ਅਡਾਣੀ ਨਿਊ ਇੰਡਸਟਰੀਜ਼ ਲਿਮਟਿਡ (ਏ. ਐੱਨ. ਆਈ. ਐੱਲ.) ਦੀ ਸੋਲਰ ਫੋਟੋਵੋਲਟਿਕ ਉਤਪਾਦਨ ਇਕਾਈ ਅਡਾਣੀ ਸੋਲਰ ਨੂੰ ਵੁੱਡ ਮੈਕੇਂਜੀ ਦੀ 2025 ਦੀ ਪਹਿਲੀ ਛਿਮਾਹੀ ਦੀ ‘ਗਲੋਬਲ ਸੋਲਰ ਮਾਡਿਊਲ ਮੈਨੂਫੈਕਚਰਿੰਗ ਸੂਚੀ’ ’ਚ ਸਥਾਨ ਮਿਲਿਆ ਹੈ। ਕੰਪਨੀ ਨੂੰ ‘ਸ਼੍ਰੇਣੀ ਏ’ ਦਾ ਵਰਗੀਕਰਨ ਦਿੱਤਾ ਗਿਆ ਹੈ ਅਤੇ ਇਹ ਸੂਚੀ ’ਚ 8ਵਾਂ ਸਥਾਨ ਹਾਸਲ ਕਰਨ ’ਚ ਸਫਲ ਰਹੀ।
ਵੁੱਡ ਮੈਕੇਂਜੀ ਨੇ 10 ਮਾਪਦੰਡਾਂ ’ਤੇ ਕੰਪਨੀਆਂ ਦੀ ਸਮੀਖਿਆ ਕੀਤੀ, ਜਿਨ੍ਹਾਂ ’ਚ ਭਰੋਸੇਯੋਗਤਾ ਟੈਸਟਿੰਗ, ਵਿੱਤੀ ਸਿਹਤ, ਉਤਪਾਦਨ ਰਿਕਾਰਡ ਅਤੇ ਪੇਟੈਂਟ ਗਤੀਵਿਧੀਆਂ ਸ਼ਾਮਲ ਹਨ। ‘ਸ਼੍ਰੇਣੀ ਏ’ ’ਚ ਸ਼ਾਮਲ ਹੋਣਾ ਦਰਸਾਉਂਦਾ ਹੈ ਕਿ ਕੰਪਨੀ ਨੇ ਪ੍ਰਦਰਸ਼ਨ ਅਤੇ ਪਾਰਦਰਸ਼ਤਾ ਦੇ ਉੱਚੇ ਮਿਆਰਾਂ ਨੂੰ ਪੂਰਾ ਕੀਤਾ ਹੈ।
ਰਿਪੋਰਟ ’ਚ ਚੋਟੀ ਦਾ ਸਥਾਨ ਜੇ. ਏ. ਸੋਲਰ ਅਤੇ ਟ੍ਰਿਨਾਸੋਲਰ ਨੂੰ ਸਾਂਝੇ ਤੌਰ ’ਤੇ ਮਿਲਿਆ, ਜਿਨ੍ਹਾਂ ਨੇ ਕ੍ਰਮਵਾਰ 91.7 ਅਤੇ 91.6 ਅੰਕ ਹਾਸਲ ਕੀਤੇ। ਅਡਾਣੀ ਸੋਲਰ ਨੇ ਇਸ ਸੂਚੀ ’ਚ 81 ਅੰਕ ਪ੍ਰਾਪਤ ਕੀਤੇ, ਜੋ ਇਸ ਨੂੰ ਗਲੋਬਲ ਸੋਲਰ ਊਰਜਾ ਖੇਤਰ ’ਚ ਇਕ ਪ੍ਰਮੁੱਖ ਖਿਡਾਰੀ ਬਣਾਉਂਦਾ ਹੈ।