ਚੰਡੀਗੜ੍ਹ : ਚੰਡੀਗੜ੍ਹ ਪ੍ਰਸ਼ਾਸਨ ਐਤਵਾਰ ਨੂੰ ਪਹਿਲੀ ਚੰਡੀਗੜ੍ਹ ਇੰਟਰਨੈਸ਼ਨਲ ਮੈਰਾਥਨ ਕਰਵਾਈ ਜਾ ਰਹੀ ਹੈ। ਯੂਟੀ ਦੇ ਖੇਡ ਵਿਭਾਗ ਵੱਲੋਂ ਇਹ ਪਹਿਲਾ ਵੱਡਾ ਅੰਤਰਰਾਸ਼ਟਰੀ ਪੱਧਰ ਦਾ ਖੇਡ ਮੁਕਾਬਲਾ ਹੋਵੇਗਾ। ਕਰੀਬ ਛੇ ਮਹੀਨਿਆਂ ਤੋਂ ਇਸ ਮੈਰਾਥਨ ਨੂੰ ਲੈ ਕੇ ਤਿਆਰੀਆਂ ਜਾਰੀ ਸਨ। ਸਵੇਰੇ 7 ਵਜੇ ਸੈਕਟਰ-1 ਚੰਡੀਗੜ੍ਹ ਕਲੱਬ ਤੋਂ ਮੈਰਾਥਨ ਦੀ ਸ਼ੁਰੂਆਤ ਹੋਵੇਗੀ। ਯੂਟੀ ਪ੍ਰਸ਼ਾਸਕ ਅਤੇ ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਇਸ ਮੌਕੇ ’ਤੇ ਮੁੱਖ ਮਹਿਮਾਨ ਹੋਣਗੇ।
ਜੁਆਇੰਟ ਡਾਇਰੈਕਟਰ ਡਾ. ਮਹਿੰਦਰ ਸਿੰਘ, ਖੇਡ ਡਾਇਰੈਕਟਰ ਸੌਰਭ ਅਰੋੜਾ ਅਤੇ ਖੇਡ ਸਕੱਤਰ ਪ੍ਰੇਰਣਾ ਪੁਰੀ ਦੀ ਦੇਖ-ਰੇਖ ਹੇਠ ਇਸ ਵੱਡੇ ਆਯੋਜਨ ਨੂੰ ਕਾਮਯਾਬ ਬਣਾਉਣ ਲਈ ਸ਼ਹਿਰ ਦੇ ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਦੇ ਐਨਐਸਐਸ ਵਲੰਟੀਅਰ ਵੀ ਆਪਣਾ ਯੋਗਦਾਨ ਪਾ ਰਹੇ ਹਨ। ਜਾਣਕਾਰੀ ਅਨੁਸਾਰ 36 ਅੰਤਰਰਾਸ਼ਟਰੀ ਦੌੜਾਕਾਂ ਸਮੇਤ 3500 ਤੋਂ ਵੱਧ ਲੋਕਾਂ ਨੇ ਮੈਰਾਥਨ ਵਿੱਚ ਹਿੱਸਾ ਲੈਣ ਲਈ ਰਜਿਸਟ੍ਰੇਸ਼ਨ ਕਰਵਾਇਆ ਹੈ।
ਮੈਰਾਥਨ ਦੇ ਜੇਤੂਆਂ ਨੂੰ ਇੱਕ ਕਰੋੜ ਰੁਪਏ ਤੋਂ ਵੱਧ ਦੀ ਇਨਾਮੀ ਰਕਮ ਦਿੱਤੀ ਜਾਵੇਗੀ। ਇਸ ਵਿੱਚ 5, 10, 21 ਅਤੇ 42 ਕਿਲੋਮੀਟਰ ਸ਼੍ਰੇਣੀਆਂ ਦੀਆਂ ਦੌੜਾਂ ਸ਼ਾਮਲ ਹਨ। ਮੈਰਾਥਨ ਦੀਆਂ ਤਿਆਰੀਆਂ ਦਾ ਜਾਇਜ਼ਾ ਲੈਣ ਲਈ ਯੂਟੀ ਪ੍ਰਸ਼ਾਸਕ ਗੁਲਾਬ ਚੰਦ ਕਟਾਰੀਆ ਸ਼ਨੀਵਾਰ ਨੂੰ ਖੁਦ ਮੌਕੇ ‘ਤੇ ਪਹੁੰਚੇ। ਪ੍ਰਸ਼ਾਸਕੀ ਅਧਿਕਾਰੀਆਂ ਅਨੁਸਾਰ ਇਸ ਅੰਤਰਰਾਸ਼ਟਰੀ ਪੱਧਰ ਦੇ ਆਯੋਜਨ ਨਾਲ ਭਵਿੱਖ ਵਿੱਚ ਹੋਰ ਵੱਡੇ ਖੇਡ ਸਮਾਗਮਾਂ ਦੀ ਸੰਭਾਵਨਾ ਵਧੇਗੀ। ਇਹ ਸ਼ਹਿਰ ਦਾ ਹੁਣ ਤੱਕ ਦਾ ਸਭ ਤੋਂ ਵੱਡਾ ਖੇਡ ਆਯੋਜਨ ਹੋਵੇਗਾ।
ਚਾਰ ਸ਼੍ਰੇਣੀਆਂ ਵਿੱਚ ਹੋਵੇਗੀ ਮੈਰਾਥਨ
ਮੈਰਾਥਨ ਵਿੱਚ ਚਾਰ ਸ਼੍ਰੇਣੀਆਂ ਸ਼ਾਮਲ ਹੋਣਗੀਆਂ—ਫੁੱਲ ਮੈਰਾਥਨ (42.195 ਕਿਮੀ), ਹਾਫ ਮੈਰਾਥਨ, 10 ਕਿਮੀ ਟਾਈਮਡ ਰਨ ਅਤੇ 5 ਕਿਮੀ ਰਨ। ਫੁੱਲ ਮੈਰਾਥਨ, ਜਿਸਨੂੰ ਛੇ ਘੰਟਿਆਂ ਵਿੱਚ ਪੂਰਾ ਕਰਨਾ ਹੋਵੇਗਾ, ਚੰਡੀਗੜ੍ਹ ਕਲੱਬ ਤੋਂ ਸ਼ੁਰੂ ਹੋਵੇਗੀ। ਇਸ ਦਾ ਰੂਟ ਹਾਈਕੋਰਟ ਚੌਂਕ, ਰਾਕ ਗਾਰਡਨ, ਸੁਖਨਾ ਲੇਕ, ਲੇਕ ਕਲੱਬ, ਮਟਕਾ ਚੌਂਕ, ਟਰਾਂਸਪੋਰਟ ਲਾਈਟਸ, ਰੋਜ਼ ਗਾਰਡਨ ਰੋਡ, ਪੋਸਟਗ੍ਰੈਜੂਏਟ ਇੰਸਟੀਟਿਊਟ ਆਫ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ (ਗੇਟ ਨੰਬਰ 3), ਲੇਜ਼ਰ ਵੈਲੀ ਅਤੇ ਸੀਐਮ ਹਾਊਸ ਚੌਂਕ ਤੋਂ ਹੁੰਦਾ ਹੋਇਆ ਮੁੜ ਚੰਡੀਗੜ੍ਹ ਕਲੱਬ ‘ਤੇ ਖਤਮ ਹੋਵੇਗਾ।
ਹਾਫ ਮੈਰਾਥਨ ਇਸੇ ਰੂਟ ਦੇ ਇੱਕ ਚੱਕਰ ਵਿੱਚ ਕਰਵਾਈ ਜਾਵੇਗੀ। 