ਤੇਜ਼ ਸ਼ੁਰੂਆਤ ਤੋਂ ਬਾਅਦ ਫਿਰ ਲੜਖੜਾਇਆ ਬਾਜ਼ਾਰ, ਸੈਂਸੈਕਸ ਅਤੇ ਨਿਫਟੀ ਗਿਰਾਵਟ ਨਾਲ ਹੋਏ ਬੰਦ

ਭਾਰਤੀ ਸ਼ੇਅਰ ਬਾਜ਼ਾਰ ਵਿੱਚ ਅੱਜ ਭਾਰੀ ਉਤਰਾਅ-ਚੜ੍ਹਾਅ ਦੇਖਣ ਨੂੰ ਮਿਲਿਆ। ਦਿਨ ਦੀ ਸ਼ੁਰੂਆਤ ਵੱਡੀ ਤੇਜ਼ੀ ਨਾਲ ਹੋਈ ਸੀ, ਪਰ ਕਾਰੋਬਾਰ ਦੇ ਅੰਤ ਤੱਕ ਬਾਜ਼ਾਰ ਆਪਣੀ ਬੜ੍ਹਤ ਗੁਆ ਬੈਠਾ ਅਤੇ ਲਾਲ ਨਿਸ਼ਾਨ 'ਤੇ ਬੰਦ ਹੋਇਆ।

ਸੈਂਸੈਕਸ ਅਤੇ ਨਿਫਟੀ ਦਾ ਹਾਲ
ਬੀ.ਐੱਸ.ਈ. (BSE) ਸੈਂਸੈਕਸ 122.56 ਅੰਕ (0.16%) ਦੀ ਗਿਰਾਵਟ ਨਾਲ 77,988.68 ਦੇ ਪੱਧਰ 'ਤੇ ਬੰਦ ਹੋਇਆ। ਇਸੇ ਤਰ੍ਹਾਂ ਨੈਸ਼ਨਲ ਸਟਾਕ ਐਕਸਚੇਂਜ ਦਾ ਨਿਫਟੀ-50 ਵੀ 34.55 ਅੰਕ (0.14%) ਡਿੱਗ ਕੇ 24,196.75 'ਤੇ ਆ ਗਿਆ। ਹਾਲਾਂਕਿ, ਕਾਰੋਬਾਰ ਦੇ ਸ਼ੁਰੂਆਤੀ ਘੰਟਿਆਂ ਵਿੱਚ ਸੈਂਸੈਕਸ ਵਿੱਚ 500 ਅੰਕਾਂ ਅਤੇ ਨਿਫਟੀ ਵਿੱਚ 150 ਅੰਕਾਂ ਤੋਂ ਵੱਧ ਦਾ ਉਛਾਲ ਦੇਖਿਆ ਗਿਆ ਸੀ।

ਕਿਉਂ ਆਈ ਤੇਜ਼ੀ ਅਤੇ ਫਿਰ ਗਿਰਾਵਟ?
ਬਾਜ਼ਾਰ ਵਿੱਚ ਤੇਜ਼ੀ ਦੀ ਮੁੱਖ ਵਜ੍ਹਾ ਅਮਰੀਕਾ ਅਤੇ ਈਰਾਨ ਵਿਚਾਲੇ ਮੁੜ ਗੱਲਬਾਤ ਸ਼ੁਰੂ ਹੋਣ ਦੀ ਉਮੀਦ ਸੀ, ਜਿਸ ਨਾਲ ਪੱਛਮੀ ਏਸ਼ੀਆ ਵਿੱਚ ਸ਼ਾਂਤੀ ਦੀ ਆਸ ਬੱਝੀ ਸੀ। ਪਰ ਦਿਨ ਚੜ੍ਹਨ ਦੇ ਨਾਲ ਹੀ ਮੁਨਾਫਾ ਵਸੂਲੀ ਕਾਰਨ ਬਾਜ਼ਾਰ ਨੈਗੇਟਿਵ ਜ਼ੋਨ ਵਿੱਚ ਚਲਾ ਗਿਆ। ਸੈਂਸੈਕਸ ਦੇ 25 ਸ਼ੇਅਰਾਂ ਵਿੱਚ ਤੇਜ਼ੀ ਰਹੀ, ਜਿਸ ਵਿੱਚ 'ਇਟਰਨਲ' ਨੂੰ ਸਭ ਤੋਂ ਵੱਧ ਫਾਇਦਾ ਹੋਇਆ। ਇਸ ਤੋਂ ਇਲਾਵਾ ਟਰੈਂਟ ਅਤੇ ਅਡਾਨੀ ਪੋਰਟਸ ਦੇ ਸ਼ੇਅਰਾਂ ਵਿੱਚ ਵੀ ਤੇਜ਼ੀ ਦਰਜ ਕੀਤੀ ਗਈ।

ਕੌਮਾਂਤਰੀ ਬਾਜ਼ਾਰਾਂ ਦੀ ਸਥਿਤੀ
ਜਿੱਥੇ ਭਾਰਤੀ ਬਾਜ਼ਾਰ ਵਿੱਚ ਗਿਰਾਵਟ ਰਹੀ, ਉੱਥੇ ਹੀ ਅਮਰੀਕੀ ਬਾਜ਼ਾਰ (S&P ਅਤੇ ਨੈਸਡੈਕ) ਆਪਣੇ ਹੁਣ ਤੱਕ ਦੇ ਸਭ ਤੋਂ ਉੱਚੇ ਪੱਧਰ (All-time high) 'ਤੇ ਪਹੁੰਚ ਗਏ ਹਨ। ਜਾਪਾਨ ਦਾ ਨਿੱਕੇਈ ਵੀ ਆਪਣੇ ਰਿਕਾਰਡ ਪੱਧਰ ਦੇ ਕਰੀਬ ਕਾਰੋਬਾਰ ਕਰ ਰਿਹਾ ਹੈ। ਕੱਚੇ ਤੇਲ ਦੀਆਂ ਕੀਮਤਾਂ ਕੌਮਾਂਤਰੀ ਬਾਜ਼ਾਰ ਵਿੱਚ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਮਾਮੂਲੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਬਰੈਂਟ ਕਰੂਡ 0.12 ਫੀਸਦੀ ਦੀ ਗਿਰਾਵਟ ਨਾਲ 94.82 ਡਾਲਰ ਪ੍ਰਤੀ ਬੈਰਲ ਅਤੇ ਡਬਲਯੂ.ਟੀ.ਆਈ. (WTI) ਕਰੂਡ 0.13 ਫੀਸਦੀ ਦੀ ਗਿਰਾਵਟ ਨਾਲ 91.17 ਡਾਲਰ 'ਤੇ ਕਾਰੋਬਾਰ ਕਰ ਰਿਹਾ ਹੈ।