NCERT ਨੇ ਮੁੱਖ ਤੌਰ 'ਤੇ ਦੋ ਮਾਡਿਊਲ ਜਾਰੀ ਕੀਤੇ ਹਨ। ਇਕ ਮਾਡਿਊਲ ਵਿਚ ਆਪ੍ਰੇਸ਼ਨ ਸਿੰਦੂਰ ਬਾਰੇ ਵਿਸਥਾਰ ਨਾਲ ਦੱਸਿਆ ਜਾਵੇਗਾ। ਇਹ ਪ੍ਰਾਇਮਰੀ ਮਾਡਿਊਲ ਤੀਜੀ ਤੋਂ ਬਾਰ੍ਹਵੀਂ ਜਮਾਤ ਦੇ ਵਿਦਿਆਰਥੀਆਂ ਲਈ ਪੂਰਕ ਸਮੱਗਰੀ ਵਜੋਂ ਸ਼ਾਮਲ ਕੀਤਾ ਜਾਵੇਗਾ।
ਦੂਜਾ ਸੈਕੰਡਰੀ ਮਾਡਿਊਲ ਹੈ ਜੋ ਨੌਵੀਂ ਤੋਂ ਬਾਰ੍ਹਵੀਂ ਜਮਾਤ ਦੇ ਵਿਦਿਆਰਥੀਆਂ ਲਈ ਹੋਵੇਗਾ। ਇਹ ਮਾਡਿਊਲ ਸੰਵਾਦ ਅਧਾਰਤ ਹੈ, ਯਾਨੀ ਕਿ ਆਪ੍ਰੇਸ਼ਨ ਸਿੰਦੂਰ ਬਾਰੇ ਜਾਣਕਾਰੀ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਵਿਚਕਾਰ ਗੱਲਬਾਤ ਰਾਹੀਂ ਦਿੱਤੀ ਜਾਂਦੀ ਹੈ। ਇਸ ਦੇ ਨਾਲ ਹੀ ਮਾਡਿਊਲ ਵਿੱਚ ਧਾਰਾ 370 ਦਾ ਵੀ ਜ਼ਿਕਰ ਹੈ, ਜਿਸਨੂੰ 2019 ਵਿੱਚ ਰੱਦ ਕਰ ਦਿੱਤਾ ਗਿਆ ਸੀ। ਇਸ ਵਿਚ ਦੱਸਿਆ ਗਿਆ ਹੈ ਕਿ ਧਾਰਾ 370 ਨੂੰ ਹਟਾਉਣ ਤੋਂ ਬਾਅਦ, ਕਸ਼ਮੀਰ ਵਿੱਚ ਵਿਕਾਸ ਹੋਇਆ। ਰੇਲਵੇ ਨੈੱਟਵਰਕ ਦਾ ਵੀ ਵਿਕਾਸ ਹੋਇਆ। ਵੱਡੀ ਗਿਣਤੀ ਵਿੱਚ ਸੈਲਾਨੀ ਕਸ਼ਮੀਰ ਆ ਰਹੇ ਸਨ। ਘਾਟੀ ਵਿੱਚ ਸ਼ਾਂਤੀ ਸੀ। ਪਰ ਇਹ ਸਭ ਗੁਆਂਢੀ ਦੇਸ਼ ਪਾਕਿਸਤਾਨ ਨੂੰ ਪਸੰਦ ਨਹੀਂ ਆਇਆ ਅਤੇ ਇਸੇ ਕਰਕੇ ਪਾਕਿਸਤਾਨ ਨੇ 22 ਅਪ੍ਰੈਲ 2025 ਨੂੰ ਪਹਿਲਗਾਮ ਵਿੱਚ ਅੱਤਵਾਦੀ ਹਮਲਾ ਕੀਤਾ। ਇਸ ਵਿੱਚ 26 ਲੋਕਾਂ ਦੀ ਜਾਨ ਚਲੀ ਗਈ।
ਪਹਿਲਗਾਮ ਹਮਲੇ ਬਾਰੇ, ਮਾਡਿਊਲ ਵਿੱਚ ਕਿਹਾ ਗਿਆ ਹੈ ਕਿ ਟੀਆਰਐਫ (ਦਿ ਰੇਜ਼ਿਸਟੈਂਸ ਫਰੰਟ) ਨੇ ਪਹਿਲਾਂ ਜ਼ਿੰਮੇਵਾਰੀ ਲਈ ਸੀ। ਪਰ ਚਾਰ ਦਿਨ ਬਾਅਦ ਇਸ ਤੋਂ ਇਨਕਾਰ ਕਰ ਦਿੱਤਾ। ਪਰ ਭਾਰਤੀ ਜਾਂਚ ਏਜੰਸੀ ਐਨਆਈਏ ਨੇ ਠੋਸ ਸਬੂਤਾਂ ਦੇ ਆਧਾਰ 'ਤੇ ਕਿਹਾ ਕਿ ਟੀਆਰਐਫ ਹਮਲੇ ਪਿੱਛੇ ਸੀ। ਭਾਰਤੀ ਏਜੰਸੀਆਂ ਨੇ ਪਾਇਆ ਕਿ ਇਹ ਹਮਲਾ ਪਾਕਿਸਤਾਨ ਦੀ ਆਈਐਸਆਈ ਅਤੇ ਲਸ਼ਕਰ-ਏ-ਤੋਇਬਾ (ਐਲਈਟੀ) ਦੀ ਇੱਕ ਯੋਜਨਾਬੱਧ ਸਾਜ਼ਿਸ਼ ਸੀ। ਇਸਦਾ ਸਿੱਧਾ ਹੁਕਮ ਪਾਕਿਸਤਾਨ ਦੀ ਫੌਜੀ ਅਤੇ ਰਾਜਨੀਤਿਕ ਲੀਡਰਸ਼ਿਪ ਨੇ ਦਿੱਤਾ ਸੀ।
ਮਾਡਿਊਲ ਅਨੁਸਾਰ, ਆਪ੍ਰੇਸ਼ਨ ਸਿੰਦੂਰ ਇਸ ਕਾਇਰਾਨਾ ਹਮਲੇ ਦਾ ਇੱਕ ਸਖ਼ਤ ਅਤੇ ਸਪੱਸ਼ਟ ਜਵਾਬ ਸੀ। ਇਹ ਇੱਕ ਸਪੱਸ਼ਟ ਸੰਦੇਸ਼ ਸੀ ਜਿਸਨੇ ਦੁਨੀਆ ਨੂੰ ਦੱਸਿਆ ਕਿ ਭਾਰਤ ਆਪਣੇ ਲੋਕਾਂ ਅਤੇ ਕਦਰਾਂ-ਕੀਮਤਾਂ ਦੀ ਰੱਖਿਆ ਕਰੇਗਾ। ਮਾਡਿਊਲ ਵਿੱਚ ਕਿਹਾ ਗਿਆ ਹੈ ਕਿ ਸ਼ਹੀਦ ਫੌਜੀਆਂ ਦੀਆਂ ਪਤਨੀਆਂ ਦੀ ਕੁਰਬਾਨੀ ਅਤੇ ਦਰਦ ਨੂੰ ਸਲਾਮ ਕਰਨ ਲਈ ਇਸ ਆਪ੍ਰੇਸ਼ਨ ਦਾ ਨਾਮ 'ਸਿੰਦੂਰ' ਰੱਖਿਆ ਗਿਆ ਸੀ।