ਜਲੰਧਰ 'ਚ ਅਮਨ-ਸ਼ਾਂਤੀ ਨਾਲ ਵੋਟਾਂ ਦਾ ਕੰਮ ਮੁਕੰਮਲ, ਜਾਣੋ ਕਿੰਨੇ ਫ਼ੀਸਦੀ ਹੋਈ ਵੋਟਿੰਗ

ਜਲੰਧਰ : ਜਲੰਧਰ ਜ਼ਿਲ੍ਹੇ ਦੀਆਂ 5 ਨਗਰ ਕੌਂਸਲਾਂ ਅਤੇ 2 ਨਗਰ ਪੰਚਾਇਤਾਂ ਵਿਚ ਸਵੇਰੇ 8 ਵਜੇ ਤੋਂ ਜਾਰੀ ਵੋਟਾਂ ਪੈਣ ਦਾ ਕੰਮ ਹੁਣ ਖ਼ਤਮ ਹੋ ਚੁੱਕਾ ਹੈ। ਜ਼ਿਲ੍ਹੇ ਦੀਆਂ 5 ਨਗਰ ਕੌਂਸਲਾਂ ਅਤੇ 2 ਨਗਰ ਪੰਚਾਇਤਾਂ ਦੇ 99 ਵਾਰਡਾਂ ਵਿਚ ਕੁੱਲ੍ਹ 341 ਉਮੀਦਵਾਰ ਚੋਣ ਮੈਦਾਨ ਵਿਚ ਹਨ। ਨਗਰ ਕੌਂਸਲ ਆਦਮਪੁਰ ਵਿਚ 13 ਵਾਰਡਾਂ ਲਈ 44 ਉਮੀਦਵਾਰ, ਕਰਤਾਰਪੁਰ ਵਿਚ 15 ਵਾਰਡਾਂ ਲਈ 50 ਉਮੀਦਵਾਰ, ਨਕੋਦਰ ਵਿਚ 17 ਵਾਰਡਾਂ ਲਈ 55 ਉਮੀਦਵਾਰ ਅਤੇ ਨੂਰਮਹਿਲ ਵਿਚ 13 ਵਾਰਡਾਂ ਲਈ 41 ਉਮੀਦਵਾਰ ਮੈਦਾਨ ਵਿਚ ਹਨ। ਨਗਰ ਕੌਂਸਲ ਆਦਮਪੁਰ ਦੀਆਂ ਚੋਣਾਂ ਵੋਟਰਾਂ 'ਚ ਭਾਰੀ ਉਤਸ਼ਾਹ ਵੇਖਣ ਨੂੰ ਮਿਲ ਰਿਹਾ ਹੈ। ਵਾਰਡ ਨੰਬਰ ਚਾਰ ਅਤੇ ਛੇ 'ਚ ਵੋਟਰਾਂ ਦੀਆਂ ਲੰਬੀਆਂ ਕਤਾਰਾਂ ਲੱਗੀਆਂ ਹਨ।

ਜਲੰਧਰ ਜ਼ਿਲ੍ਹੇ ਦੀ 12 ਵਜੇ ਤੱਕ ਦੀ ਵੋਟ ਫ਼ੀਸਦੀ
ਆਦਮਪੁਰ (MC)- 31.36 ਫ਼ੀਸਦੀ
ਕਰਤਾਰਪੁਰ (MC)- 32.71 ਫ਼ੀਸਦੀ
ਨਕੋਦਰ (MC)- 47.39 ਫ਼ੀਸਦੀ
ਨੂਰਮਹਿਲ (MC)- 35.58 ਫ਼ੀਸਦੀ
ਫਿਲੌਰ (MC)- 31.51 ਫ਼ੀਸਦੀ
ਮਹਿਤਪੁਰ (NP)- 36.17 ਫ਼ੀਸਦੀ
ਲੋਹੀਆਂ ਖ਼ਾਸ (NP)-36.86 ਫ਼ੀਸਦੀ

