ਗੋਪਾਲਗੰਜ : ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਨੇ ਪਟਨਾ ਵਿੱਚ ਪਾਰਟੀ ਦੇ ਬਿਹਾਰ ਯੂਨਿਟ ਦਫ਼ਤਰ 'ਤੇ ਭਾਜਪਾ ਵਰਕਰਾਂ ਦੇ ਵਿਰੋਧ ਪ੍ਰਦਰਸ਼ਨ ਦਾ ਹਵਾਲਾ ਦਿੰਦੇ ਹੋਏ ਸ਼ੁੱਕਰਵਾਰ ਨੂੰ ਕਿਹਾ ਕਿ ਸੱਚ ਅਤੇ ਅਹਿੰਸਾ ਦੇ ਸਾਹਮਣੇ ਝੂਠ ਅਤੇ ਹਿੰਸਾ ਟਿਕ ਨਹੀਂ ਸਕਦਾ ਅਤੇ ਕਾਂਗਰਸ ਸੱਚ ਅਤੇ ਸੰਵਿਧਾਨ ਦੀ ਰੱਖਿਆ ਕਰਦੀ ਰਹੇਗੀ। ਰਾਹੁਲ ਗਾਂਧੀ ਦੀ 'ਵੋਟਰ ਅਧਿਕਾਰ ਯਾਤਰਾ' ਨਾਲ ਸਬੰਧਤ ਇੱਕ ਮੰਚ ਤੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਸਵਰਗੀ ਮਾਂ ਲਈ ਅਪਮਾਨਜਨਕ ਭਾਸ਼ਾ ਦੀ ਵਰਤੋਂ ਦੇ ਵਿਰੋਧ ਵਿੱਚ ਪਟਨਾ ਵਿੱਚ ਭਾਜਪਾ ਵੱਲੋਂ ਕੱਢੇ ਮਾਰਚ ਦੌਰਾਨ ਸ਼ੁੱਕਰਵਾਰ ਨੂੰ ਭਾਜਪਾ ਤੇ ਕਾਂਗਰਸ ਵਰਕਰਾਂ 'ਚ ਝੜਪ ਹੋ ਗਈ।
ਭਾਜਪਾ ਵਰਕਰਾਂ ਨੇ ਦਰਭੰਗਾ ਵਿੱਚ ਪ੍ਰਧਾਨ ਮੰਤਰੀ ਮੋਦੀ ਦੀ ਸਵਰਗਵਾਸ ਮਾਂ ਲਈ ਅਪਮਾਨਜਨਕ ਭਾਸ਼ਾ ਦੀ ਵਰਤੋਂ ਦੀ ਘਟਨਾ ਦੇ ਵਿਰੋਧ ਵਿੱਚ ਨਾਅਰੇਬਾਜ਼ੀ ਕਰਦੇ ਹੋਏ ਸੂਬਾ ਕਾਂਗਰਸ ਕਮੇਟੀ ਦੇ ਮੁੱਖ ਦਫ਼ਤਰ ਸਦਾਕਤ ਆਸ਼ਰਮ ਤੱਕ ਮਾਰਚ ਕੱਢਿਆ। ਕਾਂਗਰਸ ਦਾ ਦੋਸ਼ ਹੈ ਕਿ ਭਾਜਪਾ ਵਰਕਰਾਂ ਨੇ ਸਦਾਕਤ ਆਸ਼ਰਮ ਦੀ ਭੰਨਤੋੜ ਕੀਤੀ ਅਤੇ ਇਸਦੇ ਵਰਕਰਾਂ 'ਤੇ ਹਮਲਾ ਕੀਤਾ।
'ਵੋਟਰ ਅਧਿਕਾਰ ਯਾਤਰਾ' ਦੀ ਅਗਵਾਈ ਕਰ ਰਹੇ ਰਾਹੁਲ ਗਾਂਧੀ ਨੇ 'ਐਕਸ' 'ਤੇ ਪੋਸਟ ਕੀਤਾ, "ਸੱਚ ਅਤੇ ਅਹਿੰਸਾ ਦੇ ਸਾਹਮਣੇ ਝੂਠ ਅਤੇ ਹਿੰਸਾ ਟਿਕ ਨਹੀਂ ਸਕਦੀ। ਮਾਰੋ ਅਤੇ ਤੋੜੋ, ਜਿੰਨਾ ਮਾਰਨਾ-ਤੋੜਨਾ ਹੈ, ਅਸੀਂ ਸੱਚ ਅਤੇ ਸੰਵਿਧਾਨ ਦੀ ਰੱਖਿਆ ਕਰਦੇ ਰਹਾਂਗੇ। ਸਤਯਮੇਵ ਜਯਤੇ।" ਦੱਸ ਦੇਈਏ ਕਿ ਅੱਜ ਰਾਹੁਲ ਗਾਂਧੀ ਦੀ ਯਾਤਰਾ ਦਾ 13ਵਾਂ ਦਿਨ ਹੈ। ਇਹ ਸ਼ੁੱਕਰਵਾਰ ਸਵੇਰੇ ਬੇਤੀਆ (ਪੱਛਮੀ ਚੰਪਾਰਨ) ਤੋਂ ਸ਼ੁਰੂ ਹੋਈ ਅਤੇ ਦੁਪਹਿਰ ਨੂੰ ਗੋਪਾਲਗੰਜ ਪਹੁੰਚੀ ਹੈ।