ਨਵੀਂ ਦਿੱਲੀ : ਭਾਰਤ ਦੀ ਪ੍ਰਮੁੱਖ ਡਿਜੀਟਲ ਪੇਮੈਂਟ ਕੰਪਨੀ PhonePe ਲਈ ਇੱਕ ਵੱਡੀ ਤੇ ਰਾਹਤ ਭਰੀ ਖ਼ਬਰ ਸਾਹਮਣੇ ਆਈ ਹੈ। ਸੂਤਰਾਂ ਦੇ ਮੁਤਾਬਕ, ਕੰਪਨੀ ਨੂੰ ਆਪਣੇ IPO (Initial Public Offering) ਲਈ Securities and Exchange Board of India (SEBI) ਤੋਂ ਹਰੀ ਝੰਡੀ ਮਿਲ ਗਈ ਹੈ। ਇਹ ਭਾਰਤ ਦੇ ਫਿਨਟੈੱਕ ਖੇਤਰ ਵਿੱਚ ਹੁਣ ਤੱਕ ਦਾ ਸਭ ਤੋਂ ਵੱਧ ਉਡੀਕਿਆ ਜਾਣ ਵਾਲਾ IPO ਮੰਨਿਆ ਜਾ ਰਿਹਾ ਹੈ।
ਜਲਦ ਦਾਇਰ ਹੋਵੇਗਾ ਨਵਾਂ ਡਰਾਫਟ
ਮਿਲੀ ਜਾਣਕਾਰੀ ਅਨੁਸਾਰ, ਕੰਪਨੀ ਜਲਦ ਹੀ ਆਪਣਾ ਅਪਡੇਟਿਡ ਡਰਾਫਟ ਰੈੱਡ ਹੇਰਿੰਗ ਪ੍ਰਾਸਪੈਕਟਸ (UDRHP) ਦਾਇਰ ਕਰੇਗੀ। ਖਾਸ ਗੱਲ ਇਹ ਹੈ ਕਿ ਇਹ IPO ਪੂਰੀ ਤਰ੍ਹਾਂ ਮੌਜੂਦਾ ਸ਼ੇਅਰਧਾਰਕਾਂ ਵੱਲੋਂ 'ਆਫਰ ਫਾਰ ਸੇਲ' (OFS) ਹੋਵੇਗਾ, ਜਿਸਦਾ ਮਤਲਬ ਹੈ ਕਿ ਕੰਪਨੀ ਇਸ ਰਾਹੀਂ ਕੋਈ ਵਾਧੂ ਪ੍ਰਾਇਮਰੀ ਪੂੰਜੀ ਨਹੀਂ ਜੁਟਾਏਗੀ।
ਡਿਜੀਟਲ ਪੇਮੈਂਟ ਬਾਜ਼ਾਰ ’ਚ ਵੱਡਾ ਦਬਦਬਾ
PhonePe ਇਸ ਸਮੇਂ ਭਾਰਤ ਦੇ ਡਿਜੀਟਲ ਭੁਗਤਾਨ ਬਾਜ਼ਾਰ ਵਿੱਚ ਮੋਹਰੀ ਭੂਮਿਕਾ ਨਿਭਾ ਰਹੀ ਹੈ। UPI ਟ੍ਰਾਂਜੈਕਸ਼ਨਾਂ ਵਿੱਚ ਕੰਪਨੀ ਦੀ ਹਿੱਸੇਦਾਰੀ 45 ਫੀਸਦੀ ਤੋਂ ਵੀ ਵੱਧ ਹੈ। ਦਸੰਬਰ 2025 ਦੇ ਅੰਕੜਿਆਂ ਮੁਤਾਬਕ, ਕੰਪਨੀ ਨੇ ਇੱਕ ਮਹੀਨੇ ਵਿੱਚ 9.8 ਬਿਲੀਅਨ ਟ੍ਰਾਂਜੈਕਸ਼ਨਾਂ ਪ੍ਰੋਸੈਸ ਕੀਤੀਆਂ ਹਨ।
ਵਿੱਤੀ ਹਾਲਤ ’ਚ ਵੱਡਾ ਉਛਾਲ
ਵਿੱਤੀ ਸਾਲ 2024-25 ਦੌਰਾਨ ਕੰਪਨੀ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ 7,115 ਕਰੋੜ ਰੁਪਏ ਦੀ ਆਮਦਨ ਦਰਜ ਕੀਤੀ ਹੈ, ਜੋ ਪਿਛਲੇ ਸਾਲ ਦੇ ਮੁਕਾਬਲੇ 40 ਫੀਸਦੀ ਜ਼ਿਆਦਾ ਹੈ। ਇਸ ਤੋਂ ਇਲਾਵਾ, ਕੰਪਨੀ ਦਾ ਅਡਜਸਟਡ ਮੁਨਾਫਾ (PAT) ਵੀ ਤਿੰਨ ਗੁਣਾ ਵਧ ਕੇ 630 ਕਰੋੜ ਰੁਪਏ ਤੱਕ ਪਹੁੰਚ ਗਿਆ ਹੈ।
ਹੋਰ ਕੰਪਨੀਆਂ ਲਈ ਬਣੇਗਾ ਮਿਸਾਲ
PhonePe ਦੀ ਸ਼ੇਅਰ ਬਾਜ਼ਾਰ 'ਚ ਐਂਟਰੀ ਨਾ ਸਿਰਫ ਕੰਪਨੀ ਲਈ, ਸਗੋਂ ਭਾਰਤ ਦੇ ਪੂਰੇ ਡਿਜੀਟਲ ਪੇਮੈਂਟ ਸੈਕਟਰ ਲਈ ਇੱਕ ਨਵਾਂ ਮੀਲ ਪੱਥਰ ਸਾਬਤ ਹੋਵੇਗੀ। ਇਹ ਸੂਚੀਬੱਧਤਾ ਹੋਰ ਫਿਨਟੈੱਕ ਯੂਨੀਕੋਰਨ ਕੰਪਨੀਆਂ ਲਈ ਵੀ ਪਬਲਿਕ ਮਾਰਕੀਟ 'ਚ ਆਉਣ ਦਾ ਰਾਹ ਪੱਧਰਾ ਕਰ ਸਕਦੀ ਹੈ।