ਜੇਕਰ ਤੁਸੀਂ ਵੀ ਗੂਗਲ ਅਤੇ ਫੇਸਬੁੱਕ ਦਾ ਇਸਤੇਮਾਲ ਕਰਦੇ ਹੋ ਤਾਂ ਤੁਹਾਨੂੰ ਬਹੁਤ ਸਾਵਧਾਨ ਰਹਿਣ ਦੀ ਲੋੜ ਹੈ ਕਿਉਂਕਿ 16 ਅਰਬ ਯਾਨੀ 1600 ਕਰੋੜ ਪਾਸਵਰਡ ਅਤੇ ਲਾਗ-ਇਨ ਡਿਟੇਲ ਲੀਕ ਹੋ ਗਈ ਹੈ। ਇਸ ਡਾਟਾ ਲੀਕ ਨੂੰ ਇਤਿਹਾਸ ਦੀ ਸਭ ਤੋਂ ਵੱਡੀ ਡਾਟਾ ਚੋਰੀ ਹੋਣ ਦੀ ਘਟਨਾ ਦੱਸਿਆ ਜਾ ਰਿਹਾ ਹੈ। ਇਸਨੇ ਕੰਪਨੀਆਂ ਅਤੇ ਲੋਕਾਂ ਦੀ ਨੀਂਦ ਉਡਾਉਣ ਦੇ ਨਾਲ ਹੀ ਚਿੰਤਾ ਵਧਾ ਦਿੱਤੀ ਹੈ। ਇਸਦੀ ਜਾਣਕਾਰੀ ਸਾਈਬਰ ਨਿਊਜ਼ ਅਤੇ ਫੋਰਬਸ ਦੀ ਇਕ ਰਿਪੋਰਟ ਤੋਂ ਮਿਲੀ ਹੈ।
30 ਡਾਟਾਬੇਸ ਹੋਏ ਲੀਕ
ਰਿਪੋਰਟ ਅਨੁਸਾਰ 30 ਡਾਟਾਬੇਸ ਮਿਲੇ ਹਨ। ਹਰ ਇਕ ਡਾਟਾਬੇਸ 'ਚ 3.5 ਅਰਬ ਡਾਟਾ ਮੌਜੂਦ ਹੈ। ਇਸ ਨਾਲ ਗਿਣਤੀ 16 ਅਰਬ ਤਕ ਪਹੁੰਚ ਗਈ ਹੈ। ਇਨ੍ਹਾਂ 'ਚ Google, Apple, Facebook, Telegram, Github ਅਤੇ ਕਈ ਏਜੰਸੀਆਂ ਦਾ ਡਾਟਾ ਸ਼ਾਮਲ ਹੈ। ਇਸ ਚੋਰੀ ਨੂੰ ਅੰਜਾਮ ਦੇਣ ਲਈ ਸਾਈਬਰ ਅਪਰਾਥੀਆਂ ਨੇ Infostealer Malware ਦਾ ਸਹਾਰਾ ਲਿਆ ਹੈ।
ਲਾਗ-ਇਨ ਕ੍ਰੇਡੈਂਸ਼ੀਅਲ ਨੂੰ ਸੋਸ਼ਲ ਮੀਡੀਆ, ਵੀਪੀਐੱਨ, ਡਿਵੈਲਪਰ ਪੋਰਟਲ ਅਤੇ ਕਾਰਪੋਰੇਟ ਪਲੇਟਫਾਰਮਾਂ ਤੋਂ ਚੋਰੀ ਕੀਤਾ ਗਿਆ ਹੈ। ਇਹ ਕੋਈ ਸਾਧਾਰਣ ਗੱਲ ਨਹੀਂ ਹੈ। ਇਸ ਨਾਲ ਲੋਕਾਂ ਦੇ ਨਿੱਜੀ ਡਾਟਾ ਦੇ ਲੀਕ ਹੋਣ ਦਾ ਖਤਰਾ ਵੱਧ ਗਿਆ ਹੈ। ਇਸਕਾਰਨ ਹੁਣ ਯੂਜ਼ਰਜ਼ ਨੂੰ ਜਲਦੀ ਤੋਂ ਜਲਦੀ ਪਾਸਵਰਡ ਬਦਲਣ ਅਤੇ ਪਾਸਕੀ ਯੂਜ਼ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।
ਸਾਈਬਰ ਮਾਹਿਰਾਂ ਦਾ ਕਹਿਣਾ ਹੈ ਕਿ ਲੀਕ ਹੋਇਆ ਡਾਟਾ ਡਾਰਕ ਵੈੱਬ 'ਤੇ ਵਿਕਰੀ ਲਈ ਉਪਲੱਬਧ ਹੈ। ਇਸਦੀ ਵਰਤੋਂ ਲੋਕਾਂ ਨੂੰ ਠੱਗਣ ਅਤੇ ਗਲਤ ਗਤੀਵਿਧੀਆਂ ਨੂੰ ਅੰਜਾਮ ਦੇਣ ਲਈ ਕੀਤੀ ਜਾ ਸਕਦੀ ਹੈ।
ਕਿਸ ਫਾਰਮ 'ਚ ਉਪਲੱਬਧ ਹੈ ਡਾਟਾ
ਰਿਪੋਰਟ 'ਚ ਅੱਗੇ ਦੱਸਿਆ ਗਿਆ ਹੈ ਕਿ ਚੋਰੀ ਕੀਤੇਗਏ ਡਾਟਾ ਨੂੰ ਆਰਗਨਾਈਜ਼ ਫਾਰਮੇਟ 'ਚ ਸੇਵ ਕੀਤਾ ਗਿਆ ਹੈ, ਜਿਸ ਨਾਲ ਇਸਦਾ ਇਸਤੇਮਾਲ ਆਸਾਨੀ ਨਾਲ ਕੀਤਾ ਜਾ ਸਕਦਾ ਹੈ। ਇਸ ਵਿਚ ਡਾਟਾ ਨੂੰ ਖਾਸ ਪੈਟਰਨ 'ਚ ਸੇਵ ਕੀਤਾ ਗਿਆ ਹੈ। ਇਸ ਵਿਚ ਪਹਿਲਾਂ ਯੂਆਰਐੱਲ, ਫਿਰ ਯੂਜ਼ਰਨੇਮ ਅਤੇ ਅਖੀਰ 'ਚ ਪਾਸਵਰਡ ਆਉਂਦਾ ਹੈ।
ਦੱਸ ਦੇਈਏ ਕਿ 16 ਅਰਬ ਪਾਸਵਰਡ ਅਤੇ ਲਾਗ-ਇਨ ਡਿਟੇਲ ਲੀਕ ਹੋਣ ਤੋਂ ਪਹਿਲਾਂ ਇਸ ਸਾਲ ਮਈ 'ਚ 18.4 ਕਰੋੜ ਤੋਂ ਵੱਧ ਪਾਸਵਰਡ ਲੀਕ ਹੋਏ ਸਨ। ਉਸ ਸਮੇਂ ਇਸ ਘਟਨਾ ਨੂੰ ਕਈ ਸਾਈਬਰ ਅਪਰਾਧੀਆਂ ਦੇ ਸਮੂਹਾਂ ਨੇ ਅੰਜਾਮ ਦਿੱਤਾ ਸੀ।