ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵਲੋਂ ਈਰਾਨ ਵਿਰੁੱਧ ਲਏ ਗਏ ਇਕ ਸਖ਼ਤ ਫੈਸਲੇ ਨੇ ਗੁਆਂਢੀ ਦੇਸ਼ ਪਾਕਿਸਤਾਨ ਦੀ ਆਰਥਿਕਤਾ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਈਰਾਨ ਦੇ ਬੰਦਰਗਾਹਾਂ ਅਤੇ ਹੋਰਮੂਜ਼ ਜਲਡਮਰੂਮੱਧ (Strait of Hormuz) ਦੀ ਨਾਕਾਬੰਦੀ ਦੇ ਐਲਾਨ ਤੋਂ ਬਾਅਦ ਸੋਮਵਾਰ ਨੂੰ ਪਾਕਿਸਤਾਨੀ ਸ਼ੇਅਰ ਬਾਜ਼ਾਰ 'ਚ ਭਾਰੀ ਗਿਰਾਵਟ ਦਰਜ ਕੀਤੀ ਗਈ। ਕਰਾਚੀ ਸਟਾਕ ਐਕਸਚੇਂਜ (KSE-100) ਬੰਦ ਹੋਣ ਤੋਂ ਪਹਿਲਾਂ 7,000 ਤੋਂ ਵੱਧ ਅੰਕਾਂ ਤੱਕ ਟੁੱਟ ਗਿਆ।
ਟਰੰਪ ਦੇ ਫੈਸਲੇ ਕਾਰਨ ਮਚਿਆ ਹਾਹਾਕਾਰ
ਸੂਤਰਾਂ ਅਨੁਸਾਰ ਈਰਾਨ ਨਾਲ ਸ਼ਾਂਤੀ ਵਾਰਤਾ ਅਸਫਲ ਹੋਣ ਤੋਂ ਬਾਅਦ ਡੋਨਾਲਡ ਟਰੰਪ ਨੇ ਸਖ਼ਤ ਰੁਖ ਅਖਤਿਆਰ ਕਰਦਿਆਂ ਹੋਰਮੂਜ਼ ਸਟ੍ਰੇਟ 'ਤੇ ਨਾਕਾਬੰਦੀ ਦਾ ਐਲਾਨ ਕਰ ਦਿੱਤਾ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਈਰਾਨ ਦਾ ਕੋਈ ਵੀ ਜਹਾਜ਼ ਇਸ ਰਸਤੇ ਰਾਹੀਂ ਨਹੀਂ ਲੰਘੇਗਾ। ਇਸ ਐਲਾਨ ਦਾ ਸਭ ਤੋਂ ਮਾੜਾ ਅਸਰ ਪਾਕਿਸਤਾਨ 'ਤੇ ਦੇਖਣ ਨੂੰ ਮਿਲਿਆ, ਕਿਉਂਕਿ ਪਾਕਿਸਤਾਨ ਆਪਣੀ ਊਰਜਾ ਸਪਲਾਈ ਦਾ ਲਗਭਗ 85 ਫੀਸਦੀ ਹਿੱਸਾ ਇਸੇ ਰਸਤੇ ਰਾਹੀਂ ਦਰਾਮਦ ਕਰਦਾ ਹੈ।
ਬਾਜ਼ਾਰ 'ਚ 4 ਫੀਸਦੀ ਤੋਂ ਵੱਧ ਦੀ ਗਿਰਾਵਟ
ਸ਼ੁੱਕਰਵਾਰ ਨੂੰ 1,67,191.38 ਅੰਕਾਂ 'ਤੇ ਬੰਦ ਹੋਣ ਵਾਲਾ ਕਰਾਚੀ ਸਟਾਕ ਐਕਸਚੇਂਜ ਸੋਮਵਾਰ ਨੂੰ ਖੁੱਲ੍ਹਦੇ ਹੀ 5,351 ਅੰਕ ਡਿੱਗ ਗਿਆ। ਦਿਨ ਭਰ ਦੀ ਵਿਕਵਾਲੀ ਤੋਂ ਬਾਅਦ ਇਕ ਸਮੇਂ ਇਹ ਗਿਰਾਵਟ 7,000 ਅੰਕਾਂ ਨੂੰ ਪਾਰ ਕਰ ਗਈ, ਜਿਸ ਨਾਲ ਨਿਵੇਸ਼ਕਾਂ ਦੇ ਅਰਬਾਂ ਰੁਪਏ ਡੁੱਬ ਗਏ। ਦੱਸਣਯੋਗ ਹੈ ਕਿ ਪਿਛਲੇ ਹਫਤੇ ਅਮਰੀਕਾ-ਈਰਾਨ ਵਿਚਾਲੇ ਜੰਗਬੰਦੀ ਦੀਆਂ ਖਬਰਾਂ ਕਾਰਨ ਬਾਜ਼ਾਰ 'ਚ 12,000 ਅੰਕਾਂ ਦੀ ਤੇਜ਼ੀ ਆਈ ਸੀ, ਜੋ ਹੁਣ ਪੂਰੀ ਤਰ੍ਹਾਂ ਖ਼ਤਮ ਹੋ ਗਈ ਹੈ।
ਪਾਕਿਸਤਾਨ 'ਚ ਵਧੇਗਾ ਊਰਜਾ ਸੰਕਟ
ਪਾਕਿਸਤਾਨ ਪਹਿਲਾਂ ਹੀ ਗੰਭੀਰ ਊਰਜਾ ਸੰਕਟ ਅਤੇ ਅਸਮਾਨ ਨੂੰ ਛੂਹ ਰਹੀ ਮਹਿੰਗਾਈ ਨਾਲ ਜੂਝ ਰਿਹਾ ਹੈ। ਨਾਕਾਬੰਦੀ ਕਾਰਨ ਤੇਲ ਦੀਆਂ ਕੀਮਤਾਂ 'ਚ ਹੋਰ ਵਾਧਾ ਹੋਣ ਦੀ ਸੰਭਾਵਨਾ ਹੈ, ਜਿਸ ਕਾਰਨ ਆਮ ਜਨਤਾ 'ਚ ਸਰਕਾਰ ਵਿਰੁੱਧ ਰੋਸ ਵਧ ਸਕਦਾ ਹੈ।
ਭਾਰਤੀ ਬਾਜ਼ਾਰ 'ਤੇ ਵੀ ਪਿਆ ਅਸਰ
ਸਿਰਫ਼ ਪਾਕਿਸਤਾਨ ਹੀ ਨਹੀਂ, ਸਗੋਂ ਭਾਰਤੀ ਸ਼ੇਅਰ ਬਾਜ਼ਾਰ 'ਚ ਵੀ ਇਸ ਤਣਾਅ ਦਾ ਅਸਰ ਦੇਖਣ ਨੂੰ ਮਿਲਿਆ। ਸੋਮਵਾਰ ਨੂੰ ਬੀ. ਐੱਸ. ਈ. ਸੈਂਸੈਕਸ (BSE Sensex) 'ਚ ਵੀ 1,600 ਅੰਕਾਂ ਤੋਂ ਵੱਧ ਦੀ ਗਿਰਾਵਟ ਦਰਜ ਕੀਤੀ ਗਈ।