10 ਕਿਮੀ ਟਾਈਮਡ ਰਨ ਵੀ ਚੰਡੀਗੜ੍ਹ ਕਲੱਬ ਤੋਂ ਸ਼ੁਰੂ ਹੋ ਕੇ ਮਟਕਾ ਚੌਂਕ ਤੱਕ ਇਸੇ ਰਸਤੇ ‘ਤੇ ਹੋਵੇਗੀ ਅਤੇ ਏਅਰ ਫੋਰਸ ਮਿਊਜ਼ੀਅਮ, ਰੋਜ਼ ਗਾਰਡਨ ਅਤੇ ਗਵਰਨਮੈਂਟ ਮਿਊਜ਼ੀਅਮ ਤੋਂ ਹੁੰਦੀ ਹੋਈ ਮੁੜ ਸ਼ੁਰੂਆਤੀ ਸਥਾਨ ‘ਤੇ ਖਤਮ ਹੋਵੇਗੀ। 5 ਕਿਮੀ ਰਨ ਸੁਖਨਾ ਪਥ ਮਾਰਗ ‘ਤੇ ਕਰਵਾਈ ਜਾਵੇਗੀ। ਸ਼੍ਰੇਣੀਆਂ ਵਿੱਚ ਰੈਂਕਿੰਗ ਦਰਜ ਸਮੇਂ ਦੇ ਆਧਾਰ ‘ਤੇ ਨਿਰਧਾਰਤ ਕੀਤੀ ਜਾਵੇਗੀ। ਮੈਰਾਥਨ ਲਈ ਕੁੱਲ ਇਨਾਮੀ ਰਕਮ 1,00,16,000 ਰੁਪਏ ਨਿਰਧਾਰਤ ਕੀਤੀ ਗਈ ਹੈ, ਜੋ ਖੇਡ ਵਿਭਾਗ ਵੱਲੋਂ ਆਯੋਜਿਤ ਕਿਸੇ ਵੀ ਮੁਕਾਬਲੇ ਵਿੱਚ ਸਭ ਤੋਂ ਵੱਡੀ ਰਕਮ ਹੋਵੇਗੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਨਾਮ 18 ਤੋਂ 50 ਸਾਲ ਦੀ ਉਮਰ ਵਰਗ ਤੱਕ ਵੱਖ-ਵੱਖ ਸ਼੍ਰੇਣੀਆਂ ਵਿੱਚ ਦਿੱਤੇ ਜਾਣਗੇ। ਹਰ। ਮੁਕਾਬਲੇਬਾਜ਼ ਸ਼੍ਰੇਣੀ ਵਿੱਚ ਟੌਪ ਤਿੰਨ ਕੁੱਲ ਜੇਤੂਆਂ ਨੂੰ ਵੀ ਆਕਰਸ਼ਕ ਨਗਦ ਇਨਾਮ ਦਿੱਤੇ ਜਾਣਗੇ। ਵੱਖ-ਵੱਖ ਸ਼੍ਰੇਣੀਆਂ ਵਿੱਚ ਕੁੱਲ 138 ਜੇਤੂਆਂ ਨੂੰ ਸਨਮਾਨਿਤ ਕੀਤਾ ਜਾਵੇਗਾ। 5 ਕਿਮੀ ਮੈਰਾਥਨ ਦੇ ਭਾਗੀਦਾਰਾਂ ਨੂੰ ਵੀ ਮੈਡਲ ਅਤੇ ਪ੍ਰਮਾਣ ਪੱਤਰ ਦਿੱਤੇ ਜਾਣਗੇ। ਅਧਿਕਾਰੀਆਂ ਨੇ ਦੱਸਿਆ ਕਿ ਲੋਕਾਂ ਨੇ ਮੈਰਾਥਨ ਲਈ ਕਾਫੀ ਰੁਚੀ ਦਿਖਾਈ ਹੈ ਅਤੇ ਅੰਤਰਰਾਸ਼ਟਰੀ ਪੱਧਰ ਦੇ ਖਿਡਾਰੀ ਵੀ ਇਸ ਵਿੱਚ ਹਿੱਸਾ ਲੈ ਰਹੇ ਹਨ। ਸਮਾਗਮ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਐਤਵਾਰ ਲਈ ਆਮ ਲੋਕਾਂ ਵਾਸਤੇ ਰੂਟ ਸੰਬੰਧੀ ਐਡਵਾਇਜ਼ਰੀ ਵੀ ਜਾਰੀ ਕੀਤੀ ਗਈ ਹੈ।
