ਦੇਸ਼ ਦੀ ਸਭ ਤੋਂ ਵੱਡੀ ਸਰਕਾਰੀ ਬੀਮਾ ਕੰਪਨੀ ਭਾਰਤੀ ਜੀਵਨ ਬੀਮਾ ਨਿਗਮ (LIC) ਨੇ ਆਪਣੇ ਨਿਵੇਸ਼ਕਾਂ ਨੂੰ ਤੋਹਫ਼ਾ ਦੇਣ ਦਾ ਐਲਾਨ ਕੀਤਾ ਹੈ। ਕੰਪਨੀ ਦੇ ਬੋਰਡ ਨੇ ਸ਼ੁੱਕਰਵਾਰ ਨੂੰ 1:1 ਦੇ ਅਨੁਪਾਤ ਵਿੱਚ ਬੋਨਸ ਸ਼ੇਅਰ ਜਾਰੀ ਕਰਨ ਦੀ ਮਨਜ਼ੂਰੀ ਦੇ ਦਿੱਤੀ ਹੈ। ਸਾਲ 2022 ਵਿੱਚ ਸ਼ੇਅਰ ਬਾਜ਼ਾਰ ਵਿੱਚ ਸੂਚੀਬੱਧ (Listing) ਹੋਣ ਤੋਂ ਬਾਅਦ ਇਹ ਪਹਿਲੀ ਵਾਰ ਹੈ ਜਦੋਂ ਕੰਪਨੀ ਬੋਨਸ ਇਸ਼ੂ ਲਿਆ ਰਹੀ ਹੈ।
ਹਰ ਇਕ ਸ਼ੇਅਰ ਦੇ ਬਦਲੇ ਮਿਲੇਗਾ ਇਕ ਵਾਧੂ ਸ਼ੇਅਰ
ਕੰਪਨੀ ਅਨੁਸਾਰ, ਰਿਕਾਰਡ ਡੇਟ ਤੱਕ ਸ਼ੇਅਰ ਹੋਲਡ ਕਰਨ ਵਾਲੇ ਨਿਵੇਸ਼ਕ ਇਸ ਦੇ ਪਾਤਰ ਹੋਣਗੇ। ਰਿਕਾਰਡ ਡੇਟ 'ਤੇ ਨਿਵੇਸ਼ਕਾਂ ਕੋਲ ਮੌਜੂਦ ਹਰ 1 ਸ਼ੇਅਰ ਦੇ ਬਦਲੇ 1 ਵਾਧੂ ਸ਼ੇਅਰ ਮੁਫ਼ਤ ਦਿੱਤਾ ਜਾਵੇਗਾ। ਹਾਲਾਂਕਿ, ਕੰਪਨੀ ਵੱਲੋਂ ਰਿਕਾਰਡ ਡੇਟ ਦਾ ਐਲਾਨ ਜਲਦੀ ਹੀ ਕੀਤਾ ਜਾਵੇਗਾ। ਇਸ ਬੋਨਸ ਇਸ਼ੂ ਨਾਲ ਨਿਵੇਸ਼ਕਾਂ ਦੇ ਸ਼ੇਅਰਾਂ ਦੀ ਗਿਣਤੀ ਤਾਂ ਦੁੱਗਣੀ ਹੋ ਜਾਵੇਗੀ, ਪਰ ਨਿਵੇਸ਼ ਦਾ ਕੁੱਲ ਮੁੱਲ ਉਹੀ ਰਹੇਗਾ ਕਿਉਂਕਿ ਸ਼ੇਅਰ ਦੀ ਕੀਮਤ ਉਸੇ ਅਨੁਪਾਤ ਵਿੱਚ ਐਡਜਸਟ ਹੋ ਜਾਵੇਗੀ।
6,325 ਕਰੋੜ ਰੁਪਏ ਦਾ ਹੋਵੇਗਾ ਬੋਨਸ ਇਸ਼ੂ
LIC ਇਸ ਬੋਨਸ ਇਸ਼ੂ ਲਈ ਆਪਣੇ ਰਿਜ਼ਰਵ ਅਤੇ ਸਰਪਲੱਸ ਫੰਡ ਵਿੱਚੋਂ 6,325 ਕਰੋੜ ਰੁਪਏ ਦੀ ਵਰਤੋਂ ਕਰੇਗੀ। ਬੋਰਡ ਦੀ ਮਨਜ਼ੂਰੀ ਤੋਂ ਬਾਅਦ ਇਹ ਪ੍ਰਕਿਰਿਆ 2 ਮਹੀਨਿਆਂ ਦੇ ਅੰਦਰ, ਯਾਨੀ 12 ਜੂਨ ਤੱਕ ਪੂਰੀ ਕਰ ਲਈ ਜਾਵੇਗੀ। ਦੱਸਣਯੋਗ ਹੈ ਕਿ ਲਿਸਟਿੰਗ ਤੋਂ ਬਾਅਦ ਕੰਪਨੀ ਹੁਣ ਤੱਕ ਪੰਜ ਵਾਰ ਅੰਤਰਿਮ ਡਿਵੀਡੈਂਡ ਦੇ ਚੁੱਕੀ ਹੈ।
ਕਿਉਂ ਜਾਰੀ ਕੀਤਾ ਗਿਆ ਬੋਨਸ?
