'ਹਸਪਤਾਲ 'ਚ ਚੂਹਿਆਂ ਨੇ ਕੁਤਰੀਆਂ ਜਵਾਕਾਂ ਦੇ ਹੱਥ ਦੀਆਂ ਚਾਰੋਂ ਉਂਗਲਾਂ', ਪ੍ਰਸ਼ਾਸਨ 'ਤੇ ਲੱਗੇ ਗੰਭੀਰ ਦੋਸ਼

ਇੰਦੌਰ ਦੇ ਸਰਕਾਰੀ ਮਹਾਰਾਜਾ ਯਸ਼ਵੰਤ ਰਾਓ ਹਸਪਤਾਲ (MYH) ਦੇ ਪ੍ਰਸ਼ਾਸਨ 'ਤੇ ਝੂਠ ਬੋਲਣ ਅਤੇ ਗੁੰਮਰਾਹ ਕਰਨ ਦਾ ਦੋਸ਼ ਲਗਾਉਂਦੇ ਹੋਏ ਕਬਾਇਲੀ ਭਾਈਚਾਰੇ ਦੇ ਇੱਕ ਸੰਗਠਨ ਨੇ ਸੋਮਵਾਰ ਨੂੰ ਦੋਸ਼ ਲਗਾਇਆ ਹੈ। ਉਹਨਾਂ ਕਿਹਾ ਕਿ ਹਸਪਤਾਲ ਦੇ ਇੰਟੈਂਸਿਵ ਕੇਅਰ ਯੂਨਿਟ (ICU) ਵਿੱਚ ਦਾਖਲ ਇੱਕ ਨਵਜੰਮੀ ਬੱਚੀ ਦੇ ਹੱਥ ਦੀਆਂ ਚਾਰੋਂ ਉਂਗਲਾਂ ਚੂਹਿਆਂ ਨੇ ਕੁਤਰ ਦਿੱਤੀਆਂ ਸਨ।

ਜੈਸ ਦੇ ਰਾਸ਼ਟਰੀ ਪ੍ਰਧਾਨ ਲੋਕੇਸ਼ ਮੁਜਲਦਾ ਨੇ ਕਿਹਾ, "ਧਾਰ ਜ਼ਿਲ੍ਹੇ ਦੇ ਆਦਿਵਾਸੀ ਭਾਈਚਾਰੇ ਦੇ ਦੇਵਰਾਮ ਦੀ ਨਵਜੰਮੀ ਧੀ ਨੂੰ ਜਨਮ ਸਮੇਂ ਨੁਕਸ ਕਾਰਨ MYH ਦੇ ICU ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਚੂਹਿਆਂ ਦੇ ਹਮਲੇ ਤੋਂ ਬਾਅਦ ਉਸਦੀ ਮੌਤ ਹੋ ਗਈ। ਪੋਸਟਮਾਰਟਮ ਤੋਂ ਬਾਅਦ ਲੜਕੀ ਦੀ ਲਾਸ਼ ਨੂੰ ਪਲਾਸਟਿਕ ਦੇ ਥੈਲੇ ਵਿੱਚ ਪੈਕ ਕਰਕੇ ਸ਼ਨੀਵਾਰ ਦੇਰ ਸ਼ਾਮ ਪਰਿਵਾਰ ਨੂੰ ਸੌਂਪ ਦਿੱਤਾ ਗਿਆ।"

ਉਨ੍ਹਾਂ ਕਿਹਾ ਕਿ ਅੰਤਿਮ ਸੰਸਕਾਰ ਕਰਨ ਤੋਂ ਪਹਿਲਾਂ ਜਦੋਂ ਸਰੀਰ ਤੋਂ ਪੈਕਿੰਗ ਹਟਾਈ ਗਈ ਤਾਂ ਪਰਿਵਾਰ ਦਾ ਦੁੱਖ ਅਤੇ ਗੁੱਸਾ ਉਸ ਸਮੇਂ ਹੋਰ ਵੀ ਵੱਧ ਗਿਆ, ਜਦੋਂ ਉਨ੍ਹਾਂ ਨੇ ਦੇਖਿਆ ਕਿ ਨਵਜੰਮੀ ਬੱਚੀ ਦੇ ਇੱਕ ਹੱਥ ਦੀਆਂ ਚਾਰੋਂ ਉਂਗਲਾਂ ਚੂਹੇ ਕੁਤਰ ਚੁੱਕੇ ਸਨ। ਮੁਜਾਲਦਾ ਨੇ ਦੋਸ਼ ਲਗਾਇਆ ਕਿ MYH ਪ੍ਰਸ਼ਾਸਨ ਨੇ ਸ਼ੁਰੂ ਵਿੱਚ ਇਸ ਬੱਚੀ ਦੇ ਬਾਰੇ ਵਿਚ ਝੂਠ ਬੋਲ ਕੇ ਗੁੰਮਰਾਹ ਕੀਤਾ ਸੀ ਕਿ ਚੂਹਿਆਂ ਦੇ ਕੱਟਣ ਨਾਲ ਉਸਦੀਆਂ ਉਂਗਲਾਂ 'ਤੇ ਮਾਮੂਲੀ ਜ਼ਖ਼ਮ ਹੋਏ।

ਉਹਨਾਂ ਨੇ MYH ਦੇ ਉੱਚ ਅਧਿਕਾਰੀਆਂ, ਜਿਸ ਵਿੱਚ ਇਸਦੇ ਸੁਪਰਡੈਂਟ ਵੀ ਸ਼ਾਮਲ ਹਨ, ਨੂੰ ਮੁਅੱਤਲ ਕਰਨ ਅਤੇ ਉਨ੍ਹਾਂ ਵਿਰੁੱਧ ਗੈਰ-ਇਰਾਦਤਨ ਕਤਲ ਦਾ ਮਾਮਲਾ ਦਰਜ ਕਰਨ ਦੀ ਆਪਣੀ ਮੰਗ ਦੁਹਰਾਈ, ਅਤੇ ਚੇਤਾਵਨੀ ਦਿੱਤੀ ਕਿ ਜੇਕਰ ਸੋਮਵਾਰ ਸ਼ਾਮ ਤੱਕ ਮੰਗ ਪੂਰੀ ਨਾ ਕੀਤੀ ਗਈ, ਤਾਂ ਆਦਿਵਾਸੀ ਭਾਈਚਾਰਾ ਇੱਕ ਵਿਸ਼ਾਲ ਅੰਦੋਲਨ ਸ਼ੁਰੂ ਕਰੇਗਾ।