ਵੱਖ-ਵੱਖ ਸ਼੍ਰੇਣੀਆਂ ਲਈ ਇਨਾਮੀ ਰਕਮ
• ਫੁੱਲ ਮੈਰਾਥਨ: 20,000 ਤੋਂ 7,00,000 ਰੁਪਏ ਤੱਕ
• ਹਾਫ ਮੈਰਾਥਨ: 15,000 ਤੋਂ 4,00,000 ਰੁਪਏ ਤੱਕ
• 10 ਕਿਮੀ ਟਾਈਮਡ ਰਨ: 7,000 ਤੋਂ 2,00,000 ਰੁਪਏ ਤੱਕ
ਚੰਡੀਗੜ੍ਹ ਵਿਚ ਸਵੇਰੇ 3 ਤੋਂ 11 ਵਜੇ ਤੱਕ ਕਈ ਰਾਹ ਬੰਦ ਰਹਿਣਗੇ
ਮੱਧ ਮਾਰਗ ਅਤੇ ਜਨ ਮਾਰਗ ’ਤੇ ਟ੍ਰੈਫਿਕ ਪ੍ਰਭਾਵਿਤ, ਲੋਕਾਂ ਤੋਂ ਸਹਿਯੋਗ ਦੀ ਅਪੀਲ
1 ਮਾਰਚ ਨੂੰ ਸ਼ਹਿਰ ਵਿੱਚ ਹੋਣ ਵਾਲੀ ਚੰਡੀਗੜ੍ਹ ਇੰਟਰਨੈਸ਼ਨਲ ਮੈਰਾਥਨ ਦੇ ਮੱਦੇਨਜ਼ਰ ਸਵੇਰੇ 3 ਵਜੇ ਤੋਂ 11 ਵਜੇ ਤੱਕ ਕਈ ਮੁੱਖ ਮਾਰਗਾਂ ’ਤੇ ਆਵਾਜਾਈ ਵਿੱਚ ਤਬਦੀਲੀਆਂ ਕੀਤੀਆਂ ਗਈਆਂ ਹਨ। ਟ੍ਰੈਫਿਕ ਪੁਲਿਸ ਨੇ ਆਮ ਜਨਤਾ ਨੂੰ ਅਪੀਲ ਕੀਤੀ ਹੈ ਕਿ ਨਿਰਧਾਰਤ ਰੂਟ ਅਤੇ ਡਾਇਵਰਜ਼ਨ ਦੀ ਪਾਲਣਾ ਕੀਤੀ ਜਾਵੇ।
ਟ੍ਰੈਫਿਕ ਪੁਲਿਸ ਅਨੁਸਾਰ ਕੈਂਬਾਲਾ ਅਤੇ ਕਾਂਸਲ ਵੱਲੋਂ ਉੱਤਰ ਮਾਰਗ (ਸੁਖਨਾ ਲੇਕ ਸਾਈਡ) ਵੱਲ ਆਉਣ ਵਾਲੇ ਰਾਹ ਬੰਦ ਰਹਿਣਗੇ। ਕਲੱਬ ਸਮਾਲ ਚੌਂਕ ਤੋਂ ਲੇਕ ਵੱਲ ਜਾਣ ਵਾਲਾ ਰਾਹ ਵੀ ਬੰਦ ਰਹੇਗਾ। ਨਿਊ ਬੈਰੀਕੇਡ ਚੌਂਕ ਤੋਂ ਓਲਡ ਬੈਰੀਕੇਡ ਚੌਂਕ ਤੱਕ ਆਵਾਜਾਈ ਰੋਕੀ ਜਾਵੇਗੀ। ਸੈਕਟਰ-4, ਸੈਕਟਰ-5 ਅਤੇ ਐਮਐਲਏ ਹੋਸਟਲ ਗੇਟ ਤੋਂ ਉੱਤਰ ਮਾਰਗ ਵੱਲ ਜਾਣ ਵਾਲੇ ਰਾਹ ਵੀ ਬੰਦ ਰਹਿਣਗੇ।