ਜਲੰਧਰ ਜ਼ਿਲ੍ਹੇ ਦੀ 2 ਵਜੇ ਤੱਕ ਦੀ ਵੋਟ ਫ਼ੀਸਦੀ
ਆਦਮਪੁਰ (MC)- 44.71 ਫ਼ੀਸਦੀ
ਕਰਤਾਰਪੁਰ (MC)- 47.13 ਫ਼ੀਸਦੀ
ਨਕੋਦਰ (MC)- 47.26 ਫ਼ੀਸਦੀ
ਨੂਰਮਹਿਲ (MC)- 50.19 ਫ਼ੀਸਦੀ
ਫਿਲੌਰ (MC)- 44.81 ਫ਼ੀਸਦੀ
ਮਹਿਤਪੁਰ (NP)- 51.63 ਫ਼ੀਸਦੀ
ਲੋਹੀਆਂ ਖ਼ਾਸ (NP)-52.47 ਫ਼ੀਸਦੀ

ਜਲੰਧਰ ਜ਼ਿਲ੍ਹੇ ਦੀ ਕੁੱਲ ਵੋਟ ਫ਼ੀਸਦੀ
ਕਰਤਾਰਪੁਰ (MC)- 65 ਫੀਸਦੀ

ਡਿਪਟੀ ਕਮਿਸ਼ਨਰ-ਕਮ-ਜ਼ਿਲਾ ਚੋਣ ਅਫ਼ਸਰ ਵਰਜੀਤ ਵਾਲੀਆ ਨੇ ਦੱਸਿਆ ਕਿ ਨਗਰ ਕੌਂਸਲ ਫਿਲੌਰ ਵਿਚ 15 ਵਾਰਡਾਂ ਲਈ ਕੁੱਲ੍ਹ 63 ਨਾਮਜ਼ਦਗੀਆਂ ਦਾਖ਼ਲ ਹੋਈਆਂ ਸਨ, ਜਿਨ੍ਹਾਂ ਵਿਚੋਂ 5 ਉਮੀਦਵਾਰਾਂ ਨੇ ਨਾਂ ਵਾਪਸ ਲੈ ਲਏ। ਇਕ ਉਮੀਦਵਾਰ ਵੱਲੋਂ ਇਕ ਹੀ ਵਾਰਡ ਤੋਂ ਦੋ ਨਾਮਜ਼ਦਗੀਆਂ ਭਰਨ ਕਾਰਨ ਫਿਲੌਰ ਵਿਚ ਕੁੱਲ੍ਹ 57 ਉਮੀਦਵਾਰ ਚੋਣ ਲੜ ਰਹੇ ਹਨ। ਉੱਥੇ ਹੀ ਨਗਰ ਪੰਚਾਇਤ ਮਹਿਤਪੁਰ ਅਤੇ ਲੋਹੀਆਂ ਖਾਸ ਦੇ 13-13 ਵਾਰਡਾਂ ਵਿਚ 47-47 ਉਮੀਦਵਾਰ ਚੋਣ ਮੈਦਾਨ ਵਿਚ ਹਨ।

ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਚੋਣਾਂ ਵਿਚ ਕੁੱਲ੍ਹ 108067 ਵੋਟਰ ਆਪਣੇ ਵੋਟ ਦੇ ਅਧਿਕਾਰ ਦੀ ਵਰਤੋਂ ਕਰਨਗੇ। ਇਨ੍ਹਾਂ ਵਿਚ 54943 ਮਰਦ, 53116 ਮਹਿਲਾ ਅਤੇ 8 ਹੋਰ ਵੋਟਰ ਸ਼ਾਮਲ ਹਨ। ਨਗਰ ਕੌਂਸਲ ਨਕੋਦਰ ਵਿਚ 27964, ਆਦਮਪੁਰ ਵਿਚ 12610, ਕਰਤਾਰਪੁਰ ਵਿਚ 19736, ਨੂਰਮਹਿਲ ਵਿਚ 11105 ਅਤੇ ਫਿਲੌਰ ਵਿਚ 19179 ਵੋਟਰ ਹਨ। ਇਸ ਤੋਂ ਇਲਾਵਾ ਨਗਰ ਪੰਚਾਇਤ ਲੋਹੀਆਂ ਵਿਚ 7958 ਅਤੇ ਮਹਿਤਪੁਰ ਵਿਚ 9515 ਵੋਟਰ ਆਪਣੀ ਵੋਟ ਦੀ ਵਰਤੋਂ ਕਰਨਗੇ। ਵੋਟਰਾਂ ਦੀ ਸਹੂਲਤ ਲਈ ਕੁੱਲ੍ਹ 133 ਪੋਲਿੰਗ ਬੂਥ ਬਣਾਏ ਗਏ ਹਨ। ਡਿਪਟੀ ਕਮਿਸ਼ਨਰ-ਕਮ-ਜ਼ਿਲ੍ਹਾ ਚੋਣ ਅਫ਼ਸਰ ਵਰਜੀਤ ਵਾਲੀਆ ਨੇ ਕਿਹਾ ਕਿ ਚੋਣ ਪ੍ਰਕਿਰਿਆ ਦਾ ਹਿੱਸਾ ਬਣਨਾ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਨੇ ਕਰਮਚਾਰੀਆਂ ਨੂੰ ਆਪਣੀ ਜ਼ਿੰਮੇਵਾਰੀ ਪੂਰੀ ਇਮਾਨਦਾਰੀ, ਨਿਰਪੱਖਤਾ ਅਤੇ ਤਨਦੇਹੀ ਨਾਲ ਨਿਭਾਉਣ ਲਈ ਪ੍ਰੇਰਿਤ ਕੀਤਾ। ਉਨ੍ਹਾਂ ਲੋਕਾਂ ਨੂੰ ਬਿਨਾਂ ਕਿਸੇ ਡਰ, ਭੈਅ ਅਤੇ ਲਾਲਚ ਦੇ ਆਪਣੀ ਵੋਟ ਦੀ ਵਰਤੋਂ ਕਰਨ ਦੀ ਅਪੀਲ ਕੀਤੀ।

ਐੱਸ. ਐੱਸ. ਪੀ. ਜਲੰਧਰ ਦਿਹਾਤੀ ਹਰਵਿੰਦਰ ਸਿੰਘ ਵਿਰਕ ਨੇ ਕਿਹਾ ਕਿ ਚੋਣਾਂ ਨੂੰ ਸ਼ਾਂਤੀਪੂਰਵਕ ਅਤੇ ਨਿਰਪੱਖ ਤਰੀਕੇ ਨਾਲ ਕਰਵਾਉਣ ਲਈ ਪੁਲਸ ਪ੍ਰਸ਼ਾਸਨ ਵੱਲੋਂ ਪੁਖ਼ਤਾ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਹਨ। ਚੋਣ ਡਿਊਟੀ ਲਈ ਕਰੀਬ 1200 ਪੁਲਸ ਅਧਿਕਾਰੀ ਅਤੇ ਕਰਮਚਾਰੀ ਤਾਇਨਾਤ ਕੀਤੇ ਗਏ ਹਨ। ਉਨ੍ਹਾਂ ਦੱਸਿਆ ਕਿ ਸਾਰੇ ਪੋਲਿੰਗ ਬੂਥਾਂ ’ਤੇ 24 ਘੰਟੇ ਨਿਗਰਾਨੀ ਰੱਖੀ ਜਾ ਰਹੀ ਹੈ ਅਤੇ ਕਿਸੇ ਵੀ ਸ਼ੱਕੀ ਸਰਗਰਮੀ ਜਾਂ ਕਾਨੂੰਨ ਦੀ ਉਲੰਘਣਾ ਦੀ ਸੂਚਨਾ ਤੁਰੰਤ ਪੁਲਸ ਨੂੰ ਦੇਣ ਦੀ ਅਪੀਲ ਕੀਤੀ ਗਈ ਹੈ। ਸਹਾਇਤਾ ਲਈ ਲੋਕ 112 ਹੈਲਪਲਾਈਨ ਨੰਬਰ ’ਤੇ ਸੰਪਰਕ ਕਰ ਸਕਦੇ ਹਨ।