ਨਵੀਂ ਦਿੱਲੀ : ਲੋਕ ਸਭਾ ਦੀ ਕਾਰਵਾਈ ਦੌਰਾਨ ਅੱਜ ਆਪ੍ਰੇਸ਼ਨ ਸਿੰਦੂਰ 'ਤੇ ਵਿਸ਼ੇਸ਼ ਚਰਚਾ ਹੋ ਰਹੀ ਹੈ। ਇਸ ਦੌਰਾਨ ਕਾਂਗਰਸ ਪਾਰਟੀ ਵੱਲੋਂ ਆਪ੍ਰੇਸ਼ਨ ਸਿੰਦੂਰ 'ਤੇ ਚਰਚਾ ਵਿੱਚ ਹਿੱਸਾ ਲੈਣ ਵਾਲੇ ਬੁਲਾਰਿਆਂ ਦੀ ਸੂਚੀ ਵੀ ਸਾਹਮਣੇ ਆ ਗਈ ਹੈ। ਇਸ ਦੌਰਾਨ ਕਾਂਗਰਸ ਵੱਲੋਂ ਗੌਰਵ ਗੋਗੋਈ, ਪ੍ਰਿਯੰਕਾ ਗਾਂਧੀ, ਦੀਪੇਂਦਰ ਹੁੱਡਾ ਆਪ੍ਰੇਸ਼ਨ ਸਿੰਦੂਰ 'ਤੇ ਪਾਰਟੀ ਦਾ ਪੱਖ ਪੇਸ਼ ਕਰਨਗੇ। ਇਸ ਦੇ ਨਾਲ ਹੀ ਬੁਲਾਰਿਆਂ ਦੀ ਸੂਚੀ ਵਿੱਚ ਪ੍ਰਣੀਤੀ ਸ਼ਿੰਦੇ, ਸਪਤਗਿਰੀ ਉਲਕਾ ਅਤੇ ਬਿਜੇਂਦਰ ਐਸ ਓਲਾ ਦੇ ਨਾਮ ਸ਼ਾਮਲ ਹਨ।
ਦੂਜੇ ਪਾਸੇ ਦੇਸ਼ ਦੇ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਲੋਕ ਸਭਾ ਵਿੱਚ ਆਪਰੇਸ਼ਨ ਸਿੰਦੂਰ 'ਤੇ ਚਰਚਾ ਸ਼ੁਰੂ ਕਰਨਗੇ। ਰਾਜਨਾਥ ਸਿੰਘ ਤੋਂ ਬਾਅਦ ਤੇਜਸਵੀ ਸੂਰਿਆ ਅਤੇ ਬੈਜਯੰਤ ਪਾਂਡਾ ਦੇ ਨਾਮ ਭਾਜਪਾ ਬੁਲਾਰਿਆਂ ਦੀ ਸੂਚੀ ਵਿੱਚ ਸ਼ਾਮਲ ਹਨ।ਇਸ ਤੋਂ ਬਾਅਦ ਡਾਕਟਰ ਐਸ ਜੈਸ਼ੰਕਰ, ਸੰਜੇ ਜੈਸਵਾਲ, ਅਨੁਰਾਗ ਠਾਕੁਰ ਅਤੇ ਕਮਲਜੀਤ ਸਹਿਰਾਵਤ ਹਨ। ਵਿਦੇਸ਼ ਮੰਤਰੀ ਐੱਸ ਜੈਸ਼ੰਕਰ ਅੱਜ ਸ਼ਾਮ 7.30 ਵਜੇ ਲੋਕ ਸਭਾ ਵਿੱਚ ਬੋਲਣਗੇ। ਅਗਲੇ ਦਿਨ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਲੋਕ ਸਭਾ ਵਿੱਚ ਭਾਜਪਾ ਵੱਲੋਂ ਪਹਿਲੇ ਸਪੀਕਰ ਹੋਣਗੇ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਚਰਚਾ ਦੇ ਅੰਤ ਵਿੱਚ ਬੋਲ ਸਕਦੇ ਹਨ। ਪ੍ਰਿਯੰਕਾ ਗਾਂਧੀ ਅੱਜ ਸ਼ਾਮਲ 4.30 ਵਜੇ ਬੋਲਣਗੇ।
