ਖਰੜ (ਪ੍ਰੀਤ ਪੱਤੀ) : ਭਾਜਪਾ ਦੇ ਸੂਬਾ ਦਫਤਰ ਸਹਿ ਖਜਾਨਚੀ ਅਤੇ ਸੀਨੀਅਰ ਆਗੂ ਸੁਖਵਿੰਦਰ ਸਿੰਘ ਗੋਲਡੀ ਅਤੇ ਭਾਜਪਾ ਮੰਡਲ ਪ੍ਰਧਾਨ ਖਰੜ ਰਾਕੇਸ਼ ਗੁਪਤਾ ਨੇ ਸ਼ਿਵਾਲਿਕ ਸਿਟੀ ਅਤੇ ਲਾਂਡਰਾਂ ਰੋਡ ਤੇ ਟੁੱਟੀਆਂ ਸੜਕਾਂ ਤੇ ਬਰਸਾਤੀ ਪਾਣੀ ਭਰਨ ਨਾਲ ਰੋਜਾਨਾ ਲੱਗਦੇ ਭਾਰੀ ਜਾਮ ਕਰਨ ਲੋਕਾਂ ਨੂੰ ਹੋ ਰਹੀ ਪਰੇਸ਼ਾਨੀ ਲਈ ਨਗਰ ਕੌਂਸਲ ਅਤੇ ਪ੍ਰਸਾਸਨ ਨੂੰ ਜਿੰਮੇਵਾਰ ਠਹਿਰਾਉਂਦਿਆਂ ਆਖਿਆ ਕਿ ਕਿੰਨੀ ਚਿੰਤਾ ਤੇ ਹੈਰਾਨੀ ਦੀ ਗੱਲ ਹੈ ਕਿ ਲੰਬੇ ਸਮੇਂ ਤੋਂ ਲੋਕਾਂ ਨੂੰ ਆ ਰਹੀ ਇਸ ਪਰੇਸ਼ਾਨੀ ਦਾ ਕੋਈ ਵੀ ਹੱਲ ਸਰਕਾਰ ਵੱਲੋਂ ਨਹੀਂ ਕੱਢਿਆ ਗਿਆ ਹੈ। ਉਹਨਾਂ ਦੱਸਿਆ ਕਿ ਸ਼ਿਵਾਲਿਕ ਸਿਟੀ ਵਿਖੇ ਨਗਰ ਕੌਂਸਲ ਅਤੇ ਸੀਵਰੇਜ ਦੀ ਪਾਈਪਾਂ ਪਾਉਣ ਲਈ ਸੜਕਾਂ ਪੁੱਟੀਆਂ ਗਈਆਂ ਸਨ। ਪਰ ਲੰਮਾ ਸਮਾਂ ਬੀਤਣ ਉਪਰੰਤ ਵੀ ਇਥੇ ਪ੍ਰੀਮਿਕਸ ਨਹੀਂ ਪਾਇਆ ਗਿਆ। ਲਾਂਡਰਾਂ ਰੋਡ ਅਤੇ ਸ਼ਿਵਾਲਿਕ ਸਿਟੀ ਵਿੱਚ ਬਰਸਾਤੀ ਪਾਣੀ ਦੇ ਨਿਕਾਸ ਦਾ ਉਚਿਤ ਪ੍ਰਬੰਧ ਨਾ ਹੋਣ ਕਾਰਨ ਹਾਲਾਤ ਹੋਰ ਖਰਾਬ ਹੋ ਗਏ ਹਨ। ਖਰੜ ਲਾਂਡਰਾਂ ਹਾਈਵੇ ਤੇ ਉਹ ਵੱਡੇ ਵੱਡੇ ਟੋਏ ਪੈ ਗਏ ਹਨ , ਮੀਹ ਪੈਣ ਉਪਰੰਤ ਜਿੱਥੇ ਬਰਸਾਤੀ ਪਾਣੀ ਭਰ ਜਾਂਦਾ ਹੈ। ਸੜਕ ਤੇ ਗੱਡੀਆਂ ਫਸਣ ਨਾਲ ਲੰਬਾ ਜਾਮ ਲੱਗਣਾ ਰੋਜ਼ ਦਾ ਕੰਮ ਹੈ , ਜਿਸ ਕਾਰਨ ਰਾਹਗੀਰਾਂ ਅਤੇ ਸ਼ਿਵਾਲਿਕ ਸਿਟੀ ਦੇ ਲੋਕਾਂ ਨੂੰ ਭਾਰੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ । ਸ਼ਿਵਾਲਿਕ ਸਿਟੀ ਦੇ ਵਸਨੀਕਾਂ ਅਤੇ ਹੋਰਨਾਂ ਲੋਕਾਂ ਨੂੰ ਆਪਣੇ ਘਰ, ਦਫਤਰ, ਦੁਕਾਨਾਂ, ਹਸਪਤਾਲ, ਤੇ ਹੋਰਨਾਂ ਥਾਵਾਂ ਤੇ ਜਾਣ ਲਈ ਰੋਜ਼ਾਨਾ ਕਈ ਘੰਟੇ ਜਦੋ ਜਹਿਦ ਕਰਨੀ ਪੈਂਦੀ ਹੈ। ਰੋਜ਼ਾਨਾ ਇਥੇ ਐਬੂਲੈਂਸ ਫਸ ਜਾਂਦੀ ਹਨ ਤੇ ਮਰੀਜ਼ਾਂ ਦੀ ਜਾਨ ਖਤਰੇ ਵਿੱਚ ਪੈ ਜਾਂਦੀ ਹੈ। ਸਮੱਸਿਆ ਦੇ ਹੱਲ ਦੀ ਮੰਗ ਕੱਢਣ ਲਈ ਲੋਕ ਇੱਥੇ ਕਈ ਵਾਰ ਜਾਮ ਲਗਾ ਚੁੱਕੇ ਹਨ ਪਰ ਇਸ ਦੇ ਕੋਈ ਅਸਰ ਨਹੀਂ ਹੋਇਆ ।