ਅਮਰੀਕਾ ਨੇ ਭਾਰਤ ਨਾਲ ਫ਼ੌਜੀ ਸਹਿਯੋਗ ਨੂੰ ਹੋਰ ਮਜ਼ਬੂਤ ਕਰਨ ਲਈ 2 ਵੱਡੇ ਰੱਖਿਆ ਸਹਾਇਤਾ ਪੈਕੇਜਾਂ ਨੂੰ ਮਨਜ਼ੂਰੀ ਦਿੱਤੀ ਹੈ, ਜਿਨ੍ਹਾਂ ਦੀ ਕੁੱਲ ਕੀਮਤ 3500 ਕਰੋੜ ਰੁਪਏ (428 ਮਿਲੀਅਨ ਡਾਲਰ) ਤੋਂ ਵੱਧ ਹੈ।
ਇਹ ਮਨਜ਼ੂਰੀ ਅਮਰੀਕਾ ਦੇ ਵਿਦੇਸ਼ੀ ਫ਼ੌਜ ਵਿਕਰੀ ਪ੍ਰੋਗਰਾਮ ਤਹਿਤ ਦਿੱਤੀ ਗਈ ਹੈ, ਜਿਸ ਦਾ ਉਦੇਸ਼ ਭਾਰਤ ਕੋਲ ਪਹਿਲਾਂ ਤੋਂ ਮੌਜੂਦ ਏ. ਐੱਚ.-64ਈ ਅਪਾਚੇ ਲੜਾਕੂ ਹੈਲੀਕਾਪਟਰਾਂ ਅਤੇ ਐੱਮ-777-ਏ-2 ਅਲਟਰਾ-ਲਾਈਟ ਹੋਵਿਤਜ਼ਰ ਤੋਪਾਂ ਦੇ ਰੱਖ-ਰਖਾਅ ਨੂੰ ਮਜ਼ਬੂਤ ਕਰਨਾ ਹੈ। ਇਸ ਵਿਚ ਅਪਾਚੇ ਹੈਲੀਕਾਪਟਰ ਨਾਲ ਜੁੜਿਆ ਪੈਕੇਜ ਲਗਭਗ 1650 ਕਰੋੜ ਰੁਪਏ (198.2 ਮਿਲੀਅਨ ਡਾਲਰ) ਦਾ ਹੈ, ਜਿਸ ਦੇ ਤਹਿਤ ਅਮਰੀਕੀ ਸਰਕਾਰ ਅਤੇ ਉਥੋਂ ਦੀਆਂ ਕੰਪਨੀਆਂ ਭਾਰਤ ਨੂੰ ਇੰਜੀਨੀਅਰਿੰਗ, ਤਕਨੀਕੀ ਸਹਾਇਤਾ, ਲੌਜਿਸਟਿਕਸ, ਜ਼ਰੂਰੀ ਦਸਤਾਵੇਜ਼ ਅਤੇ ਸੈਨਿਕਾਂ ਦੀ ਸਿਖਲਾਈ ਵਰਗੀਆਂ ਸਹੂਲਤਾਂ ਦੇਣਗੀਆਂ। ਇਸ ਕੰਮ ਨੂੰ ਮੁੱਖ ਤੌਰ '’ਤੇ ਬੋਇੰਗ ਅਤੇ ਲਾਕਹੀਡ ਮਾਰਟਿਨ ਕੰਪਨੀਆਂ ਸੰਭਾਲਣਗੀਆਂ।
ਦੂਜੇ ਪਾਸੇ, ਹਲਕੀਆਂ ਤੋਪਾਂ ਦੇ ਰੱਖ-ਰਖਾਅ ਦਾ ਪੈਕੇਜ ਕਰੀਬ 1932 ਕਰੋੜ ਰੁਪਏ (230 ਮਿਲੀਅਨ ਡਾਲਰ) ਦਾ ਹੈ, ਜਿਸ ਵਿਚ ਤੋਪਾਂ ਦੇ ਵਾਧੂ ਪੁਰਜ਼ੇ, ਮੁਰੰਮਤ, ਸਿਖਲਾਈ ਅਤੇ ਤਕਨੀਕੀ ਮਦਦ ਸ਼ਾਮਲ ਹੈ।