ਸੋਸ਼ਲ ਮੀਡੀਆ ਦਿੱਗਜ ਮੈਟਾ (Meta) ਇੱਕ ਵਾਰ ਫਿਰ ਵੱਡੇ ਪੱਧਰ 'ਤੇ ਆਪਣੇ ਕਰਮਚਾਰੀਆਂ ਦੀ ਛਾਂਟੀ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਰਿਪੋਰਟਾਂ ਮੁਤਾਬਕ ਕੰਪਨੀ ਆਪਣੇ ਕੁੱਲ ਕਰਮਚਾਰੀਆਂ ਦੀ ਗਿਣਤੀ ਵਿੱਚ 20% ਜਾਂ ਉਸ ਤੋਂ ਵੱਧ ਦੀ ਕਟੌਤੀ ਕਰਨ 'ਤੇ ਵਿਚਾਰ ਕਰ ਰਹੀ ਹੈ। ਇਹ ਕਦਮ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਬੁਨਿਆਦੀ ਢਾਂਚੇ 'ਤੇ ਕੀਤੇ ਜਾ ਰਹੇ ਭਾਰੀ ਨਿਵੇਸ਼ ਅਤੇ ਕੰਪਨੀ ਦੀ ਭਵਿੱਖੀ ਰਣਨੀਤੀ ਦੇ ਹਿੱਸੇ ਵਜੋਂ ਚੁੱਕਿਆ ਜਾ ਸਕਦਾ ਹੈ।
ਕਰੀਬ 16,000 ਕਰਮਚਾਰੀਆਂ 'ਤੇ ਪਵੇਗਾ ਅਸਰ
ਕੰਪਨੀ ਦੀ ਹਾਲੀਆ ਫਾਈਲਿੰਗ ਅਨੁਸਾਰ, 31 ਦਸੰਬਰ 2025 ਤੱਕ ਮੈਟਾ ਵਿੱਚ ਲਗਭਗ 79,000 ਕਰਮਚਾਰੀ ਕੰਮ ਕਰ ਰਹੇ ਸਨ। ਜੇਕਰ ਕੰਪਨੀ 20% ਛਾਂਟੀ ਕਰਦੀ ਹੈ, ਤਾਂ ਲਗਭਗ 16,000 ਮੁਲਾਜ਼ਮਾਂ ਦੀ ਨੌਕਰੀ ਪ੍ਰਭਾਵਿਤ ਹੋ ਸਕਦੀ ਹੈ। ਜੇਕਰ ਅਜਿਹਾ ਹੁੰਦਾ ਹੈ, ਤਾਂ ਇਹ 2022-23 ਦੀ ਰੀਸਟ੍ਰਕਚਰਿੰਗ ਤੋਂ ਬਾਅਦ ਕੰਪਨੀ ਦੀ ਸਭ ਤੋਂ ਵੱਡੀ ਛਾਂਟੀ ਹੋਵੇਗੀ। ਦੱਸ ਦੇਈਏ ਕਿ ਨਵੰਬਰ 2022 ਵਿੱਚ ਵੀ ਮੈਟਾ ਨੇ 11,000 ਮੁਲਾਜ਼ਮਾਂ ਨੂੰ ਕੱਢਿਆ ਸੀ, ਜਿਸ ਤੋਂ ਕੁਝ ਮਹੀਨਿਆਂ ਬਾਅਦ 10,000 ਹੋਰ ਨੌਕਰੀਆਂ ਵਿੱਚ ਕਟੌਤੀ ਕੀਤੀ ਗਈ ਸੀ।
AI 'ਤੇ ਵੱਡਾ ਦਾਅ ਲਗਾ ਰਹੇ ਹਨ ਮਾਰਕ ਜ਼ੁਕਰਬਰਗ
ਮੈਟਾ ਦੇ CEO ਮਾਰਕ ਜ਼ੁਕਰਬਰਗ ਪਿਛਲੇ ਇੱਕ ਸਾਲ ਤੋਂ ਕੰਪਨੀ ਨੂੰ ਜਨਰੇਟਿਵ AI (Generative AI) ਦੇ ਖੇਤਰ ਵਿੱਚ ਮਜ਼ਬੂਤ ਕਰਨ 'ਤੇ ਜ਼ੋਰ ਦੇ ਰਹੇ ਹਨ। ਇਸ ਲਈ ਕੰਪਨੀ ਨੇ ਚੋਟੀ ਦੇ AI ਖੋਜਕਰਤਾਵਾਂ ਨੂੰ ਆਪਣੀ ਨਵੀਂ "ਸੁਪਰਇੰਟੈਲੀਜੈਂਸ ਟੀਮ" ਵਿੱਚ ਸ਼ਾਮਲ ਕਰਨ ਲਈ ਵੱਡੇ ਪੈਕੇਜਾਂ ਦੀ ਪੇਸ਼ਕਸ਼ ਵੀ ਕੀਤੀ ਹੈ।
ਭਾਰੀ ਨਿਵੇਸ਼ ਅਤੇ ਨਵੀਆਂ ਖਰੀਦਾਂ
ਮੈਟਾ ਆਉਣ ਵਾਲੇ ਸਾਲਾਂ ਵਿੱਚ ਡੇਟਾ ਸੈਂਟਰ ਅਤੇ AI ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ਲਈ 2028 ਤੱਕ ਲਗਭਗ 600 ਅਰਬ ਡਾਲਰ ਨਿਵੇਸ਼ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਇਸੇ ਰਣਨੀਤੀ ਤਹਿਤ ਕੰਪਨੀ ਨੇ ਹਾਲ ਹੀ ਵਿੱਚ AI ਏਜੰਟਾਂ ਲਈ ਵਿਕਸਤ 'Moltbook' ਨਾਮਕ ਸੋਸ਼ਲ ਨੈੱਟਵਰਕਿੰਗ ਪਲੇਟਫਾਰਮ ਖਰੀਦਿਆ ਹੈ ਅਤੇ ਚੀਨੀ AI ਸਟਾਰਟਅੱਪ 'Manus' ਨੂੰ ਖਰੀਦਣ ਲਈ 2 ਅਰਬ ਡਾਲਰ ਖਰਚਣ ਦੀ ਤਿਆਰੀ ਵਿੱਚ ਹੈ।
ਕਿਉਂ ਹੋ ਰਹੀ ਹੈ ਛਾਂਟੀ?
ਮਾਹਰਾਂ ਦਾ ਮੰਨਣਾ ਹੈ ਕਿ AI ਦੇ ਵਧਦੇ ਇਸਤੇਮਾਲ ਕਾਰਨ ਹੁਣ ਟੈੱਕ ਕੰਪਨੀਆਂ ਘੱਟ ਕਰਮਚਾਰੀਆਂ ਨਾਲ ਜ਼ਿਆਦਾ ਕੰਮ ਕਰਨ ਦੀ ਰਣਨੀਤੀ ਅਪਣਾ ਰਹੀਆਂ ਹਨ, ਜਿਸ ਦਾ ਸਿੱਧਾ ਅਸਰ ਰੁਜ਼ਗਾਰ 'ਤੇ ਪੈ ਰਿਹਾ ਹੈ।