ਪੱਛਮੀ ਏਸ਼ੀਆ ’ਚ ਸੰਘਰਸ਼ ਦੀ ਵਜ੍ਹਾ ਨਾਲ ਊਰਜਾ ਸਪਲਾਈ ’ਚ ਰੁਕਾਵਟ ਆਉਣ ਕਾਰਨ ਦੇਸ਼ ’ਚ ਰਸੋਈ ਗੈਸ (ਐੱਲ. ਪੀ. ਜੀ.) ਦੀ ਖਪਤ ਅਪ੍ਰੈਲ ’ਚ 16 ਫੀਸਦੀ ਤੋਂ ਵੱਧ ਘੱਟ ਕੇ 22 ਲੱਖ ਟਨ ਰਹਿ ਗਈ। ਸੋਮਵਾਰ ਨੂੰ ਜਾਰੀ ਤਾਜ਼ਾ ਅੰਕੜਿਆਂ ’ਚ ਇਹ ਜਾਣਕਾਰੀ ਮਿਲੀ।
ਪੈਟਰੋਲੀਅਮ ਮੰਤਰਾਲਾ ਦੇ ਪੈਟਰੋਲੀਅਮ ਯੋਜਨਾ ਅਤੇ ਵਿਸ਼ਲੇਸ਼ਣ ਸੈੱਲ (ਪੀ. ਪੀ. ਏ. ਸੀ.) ਵੱਲੋਂ ਜਾਰੀ ਅੰਕੜਿਆਂ ਅਨੁਸਾਰ, ਇਸ ਸਾਲ ਅਪ੍ਰੈਲ ’ਚ ਐੱਲ. ਪੀ. ਜੀ. ਦੀ ਘਰੇਲੂ ਖਪਤ ਸਾਲਾਨਾ ਆਧਾਰ ’ਤੇ 16.16 ਫੀਸਦੀ ਘਟ ਕੇ 22 ਲੱਖ ਟਨ ਰਹਿ ਗਈ, ਜਦੋਂ ਕਿ ਅਪ੍ਰੈਲ 2025 ’ਚ ਇਹ 26.2 ਲੱਖ ਟਨ ਸੀ। ਮਹੀਨਾਵਾਰੀ ਆਧਾਰ ’ਤੇ ਵੀ ਐੱਲ. ਪੀ. ਜੀ. ਖਪਤ ’ਚ ਗਿਰਾਵਟ ਦਰਜ ਕੀਤੀ ਗਈ ਹੈ। ਮਾਰਚ 2026 ’ਚ ਐੱਲ. ਪੀ. ਜੀ. ਦੀ ਘਰੇਲੂ ਖਪਤ 23.79 ਲੱਖ ਟਨ ਰਹੀ ਸੀ।
ਭਾਰਤ ਆਪਣੀਆਂ ਐੱਲ. ਪੀ. ਜੀ. ਲੋੜਾਂ ਦਾ ਲੱਗਭਗ 60 ਫੀਸਦੀ ਦਰਾਮਦ ਕਰਦਾ ਹੈ, ਜਿਸ ਦਾ ਵੱਡਾ ਹਿੱਸਾ ਹੋਰਮੁਜ਼ ਸਟ੍ਰੇਟ ਦੇ ਰਸਤੇ ਆਉਂਦਾ ਹੈ। ਅਮਰੀਕਾ-ਇਜ਼ਰਾਈਲ ਅਤੇ ਈਰਾਨ ਵਿਚਾਲੇ ਫੌਜੀ ਸੰਘਰਸ਼ ਛਿੜਣ ਕਾਰਨ ਇਸ ਰਸਤੇ ਤੋਂ ਸਪਲਾਈ ਪ੍ਰਭਾਵਿਤ ਹੋਈ ਹੈ, ਜਿਸ ਨਾਲ ਸਾਊਦੀ ਅਰਬ ਅਤੇ ਸੰਯੁਕਤ ਅਰਬ ਅਮੀਰਾਤ (ਯੂ. ਏ. ਈ.) ਤੋਂ ਆਉਣ ਵਾਲੀਆਂ ਗੈਸ ਦੀਆਂ ਖੇਪਾਂ ’ਚ ਰੁਕਾਵਟ ਆਈ।
ਸਰਕਾਰ ਨੇ ਘਰੇਲੂ ਰਸੋਈ ਗੈਸ ਦੀ ਉਪਲਬਧਤਾ ਬਣਾਈ ਰੱਖਣ ਲਈ ਹੋਟਲ ਅਤੇ ਉਦਯੋਗਾਂ ਵਰਗੇ ਵਪਾਰਕ ਖਪਤਕਾਰਾਂ ਨੂੰ ਸਪਲਾਈ ਘਟਾ ਦਿੱਤੀ ਹੈ। ਨਾਲ ਹੀ ਘਰੇਲੂ ਸਿਲੰਡਰ ਦੀਆਂ ਦੋ ਰਿਫਿਲਿੰਗਾਂ ਵਿਚਾਲੇ ਵਕਫਾ ਵੀ ਵਧਾਇਆ ਗਿਆ ਹੈ।
ਅੰਕੜਿਆਂ ਅਨੁਸਾਰ, ਅਪ੍ਰੈਲ ’ਚ ਹਵਾਬਾਜ਼ੀ ਈਂਧਨ (ਏ. ਟੀ. ਐੱਫ.) ਦੀ ਖਪਤ 1.37 ਫੀਸਦੀ ਘਟ ਕੇ 7.61 ਲੱਖ ਟਨ ਰਹਿ ਗਈ, ਜੋ ਹਵਾਈ ਖੇਤਰ ਬੰਦ ਹੋਣ ਅਤੇ ਉਡਾਣਾਂ ’ਚ ਕਮੀ ਦਾ ਅਸਰ ਦਰਸਾਉਂਦੀ ਹੈ।
ਇਸ ਦੌਰਾਨ ਡੀਜ਼ਲ ਦੀ ਖਪਤ ਵਾਧਾ ਦਰ ’ਚ ਵੀ ਸੁਸਤੀ ਰਹੀ ਅਤੇ ਇਹ ਸਿਰਫ 0.25 ਫੀਸਦੀ ਵਧ ਕੇ 82.82 ਲੱਖ ਟਨ ਰਹੀ। ਮਾਰਚ ’ਚ ਇਸ ’ਚ 8.1 ਫੀਸਦੀ ਦਾ ਵਾਧਾ ਹੋਇਆ ਸੀ। ਹਾਲਾਂਕਿ, ਪੈਟਰੋਲ ਦੀ ਖਪਤ ਅਪ੍ਰੈਲ ’ਚ 6.36 ਫੀਸਦੀ ਵਧ ਕੇ 36.7 ਲੱਖ ਟਨ ਰਹੀ। ਹਾਲਾਂਕਿ, ਇਹ ਵਾਧਾ ਮਾਰਚ ਦੇ 7.6 ਫੀਸਦੀ ਤੋਂ ਘੱਟ ਹੈ।