ਚੰਡੀਗੜ੍ਹ : ਦੂਰਸੰਚਾਰ ਵਿਭਾਗ ਅਤੇ ਭਾਰਤ ਸੰਚਾਰ ਨਿਗਮ ਲਿਮਟਿਡ (BSNL) ਨੇ ਆਪਣੇ ਪੈਨਸ਼ਨਰਜ਼ ਨੂੰ ਸਾਈਬਰ ਧੋਖਾਧੜੀ ਦੇ ਵੱਧ ਰਹੇ ਮਾਮਲਿਆਂ ਪ੍ਰਤੀ ਸੁਚੇਤ ਰਹਿਣ ਦੀ ਅਪੀਲ ਜਾਰੀ ਕੀਤੀ ਹੈ। ਵਿਭਾਗ ਨੇ ਸਪੱਸ਼ਟ ਕੀਤਾ ਹੈ ਕਿ ਕੋਈ ਵੀ ਦੂਰਸੰਚਾਰ ਅਧਿਕਾਰੀ ਸੋਸ਼ਲ ਮੀਡੀਆ, ਫੋਨ ਕਾਲਾਂ, ਐੱਸਐੱਮਐੱਸ ਜਾਂ WhatsApp ਰਾਹੀਂ ਗੁਪਤ ਜਾਣਕਾਰੀ ਜਿਵੇਂ ਬੈਂਕ ਵੇਰਵੇ, ਓਟੀਪੀ, ਪਾਸਵਰਡ ਜਾਂ ਨਿੱਜੀ ਡੇਟਾ ਨਹੀਂ ਮੰਗਦਾ।
ਹਾਲ ਦੇ ਦਿਨਾਂ ਵਿੱਚ ਸਾਹਮਣੇ ਆਏ ਮਾਮਲਿਆਂ ਅਨੁਸਾਰ, ਕੁਝ ਸਾਈਬਰ ਧੋਖੇਬਾਜ ਦੂਰਸੰਚਾਰ ਵਿਭਾਗ ਦੇ ਅਧਿਕਾਰੀਆਂ ਦੇ ਨਾਮ ‘ਤੇ ਜਾਅਲੀ ਫੋਨ ਕਾਲਾਂ ਅਤੇ ਸੁਨੇਹੇ ਭੇਜ ਰਹੇ ਹਨ। ਉਹ ਪੀਪੀਓ (ਪੈਨਸ਼ਨ ਪੇਮੈਂਟ ਆਰਡਰ) ਅਪਡੇਟਸ, ਕੇਵਾਈਸੀ ਵੈਰੀਫਿਕੇਸ਼ਨ, ਜਾਂ ਵਾਧੂ ਪੈਨਸ਼ਨ ਲਾਭਾਂ ਦੇ ਬਹਾਨੇ ਪੈਨਸ਼ਨਰਜ਼ ਤੋਂ ਉਨ੍ਹਾਂ ਦੀ ਨਿਜੀ ਅਤੇ ਵਿੱਤੀ ਜਾਣਕਾਰੀ ਪ੍ਰਾਪਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਵਿਭਾਗ ਨੇ ਪੈਨਸ਼ਨਰਜ਼ ਨੂੰ ਸੂਚਿਤ ਕੀਤਾ ਹੈ ਕਿ ਪੀਪੀਓ ਜਾਂ ਸੇਵਾ ਰਿਕਾਰਡਾਂ ਨੂੰ ਅਪਡੇਟ ਕਰਨ ਲਈ ਕੋਈ ਲਿੰਕ ਜਾਂ ਸੁਨੇਹੇ ਨਹੀਂ ਭੇਜੇ ਜਾਂਦੇ ਹਨ।