ਸੈਕਟਰ-27/28 ਲਾਈਟ ਪਾਇੰਟ ਤੋਂ ਗਰੇਨ ਮਾਰਕੀਟ, ਸੈਕਟਰ-26 ਵੱਲ ਜਾਣ ਵਾਲੇ ਵਾਹਨਾਂ ਨੂੰ ਵਿਕਲਪਕ ਰਸਤੇ ਅਪਣਾਉਣੇ ਪੈਣਗੇ। ਮੱਧ ਮਾਰਗ (ਟ੍ਰਾਂਸਪੋਰਟ ਲਾਈਟ ਪਾਇੰਟ ਤੋਂ ਪੀਜੀਆਈ ਵੱਲ) ’ਤੇ ਇੱਕ ਪਾਸਾ ਮੈਰਾਥਨ ਧਾਵਕਾਂ ਲਈ ਰਾਖਵਾਂ ਰਹੇਗਾ, ਜਦਕਿ ਦੂਜੇ ਪਾਸੇ ਨਿਯੰਤਰਿਤ ਦੋ-ਤਰਫ਼ਾ ਟ੍ਰੈਫਿਕ ਚੱਲੇਗਾ। ਪ੍ਰੋਗਰਾਮ ਦੌਰਾਨ ਲੋਕਾਂ ਨੂੰ ਮੱਧ ਮਾਰਗ ਅਤੇ ਜਨ ਮਾਰਗ (ਮਟਕਾ ਚੌਂਕ ਤੋਂ ਓਲਡ ਬੈਰੀਕੇਡ ਚੌਂਕ) ਦੀ ਵਰਤੋਂ ਨਾ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।
ਕੈਂਬਾਲਾ ਅਤੇ ਕਾਂਸਲ ਵੱਲੋਂ ਆਉਣ ਵਾਲੇ ਵਾਹਨ ਨਯਾਗਾਂਵ ਰਾਹੀਂ ਸ਼ਹਿਰ ਵਿੱਚ ਦਾਖ਼ਲ ਹੋਣ। ਗਰੇਨ ਮਾਰਕੀਟ, ਸੈਕਟਰ-26 ਜਾਣ ਵਾਲੇ ਵਾਹਨ ਮਾਡਲ ਲਾਈਟ ਪਾਇੰਟ ਰਾਹੀਂ ਜਾ ਸਕਦੇ ਹਨ। ਸੈਕਟਰ-11/15 ਅੰਡਰਬ੍ਰਿਜ ਰਾਹ ਆਮ ਜਨਤਾ ਲਈ ਖੁੱਲ੍ਹਾ ਰਹੇਗਾ।
ਪਾਰਕਿੰਗ ਸਬੰਧੀ ਚੰਡੀਗੜ੍ਹ ਵਾਰ ਮੈਮੋਰਿਅਲ ਅਤੇ ਲੇਕ ਕਲੱਬ ਪਾਰਕਿੰਗ ਵਿੱਚ ਵਾਹਨ ਖੜ੍ਹੇ ਕਰਨ ਦੀ ਇਜਾਜ਼ਤ ਨਹੀਂ ਹੋਵੇਗੀ। ਆਉਣ ਵਾਲੇ ਲੇਕ ਕਲੱਬ ਦੇ ਸਾਹਮਣੇ ਨਿਰਧਾਰਤ ਸਰਕਾਰੀ ਪਾਰਕਿੰਗ ਦੀ ਵਰਤੋਂ ਕਰਨ। ਮੈਰਾਥਨ ਵਿੱਚ ਹਿੱਸਾ ਲੈਣ ਵਾਲੇ ਭਾਗੀਦਾਰ ਪੀਜੀਆਈ ਗੇਟ ਨੰਬਰ-3 ਤੋਂ ਦਾਖ਼ਲ ਹੋ ਕੇ ਗੇਟ ਨੰਬਰ-2 (ਨਿਊ ਓਪੀਡੀ ਗੇਟ) ਰਾਹੀਂ ਪੀਈਸੀ ਪਾਰਕਿੰਗ ਇਲਾਕੇ ਤੱਕ ਪਹੁੰਚਣ। ਟ੍ਰੈਫਿਕ ਪੁਲਿਸ ਨੇ ਲੋਕਾਂ ਤੋਂ ਸਹਿਯੋਗ ਦੀ ਅਪੀਲ ਕੀਤੀ ਹੈ।