12 ਵਜੇ ਜਿਵੇਂ ਹੀ ਸਦਨ ਦੀ ਕਾਰਵਾਈ ਸ਼ੁਰੂ ਹੋਈ ਸਪੀਕਰ ਓਮ ਬਿਰਲਾ ਨੇ ਵਿਰੋਧੀ ਮੈਂਬਰਾਂ ਨੂੰ ਚੇਤਾਵਨੀ ਦਿੰਦੇ ਹੋਏ ਕਿਹਾ ਆਪਣਾ ਤਰੀਕਾ ਸਹੀ ਰੱਖੋ, ਇਹ ਸਦਨ ਹੈ। ਤੁਸੀਂ ਅਪਰੇਸ਼ਨ ਸਿੰਦੂਰ 'ਤੇ ਚਰਚਾ ਕਰਨਾ ਚਾਹੁੰਦੇ ਹੋ ਜਾਂ ਨਹੀਂ। ਜੇਕਰ ਤੁਸੀਂ ਚਾਹੁੰਦੇ ਹੋ, ਤਾਂ ਆਪਣੀ ਸੀਟ 'ਤੇ ਚਲੇ ਜਾਓ। ਸਪੀਕਰ ਦੇ ਵਾਰ-ਵਾਰ ਕਹਿਣ ਦੇ ਬਾਵਜੂਦ ਵਿਰੋਧੀ ਮੈਂਬਰ ਵੈਲ ਵਿੱਚ ਇਕੱਠੇ ਰਹੇ। ਇਸ 'ਤੇ ਸਪੀਕਰ ਨੇ ਕਿਹਾ ਕਿ ਵੈਲ ਵਿੱਚ ਕੋਈ ਵੀ ਮੁੱਦਾ ਉਠਾਉਣ ਨਾਲ ਚਰਚਾ ਨਹੀਂ ਹੋਵੇਗੀ। ਸਦਨ ਵਿੱਚ ਕੁਝ ਨਿਯਮ ਹੁੰਦੇ ਹਨ। ਕਾਰੋਬਾਰ ਸਲਾਹਕਾਰ ਕਮੇਟੀ ਦੀ ਮੀਟਿੰਗ ਵਿੱਚ ਫ਼ੈਸਲਾ ਹੁੰਦਾ ਹੈ ਅਤੇ ਉਸ ਤੋਂ ਬਾਅਦ ਸਦਨ ਵਿੱਚ ਚਰਚਾ ਹੁੰਦੀ ਹੈ। ਲੋਕ ਸਭਾ ਵਿੱਚ ਅਪਰੇਸ਼ਨ ਸਿੰਦੂਰ 'ਤੇ ਚਰਚਾ ਸ਼ੁਰੂ ਨਹੀਂ ਹੋ ਸਕੀ ਅਤੇ ਸਪੀਕਰ ਨੇ ਸਦਨ ਦੀ ਕਾਰਵਾਈ ਇੱਕ ਵਜੇ ਤੱਕ ਮੁਲਤਵੀ ਕਰ ਦਿੱਤੀ।
ਟੀਡੀਪੀ ਵਲੋਂ ਲਵੂ ਸ਼੍ਰੀਕ੍ਰਿਸ਼ਨ ਅਤੇ ਹਰੀਸ਼ ਬਾਲਯੋਗੀ, ਸਮਾਜਵਾਦੀ ਪਾਰਟੀ ਵਲੋਂ ਰਮਾਸ਼ੰਕਰ ਰਾਜਭਰ ਅਤੇ ਛੋਟੇਲਾਲ, ਟੀਐੱਮਸੀ ਵਲੋਂ ਕਲਿਆਣ ਬੈਨਰਜੀ ਅਤੇ ਸਯਾਨੀ ਘੋਸ਼, ਕੇਰਲਾ ਕਾਂਗਰਸ ਵਲੋਂ ਫ੍ਰਾਂਸਿਸ, ਏ ਜ਼ਾਰਾ ਅਤੇ ਕਨੀਮੋਝੀ, ਐੱਨਸੀਪੀ (ਅਜੀਤ ਪਵਾਰ) ਦੇ ਅਮਰ ਕਾਲੇ ਅਤੇ ਐੱਨਸੀਪੀ (ਸ਼ਰਦ ਪਵਾਰ) ਵੱਲੋਂ ਸੁਪ੍ਰਿਆ ਸੂਲੇ ਬੋਲਣਗੇ।