ਭਾਰਤ ਦੇ ਸਰਵਿਸ ਸੈਕਟਰ ’ਚ ਜਨਵਰੀ ’ਚ ਵੀ ਵਾਧਾ ਦਰਜ ਕੀਤਾ ਗਿਆ। ਮੰਗ ’ਚ ਮਜ਼ਬੂਤੀ, ਨਵੇਂ ਕਾਰੋਬਾਰ ’ਚ ਵਾਧੇ ਅਤੇ ਟੈਕਨਾਲੋਜੀ ’ਚ ਨਿਵੇਸ਼ ਕਾਰਨ ਕੁੱਲ ਵਾਧਾ ਮਜ਼ਬੂਤ ਬਣਿਆ ਰਿਹਾ। ਐੱਚ. ਐੱਸ. ਬੀ. ਸੀ. ਇੰਡੀਆ ਸਰਵਿਸਿਜ਼ ਪ੍ਰਚੇਜ਼ਿੰਗ ਮੈਨੇਜਰਜ਼ ਇੰਡੈਕਸ (ਪੀ. ਐੱਮ. ਆਈ.) ਦਸੰਬਰ 2025 ’ਚ 58.0 ਤੋਂ ਮਾਮੂਲੀ ਵਧ ਕੇ ਜਨਵਰੀ ’ਚ 58.5 ’ਤੇ ਪਹੁੰਚ ਗਿਆ। ਸੂਚਕ ਅੰਕ 50 ਦੇ ਨਿਰਪੱਖ ਪੱਧਰ ਤੋਂ ਕਾਫ਼ੀ ਉੱਪਰ ਰਿਹਾ। ਇਹ ਵਾਧੇ ਅਤੇ ਘਾਟੇ (ਕੰਟਰੈਕਸ਼ਨ) ਵਿਚਲੇ ਫਰਕ ਨੂੰ ਦਰਸਾਉਂਦਾ ਹੈ।
ਐੱਚ. ਐੱਸ. ਬੀ. ਸੀ. ’ਚ ਭਾਰਤ ਦੇ ਮੁੱਖ ਅਰਥਸ਼ਾਸਤਰੀ ਪ੍ਰਾਂਜੁਲ ਭੰਡਾਰੀ ਨੇ ਕਿਹਾ, “ਜਨਵਰੀ ’ਚ ਭਾਰਤ ਦਾ ਸਰਵਿਸ ਪੀ. ਐੱਮ. ਆਈ. 58.5 ’ਤੇ ਪਹੁੰਚ ਗਿਆ, ਜੋ ਦਸੰਬਰ ਦੇ 58.0 ਦੇ ਮੁਕਾਬਲੇ ਵੱਧ ਹੈ ਅਤੇ ਇਹ ਖੇਤਰ ’ਚ ਨਿਰੰਤਰ ਰਫਤਾਰ ਦਾ ਸੰਕੇਤ ਦਿੰਦਾ ਹੈ। ਉਤਪਾਦਨ ’ਚ ਮਜ਼ਬੂਤ ਵਾਧਾ ਨਵੇਂ ਆਰਡਰਾਂ ਦੀ ਲਗਾਤਾਰ ਆਮਦ ਕਾਰਨ ਹੋਇਆ। ਇਸ ’ਚ ਦੱਖਣ ਅਤੇ ਦੱਖਣ-ਪੂਰਬੀ ਏਸ਼ੀਆ ਤੋਂ ਵਧੀ ਅੰਤਰਰਾਸ਼ਟਰੀ ਮੰਗ ਵੀ ਸ਼ਾਮਲ ਹੈ।”
