ ਰੀਚਾਰਜ ਕਰ ਸਕਦੇ ਹਨ। ਭਵਿੱਖ ’ਚ ਇਸ ਨੂੰ ਹੋਰਨਾਂ ਸ਼ਹਿਰਾਂ ’ਚ ਵੀ ਵਧਾਇਆ ਜਾਵੇਗਾ।