ਭਾਰਤੀ ਏਅਰਲਾਈਨ ਕੰਪਨੀ ਅਕਾਸਾ ਏਅਰ ਨੇ ਵੀ ਫਲਾਈਟ ਟਿਕਟ ਦੀਆਂ ਕੀਮਤਾਂ ’ਚ ਵਾਧੇ ਦਾ ਐਲਾਨ ਕਰ ਦਿੱਤਾ ਹੈ। ਅਕਾਸਾ ਏਅਰ ਨੇ ਦੱਸਿਆ ਕਿ ਉਹ ਸਾਰੀਆਂ ਘਰੇਲੂ ਅਤੇ ਕੌਮਾਂਤਰੀ ਫਲਾਈਟਾਂ ਲਈ ਯਾਤਰੀਆਂ ਤੋਂ ਹਰੇਕ ਸੀਟ ਲਈ 199 ਤੋਂ ਲੈ ਕੇ 1300 ਰੁਪਏ ਤੱਕ ਦਾ ਫਿਊਲ ਸਰਚਾਰਜ ਵਸੂਲੇਗੀ।
ਏਅਰਲਾਈਨ ਕੰਪਨੀ ਨੇ ਦੱਸਿਆ ਕਿ 15 ਮਾਰਚ ਨੂੰ ਰਾਤ 12.01 ਵਜੇ ਤੋਂ ਬੁੱਕ ਕੀਤੀਆਂ ਜਾਣ ਵਾਲੀਆਂ ਸਾਰੀਆਂ ਫਲਾਈਟਾਂ ਦੀਆਂ ਟਿਕਟਾਂ ਦੇ ਨਾਲ ਇਹ ਫਿਊਲ ਸਰਚਾਰਜ ਵਸੂਲਿਆ ਜਾਵੇਗਾ। ਦੱਸਣਯੋਗ ਕਿ ਮੱਧ ਪੂਰਬ ’ਚ ਜਾਰੀ ਭਾਰੀ ਤਣਾਅ ਕਾਰਨ ਐਵੀਏਸ਼ਨ ਟਰਬਾਈਨ ਫਿਊਲ (ਏ. ਟੀ. ਐੱਫ.) ਦੀਆਂ ਕੀਮਤਾਂ ’ਚ ਕਾਫੀ ਵਾਧਾ ਹੋਇਆ ਹੈ, ਜਿਸ ਦੇ ਕਾਰਨ ਏਅਰਲਾਈਨ ਕੰਪਨੀ ਨੇ ਕਿਰਾਏ ’ਚ ਫਿਊਲ ਸਰਚਾਰਜ ਜੋੜਨ ਦਾ ਫੈਸਲਾ ਕੀਤਾ ਹੈ।
ਏਅਰਲਾਈਨ ਕੰਪਨੀ ਦੇ ਕੁੱਲ ਖਰਚੇ ’ਚ ਸ਼ਾਮਲ ਹੁੰਦਾ ਹੈ ਫਿਊਲ ਦਾ ਵੱਡਾ ਹਿੱਸਾ
ਕਿਸੇ ਵੀ ਏਅਰਲਾਈਨ ਕੰਪਨੀ ਦੇ ਕੁੱਲ ਆਪ੍ਰੇਸ਼ਨ ਖਰਚਿਆਂ ’ਚ ਫਿਊਲ ਦਾ ਹਿੱਸਾ ਕਾਫੀ ਵੱਡਾ ਅਤੇ ਅਹਿਮ ਹੁੰਦਾ ਹੈ। ਅਜਿਹੇ ’ਚ ਏ. ਟੀ. ਐੱਫ. ਦੀਆਂ ਕੀਮਤਾਂ ਵਧਣ ਨਾਲ ਏਅਰਲਾਈਨ ਕੰਪਨੀਆਂ ’ਤੇ ਕਾਫੀ ਦਬਾਅ ਪੈ ਰਿਹਾ ਸੀ। ਅਕਾਸਾ ਏਅਰ ਤੋਂ ਪਹਿਲਾਂ, ਦੇਸ਼ ਦੀਆਂ 2 ਹੋਰ ਪ੍ਰਮੁੱਖ ਏਅਰਲਾਈਨ ਕੰਪਨੀਆਂ ਏਅਰ ਇੰਡੀਆ ਅਤੇ ਇੰਡੀਗੋ ਵੀ ਆਪਣੇ ਯਾਤਰੀਆਂ ਤੋਂ ਫਿਊਲ ਸਰਚਾਰਜ ਵਸੂਲ ਰਹੀਆਂ ਹਨ। ਇਸ ਮਾਮਲੇ ’ਚ, ਏਅਰ ਇੰਡੀਆ ਨੇ ਸਭ ਤੋਂ ਪਹਿਲਾਂ ਫਿਊਲ ਸਰਚਾਰਜ ਲਾਉਣ ਦਾ ਐਲਾਨ ਕੀਤਾ ਸੀ। ਜਿਸ ਤੋਂ ਬਾਅਦ, ਇੰਡੀਗੋ ਨੇ ਸ਼ੁੱਕਰਵਾਰ ਨੂੰ ਹੀ ਫਿਊਲ ਚਾਰਜ ਦਾ ਐਲਾਨ ਕੀਤਾ ਸੀ। ਏਅਰ ਇੰਡੀਆ 12 ਮਾਰਚ ਤੋਂ ਹੀ ਫਲਾਈਟ ਟਿਕਟ ਨਾਲ 399 ਤੋਂ 8332 ਰੁਪਏ ਤੱਕ ਦਾ ਫਿਊਲ ਸਰਚਾਰਜ ਵਸੂਲ ਰਹੀ ਹੈ। ਉਥੇ ਹੀ, ਇੰਡੀਗੋ 14 ਮਾਰਚ ਤੋਂ ਫਲਾਈਟ ਟਿਕਟ ’ਤੇ 425 ਤੋਂ 2300 ਰੁਪਏ ਤੱਕ ਦਾ ਫਿਊਲ ਸਰਚਾਰਜ ਲੈ ਰਹੀ ਹੈ।