ਦੂਰ ਸੰਚਾਰ ਵਿਭਾਗ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਕਿਹਾ, “ਸਾਡੇ ਪੈਨਸ਼ਨਰਜ਼ ਸਾਡੇ ਲਈ ਪਰਿਵਾਰ ਦੇ ਮੈਂਬਰ ਸਮਾਨ ਹਨ। ਅਸੀਂ ਉਨ੍ਹਾਂ ਨੂੰ ਸਲਾਹ ਦਿੰਦੇ ਹਾਂ ਕਿ ਉਹ ਅਜਿਹੀ ਕੋਈ ਵੀ ਸ਼ੱਕੀ ਗਤੀਵਿਧੀ ‘ਤੇ ਤੁਰੰਤ ਧਿਆਨ ਦੇਣ ਅਤੇ ਆਪਣੇ ਪਰਿਵਾਰ ਦੇ ਮੈਂਬਰਾਂ ਨੂੰ ਵੀ ਜਾਗਰੂਕ ਕਰਨ। ਜਾਗਰੂਕਤਾ ਹੀ ਸੁਰੱਖਿਆ ਦਾ ਸਭ ਤੋਂ ਵੱਡਾ ਹਥਿਆਰ ਹੈ।”
ਪੈਨਸ਼ਨਰਜ਼ ਲਈ ਮਹੱਤਵਪੂਰਨ ਸਲਾਹ:
ਕਿਸੇ ਵੀ ਕਾਲ, ਐੱਸਐੱਮਐੱਸ, WhatsApp, ਜਾਂ ਸੋਸ਼ਲ ਮੀਡੀਆ ਮੈਸੇਜ਼ 'ਤੇ ਗੁਪਤ ਜਾਣਕਾਰੀ ਸਾਂਝੀ ਨਾ ਕਰੋ।
ਸ਼ੱਕੀ ਕਾਲਾਂ ਜਾਂ ਮੈਸੇਜ਼ ਦੀ ਸੂਚਨਾ ਤੁਰੰਤ ਸਥਾਨਕ ਪੁਲਿਸ ਸਾਈਬਰ ਸੈੱਲ, ਸਬੰਧਿਤ ਪ੍ਰਸ਼ਾਸਨਿਕ ਦਫ਼ਤਰ, ਜਾਂ ਵਿਭਾਗ ਦੇ ਟੋਲ-ਫ੍ਰੀ ਨੰਬਰਾਂ 1800-180-2089 ਅਤੇ 1800-180-2090 'ਤੇ ਰਿਪੋਰਟ ਕਰੋ।
ਦੂਰ ਸੰਚਾਰ ਵਿਭਾਗ ਸਾਰੇ ਪੈਨਸ਼ਨਰਜ਼ ਨੂੰ ਅਪੀਲ ਕਰਦਾ ਹੈ ਕਿ ਉਹ ਸਾਵਧਾਨੀ ਵਰਤਣ ਅਤੇ ਧੋਖੇਬਾਜਾਂ ਦੇ ਜਾਲ ਵਿੱਚ ਨਾ ਫਸਣ। ਵਧੇਰੇ ਜਾਣਕਾਰੀ ਲਈ ਅਧਿਕਾਰਿਤ ਵੈੱਬਸਾਈਟ ਜਾਂ ਅਧਿਕ੍ਰਿਤ ਚੈਨਲਾਂ ਦੀ ਵਰਤੋਂ ਕਰਨ।
ਸੰਚਾਰ ਮੰਤਰਾਲਾ, ਦੂਰ ਸੰਚਾਰ ਵਿਭਾਗ ਦੇ ਅਧੀਨ ਕੰਟਰੋਲਰ ਆਫ਼ ਕਮਿਊਨੀਕੇਸ਼ਨ ਅਕਾਊਂਟਸ (ਸੀਸੀਏ), ਪੰਜਾਬ ਟੈਲੀਕੌਮ ਸਰਕਲ ਦਾ ਦਫ਼ਤਰ, ਚੰਡੀਗੜ੍ਹ, ਪੰਜਾਬ ਰਾਜ ਲਈ ਨੋਡਲ ਦਫ਼ਤਰ ਵਜੋਂ ਕੰਮ ਕਰਦਾ ਹੈ।