ਮਹਿੰਗਾਈ ਅਤੇ ਕੱਚੇ ਮਾਲ ਦੀਆਂ ਵਧਦੀਆਂ ਕੀਮਤਾਂ ਦੇ ਬਾਵਜੂਦ ਸ਼ਹਿਰੀ ਪਰਿਵਾਰਾਂ ਵਿਚ ਪ੍ਰੀਮੀਅਮ ਅਤੇ ਸਿਹਤ ’ਤੇ ਕੇਂਦਰਿਤ ਖਾਣਾ ਪਕਾਉਣ ਵਾਲੇ ਤੇਲ ਦੀ ਮੰਗ ਬਣੀ ਹੋਈ ਹੈ। ਖਾਸ ਕਰ ਕੇ ਕੋਲਡ-ਪ੍ਰੈੱਸਡ ਅਤੇ ਵੁੱਡ-ਪ੍ਰੈੱਸਡ ਤੇਲ ਲੋਕਾਂ ਨੂੰ ਆਕਰਸ਼ਿਤ ਕਰ ਰਹੇ ਹਨ। ਇਹ ਆਮ ਰਿਫਾਇੰਡ ਤੇਲਾਂ ਦੀ ਤੁਲਨਾ ਵਿਚ ਮਹਿੰਗੇ ਹੁੰਦੇ ਹਨ ਪਰ ਸਿਹਤ ਅਤੇ ਗੁਣਵੱਤਾ ਨੂੰ ਲੈ ਕੇ ਵਧਦੀ ਜਾਗਰੂਕਤਾ ਕਾਰਨ ਗਾਹਕ ਇਨ੍ਹਾਂ ਲਈ ਜ਼ਿਆਦਾ ਕੀਮਤ ਚੁਕਾਉਣ ਨੂੰ ਤਿਆਰ ਹਨ। ਕੋਲਡ-ਪ੍ਰੈੱਸਡ ਅਤੇ ਵੁੱਡ-ਪ੍ਰੈੱਸਡ ਤੇਲਾਂ ਦਾ ਬਾਜ਼ਾਰ ਅਜੇ ਛੋਟਾ ਜ਼ਰੂਰ ਹੈ ਪਰ ਤੇਜ਼ੀ ਨਾਲ ