ਅਡਾਣੀ ਸਮੂਹ ਦੇ ਕਾਰਜਕਾਰੀ ਨਿਰਦੇਸ਼ਕ ਜੀਤ ਅਡਾਣੀ ਨੇ ‘ਇੰਡੀਆ ਏ. ਆਈ. ਇੰਪੈਕਟ ਸਮਿਟ’ ’ਚ ਕਿਹਾ ਕਿ ਭਾਰਤ ਨੂੰ ਦਰਾਮਦ ’ਤੇ ਨਿਰਭਰ ਰਹਿਣ ਦੇ ਬਦਲ ਵਜੋਂ ਆਪਣਾ ਸਵੈ-ਨਿਰਭਰ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏ. ਆਈ.) ਬੁਨਿਆਦੀ ਢਾਂਚਾ ਵਿਕਸਤ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਏ. ਆਈ. ਭਵਿੱਖ ’ਚ ਰਾਸ਼ਟਰੀ ਪ੍ਰਭੂਸੱਤਾ ਨੂੰ ਪ੍ਰਭਾਸ਼ਿਤ ਕਰੇਗਾ ਅਤੇ ਊਰਜਾ, ਕੰਪਿਊਟ ਤੇ ਕਲਾਊਡ ਇਸ ਦੇ 3 ਪ੍ਰਮੁੱਖ ਥੰਮ੍ਹ ਹਨ।
ਅਡਾਣੀ ਨੇ ਊਰਜਾ ਸੁਰੱਖਿਆ ਨੂੰ ‘ਬੌਧਿਕ ਸੁਰੱਖਿਆ’ ਦੱਸਦਿਆਂ ਅਕਸ਼ੈ ਊਰਜਾ ਆਧਾਰਿਤ ਏ. ਆਈ. ਡਾਟਾ ਕੇਂਦਰਾਂ ਦੇ ਵਿਕਾਸ ’ਤੇ ਜ਼ੋਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਕਲਾਊਡ ਪ੍ਰਭੂਸੱਤਾ ਦਾ ਅਰਥ ਵੱਖ-ਵੱਖ ਹੋਣਾ ਨਹੀਂ, ਸਗੋਂ ਖੁਦਮੁਖਤਿਆਰੀ ਹੈ ਅਤੇ ਭਾਰਤ ਦੀਆਂ ਮਹੱਤਵਪੂਰਨ ਏ. ਆਈ. ਲੋੜਾਂ ਘਰੇਲੂ ਪੱਧਰ ’ਤੇ ਪੂਰੀਆਂ ਹੋਣੀਆਂ ਚਾਹੀਦੀਆਂ ਹਨ। ਸਮੂਹ ਨੇ ਹਰਿਤ-ਊਰਜਾ ਆਧਾਰਿਤ ਏ. ਆਈ. ਮੰਚਾਂ ਲਈ 100 ਅਰਬ ਡਾਲਰ ਨਿਵੇਸ਼ ਕਰਨ ਦੀ ਵਚਨਬੱਧਤਾ ਪ੍ਰਗਟਾਈ ਹੈ।