ਉਨ੍ਹਾਂ ਕਿਹਾ, “ਕੁਸ਼ਲਤਾ ’ਚ ਸੁਧਾਰ, ਪ੍ਰਭਾਵਸ਼ਾਲੀ ਮਾਰਕੀਟਿੰਗ ਅਤੇ ਨਵੇਂ ਗਾਹਕਾਂ ਦੇ ਜੁੜਨ ਨਾਲ ਕਾਰੋਬਾਰੀ ਭਰੋਸਾ ਤਿੰਨ ਮਹੀਨਿਆਂ ਦੇ ਉੱਚੇ ਪੱਧਰ ’ਤੇ ਪਹੁੰਚ ਗਿਆ। ਹਾਲਾਂਕਿ ਇਨਪੁੱਟ ਅਤੇ ਆਉਟਪੁੱਟ ਕੀਮਤਾਂ ’ਚ ਵਾਧਾ ਹੋ ਰਿਹਾ ਹੈ ਪਰ ਇਤਿਹਾਸਕ ਮਾਪਦੰਡਾਂ ਦੇ ਲਿਹਾਜ਼ ਨਾਲ ਇਹ ਅਜੇ ਵੀ ਕਾਫ਼ੀ ਸੀਮਤ ਹੈ। ਜਨਵਰੀ ’ਚ ਕੰਪੋਜ਼ਿਟ ਪੀ. ਐੱਮ. ਆਈ. ’ਚ ਵੀ ਮਜ਼ਬੂਤੀ ਆਈ। ਇਹ ਮੈਨੂਫੈਕਚਰਿੰਗ ਅਤੇ ਸਰਵਿਸ ਦੋਵਾਂ ਸੈਕਟਰਾਂ ’ਚ ਠੋਸ ਮੰਗ ਵਾਧੇ ਨੂੰ ਦਰਸਾਉਂਦਾ ਹੈ।”
ਮੈਨੂਫੈਕਚਰਿੰਗ ਪੀ. ਐੱਮ. ਆਈ. ’ਚ ਸੁਧਾਰ
ਭਾਰਤ ਦਾ ਮੈਨੂਫੈਕਚਰਿੰਗ ਸੈਕਟਰ ਜਨਵਰੀ ’ਚ ਵੀ ਵਾਧਾ ਕਰਦਾ ਰਿਹਾ। ਐੱਚ. ਐੱਸ. ਬੀ. ਸੀ. ਮੈਨੂਫੈਕਚਰਿੰਗ ਪ੍ਰਚੇਜ਼ਿੰਗ ਮੈਨੇਜਰਜ਼ ਇੰਡੈਕਸ (ਪੀ. ਐੱਮ. ਆਈ.) ਦਸੰਬਰ 2025 ਦੇ 55.0 ਦੇ ਮੁਕਾਬਲੇ ਜਨਵਰੀ ’ਚ ਮਾਮੂਲੀ ਵਧ ਕੇ 55.4 ’ਤੇ ਪਹੁੰਚ ਗਿਆ। ਇਹ ਸੁਧਾਰ ਦਸੰਬਰ 2025 ’ਚ ਮੌਸਮੀ ਐਡਜਸਟਮੈਂਟ ਤੋਂ ਬਾਅਦ ਪੀ. ਐੱਮ. ਆਈ. ਦੇ ਦੋ ਸਾਲ ਦੇ ਹੇਠਲੇ ਪੱਧਰ ’ਤੇ ਪਹੁੰਚਣ ਤੋਂ ਬਾਅਦ ਦੇਖਣ ਨੂੰ ਮਿਲਿਆ, ਜੋ ਸੰਚਾਲਨ ਸਥਿਤੀਆਂ ’ਚ ਬਿਹਤਰ ਸੁਧਾਰ ਦਾ ਸੰਕੇਤ ਦਿੰਦਾ ਹੈ।
ਹਾਲਾਂਕਿ, ਇਹ ਅੰਕੜਾ ਜਨਵਰੀ ਦੇ ਅੰਤ ’ਚ ਜਾਰੀ ਕੀਤੇ ਗਏ ਫਲੈਸ਼ ਅੰਦਾਜ਼ੇ 56.8 ਤੋਂ ਘੱਟ ਰਿਹਾ ਪਰ ਇਹ ਹੁਣ ਵੀ ਲੰਮੀ ਮਿਆਦ ਦੀ ਔਸਤ ਤੋਂ ਉੱਪਰ ਬਣਿਆ ਹੋਇਆ ਹੈ।