ਆਬੂਧਾਬੀ : ਰੂਸ ਅਤੇ ਯੂਕ੍ਰੇਨ ਵਿਚਾਲੇ ਯੁੱਧ ਰੋਕਣ ਲਈ ਅਮਰੀਕਾ ਦੀ ਵਿਚੋਲਗੀ ਵਿਚ ਮੰਗਲਵਾਰ ਨੂੰ ਅਬੂ ਧਾਬੀ ਵਿਚ 4 ਘੰਟਿਅਾਂ ਤੱਕ ਤਿੰਨ-ਪੱਖੀ ਵਾਰਤਾ ਹੋਈ। ‘ਵਾਈਟ ਹਾਊਸ’ ਨੇ ਗੱਲਬਾਤ ਸ਼ੁਰੂ ਹੋਣ ਤੋਂ ਪਹਿਲਾਂ ਕਿਹਾ ਕਿ ਆਬੂਧਾਬੀ ਵਿਚ 2 ਦਿਨ ਤੱਕ ਚੱਲਣ ਵਾਲੀ ਇਹ ਵਾਰਤਾ ਫਰਵਰੀ ਤੋਂ ਬਾਅਦ ਇਸ ਤਰ੍ਹਾਂ ਦੀ ਪਹਿਲੀ ਬੈਠਕ ਹੈ ਅਤੇ ਇਸ ਵਿਚ ਮੁੱਖ ਰੂਪ ਨਾਲ ਸੁਰੱਖਿਆ ਸਬੰਧੀ ਗਾਰੰਟੀ ’ਤੇ ਚਰਚਾ ਹੋਵੇਗੀ।
ਅਮਰੀਕਾ ਇਸ ਸਾਲ 3 ਗੇੜਾਂ ਦੀ ਗੱਲਬਾਤ ਹੋਣ ਤੋਂ ਬਾਅਦ ਰੂਸ ਅਤੇ ਯੂਕ੍ਰੇਨ ਵਿਚਾਲੇ ਯੁੱਧ ਰੋਕਣ ਲਈ ਫਿਰ ਤੋਂ ਯਤਨ ਕਰ ਰਿਹਾ ਹੈ। ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਯੂਰਪ ਦਾ ਇਹ ਸਭ ਤੋਂ ਵੱਡਾ ਸੰਘਰਸ਼ 24 ਫਰਵਰੀ 2022 ਨੂੰ ਰੂਸ ਵਲੋਂ ਯੂਕ੍ਰੇਨ ’ਤੇ ਹਮਲਾ ਕੀਤੇ ਜਾਣ ਤੋਂ ਬਾਅਦ ਸ਼ੁਰੂ ਹੋਇਆ ਸੀ। ਯੂਕ੍ਰੇਨ ਦੀ ਵਿਦੇਸ਼ੀ ਖ਼ੁਫ਼ੀਆ ਸੇਵਾ ਦੇ ਪ੍ਰੈੱਸ ਦਫ਼ਤਰ ਅਨੁਸਾਰ ਗੱਲਬਾਤ ਬੁੱਧਵਾਰ ਨੂੰ ਫਿਰ ਸ਼ੁਰੂ ਹੋਣ ਦੀ ਉਮੀਦ ਹੈ। ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਜਵਾਈ ਜੈਰੇਡ ਕੁਸ਼ਨਰ ਨੇ ਸੋਸ਼ਲ ਮੀਡੀਆ ਮੰਚ ‘ਐਕਸ’ ’ਤੇ ਕਿਹਾ ਕਿ ਉਹ ਅਤੇ ਅਮਰੀਕਾ ਦੇ ਇਕ ਹੋਰ ਦੂਤ ਸਟੀਵ ਵਿਟਕੌਫ਼ ਗੱਲਬਾਤ ਰਾਹੀਂ ਅਜਿਹਾ ਹੱਲ ਕੱਢਣ ਲਈ ਕੰਮ ਕਰ ਰਹੇ ਹਨ, ਜਿਸ ਨਾਲ ਸਥਾਈ ਸ਼ਾਂਤੀ ਸਥਾਪਿਤ ਹੋ ਸਕੇ।