ਦਸੰਬਰ 2025 ’ਚ ਦੇਸ਼ ਦੀ ਥੋਕ ਮਹਿੰਗਾਈ ਦਰ (ਡਬਲਿਊ. ਪੀ. ਆਈ.) ਵਧ ਕੇ 0.83 ਫ਼ੀਸਦੀ ਹੋ ਗਈ ਹੈ। ਇਹ ਲਗਾਤਾਰ ਦੂਜਾ ਮਹੀਨਾ ਹੈ, ਜਦੋਂ ਥੋਕ ਮਹਿੰਗਾਈ ’ਚ ਵਾਧਾ ਦਰਜ ਕੀਤਾ ਗਿਆ ਹੈ। ਸਰਕਾਰੀ ਅੰਕੜਿਆਂ ਮੁਤਾਬਕ ਖਾਣ-ਪੀਣ ਦੀਆਂ ਚੀਜ਼ਾਂ, ਗੈਰ-ਖੁਰਾਕੀ ਵਸਤਾਂ ਅਤੇ ਮੈਨੂਫੈਕਚਰਿੰਗ ਉਤਪਾਦਾਂ ਦੇ ਮੁੱਲ ਵਧਣ ਨਾਲ ਇਹ ਵਾਧਾ ਹੋਇਆ ਹੈ।
ਪਿਛਲੇ ਦੋ ਮਹੀਨਿਆਂ ’ਚ ਥੋਕ ਮਹਿੰਗਾਈ ਨੇ ਨੈਗੇਟਿਵ ਰੁਖ਼ ਵਿਖਾਇਆ ਸੀ। ਅਕਤੂਬਰ 2025 ’ਚ ਥੋਕ ਮਹਿੰਗਾਈ -1.21 ਫ਼ੀਸਦੀ ਅਤੇ ਨਵੰਬਰ ’ਚ - 0.32 ਫੀਸਦੀ ਰਹੀ ਸੀ। ਉਥੇ ਹੀ, ਦਸੰਬਰ 2024 ’ਚ ਥੋਕ ਮਹਿੰਗਾਈ ਦਰ 2.57 ਫੀਸਦੀ ਸੀ।
ਕਿਹੜੇ ਕਾਰਨਾਂ ਕਰ ਕੇ ਵਧੀ ਥੋਕ ਮਹਿੰਗਾਈ
ਉਦਯੋਗ ਮੰਤਰਾਲਾ ਮੁਤਾਬਕ ਦਸੰਬਰ 2025 ’ਚ ਥੋਕ ਮਹਿੰਗਾਈ ਪਾਜ਼ੇਟਿਵ ਹੋਣ ਦੀ ਮੁੱਖ ਵਜ੍ਹਾ ਮੈਨੂਫੈਕਚਰਿੰਗ ਸੈਕਟਰ ’ਚ ਕੀਮਤਾਂ ਦਾ ਵਧਣਾ ਹੈ। ਖਾਸ ਤੌਰ ’ਤੇ ਮਸ਼ੀਨਰੀ, ਉਪਕਰਣ, ਖੁਰਾਕੀ ਉਤਪਾਦ, ਕੱਪੜਾ, ਖਣਿਜ ਅਤੇ ਹੋਰ ਨਿਰਮਾਣ ਨਾਲ ਸਬੰਧਤ ਵਸਤਾਂ ਦੇ ਮੁੱਲ ਵਧੇ ਹਨ।
ਅੰਕੜਿਆਂ ਮੁਤਾਬਕ ਦਸੰਬਰ ’ਚ ਖੁਰਾਕੀ ਪਦਾਰਥਾਂ ’ਚ ਗਿਰਾਵਟ (ਡਿਫਲੇਸ਼ਨ) ਘਟ ਕੇ 0.43 ਫੀਸਦੀ ਰਹਿ ਗਈ, ਜਦੋਂ ਕਿ ਨਵੰਬਰ ’ਚ ਇਹ 4.16 ਫੀਸਦੀ ਸੀ। ਸਬਜ਼ੀਆਂ ’ਚ ਵੀ ਗਿਰਾਵਟ ਘੱਟ ਹੋਈ। ਦਸੰਬਰ ’ਚ ਸਬਜ਼ੀਆਂ ਦੀਆਂ ਕੀਮਤਾਂ ’ਚ 3.50 ਫੀਸਦੀ ਦੀ ਗਿਰਾਵਟ ਰਹੀ, ਜਦੋਂ ਕਿ ਨਵੰਬਰ ’ਚ ਇਹ ਗਿਰਾਵਟ 20.23 ਫੀਸਦੀ ਤੱਕ ਸੀ।
ਮੈਨੂਫੈਕਚਰਿੰਗ ਅਤੇ ਗੈਰ-ਖੁਰਾਕੀ ਵਸਤਾਂ ਹੋਈਆਂ ਮਹਿੰਗੀਆਂ
ਦਸੰਬਰ ’ਚ ਮੈਨੂਫੈਕਚਰਿੰਗ ਉਤਪਾਦਾਂ ਦੀ ਥੋਕ ਮਹਿੰਗਾਈ ਵਧ ਕੇ 1.82 ਫ਼ੀਸਦੀ ਹੋ ਗਈ, ਜੋ ਨਵੰਬਰ ’ਚ 1.33 ਫੀਸਦੀ ਸੀ। ਉੱਥੇ ਹੀ, ਗੈਰ-ਖੁਰਾਕੀ ਵਸਤਾਂ ’ਚ ਮਹਿੰਗਾਈ ਵਧ ਕੇ 2.95 ਫ਼ੀਸਦੀ ਰਹੀ, ਜੋ ਨਵੰਬਰ ’ਚ 2.27 ਫੀਸਦੀ ਸੀ। ਦੂਜੇ ਪਾਸੇ, ਈਂਧਨ ਅਤੇ ਬਿਜਲੀ ਸੈਕਟਰ ’ਚ ਥੋਕ ਮਹਿੰਗਾਈ ਨੈਗੇਟਿਵ ਬਣੀ ਹੋਈ ਹੈ। ਦਸੰਬਰ ’ਚ ਇਸ ਸੈਕਟਰ ’ਚ 2.31 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ, ਜੋ ਲੱਗਭਗ ਨਵੰਬਰ ਦੇ ਬਰਾਬਰ ਹੈ।
ਇਸ ਤੋਂ ਪਹਿਲਾਂ ਜਾਰੀ ਅੰਕੜਿਆਂ ਮੁਤਾਬਕ ਦਸੰਬਰ ’ਚ ਪ੍ਰਚੂਨ ਮਹਿੰਗਾਈ (ਸੀ. ਪੀ. ਆਈ.) ਵੀ ਵਧ ਕੇ 1.33 ਫੀਸਦੀ ਹੋ ਗਈ ਸੀ, ਜੋ ਨਵੰਬਰ ’ਚ 0.71 ਫੀਸਦੀ ਸੀ। ਇਸ ’ਚ ਮੁੱਖ ਵਜ੍ਹਾ ਖਾਣ-ਪੀਣ ਦੀਆਂ ਚੀਜ਼ਾਂ ਦੇ ਮੁੱਲ ਵਧਣਾ ਰਿਹਾ।