ਕੰਪਨੀ ਵੱਲੋਂ ਬੋਨਸ ਸ਼ੇਅਰ ਜਾਰੀ ਕਰਨ ਦਾ ਮੁੱਖ ਮਕਸਦ ਬਾਜ਼ਾਰ ਵਿੱਚ ਸ਼ੇਅਰਾਂ ਦੀ ਤਰਲਤਾ (Liquidity) ਵਧਾਉਣਾ ਅਤੇ ਸ਼ੇਅਰ ਦੀ ਕੀਮਤ ਨੂੰ ਨਿਵੇਸ਼ਕਾਂ ਲਈ ਵਧੇਰੇ ਕਿਫਾਇਤੀ ਬਣਾਉਣਾ ਹੈ। ਇਹ ਕਦਮ ਕੰਪਨੀ ਦੇ ਭਵਿੱਖ ਦੇ ਵਿਕਾਸ 'ਤੇ ਭਰੋਸੇ ਨੂੰ ਵੀ ਦਰਸਾਉਂਦਾ ਹੈ।
LIC ਦਾ ਵਿੱਤੀ ਪ੍ਰਦਰਸ਼ਨ
ਦਸੰਬਰ ਤਿਮਾਹੀ ਦੇ ਨਤੀਜਿਆਂ ਮੁਤਾਬਕ LIC ਦਾ ਸ਼ੁੱਧ ਲਾਭ 17% ਵਧ ਕੇ 12,930 ਕਰੋੜ ਰੁਪਏ ਰਿਹਾ ਹੈ। ਇਸੇ ਤਰ੍ਹਾਂ ਕੰਪਨੀ ਦੀ ਸ਼ੁੱਧ ਪ੍ਰੀਮੀਅਮ ਆਮਦਨ ਵੀ 17% ਦੇ ਵਾਧੇ ਨਾਲ 1.26 ਲੱਖ ਕਰੋੜ ਰੁਪਏ 'ਤੇ ਪਹੁੰਚ ਗਈ ਹੈ।
ਸ਼ੇਅਰ ਬਾਜ਼ਾਰ ਵਿੱਚ ਸਥਿਤੀ
ਸ਼ੁੱਕਰਵਾਰ ਨੂੰ ਬੀ.ਐਸ.ਈ. (BSE) 'ਤੇ LIC ਦਾ ਸ਼ੇਅਰ 0.71% ਦੀ ਤੇਜ਼ੀ ਨਾਲ 804.25 ਰੁਪਏ 'ਤੇ ਬੰਦ ਹੋਇਆ। ਪਿਛਲੇ ਇੱਕ ਮਹੀਨੇ ਵਿੱਚ ਇਸ ਵਿੱਚ 3.51% ਦਾ ਵਾਧਾ ਹੋਇਆ ਹੈ, ਜਦਕਿ ਇੱਕ ਸਾਲ ਦਾ ਰਿਟਰਨ 2.53% ਰਿਹਾ ਹੈ।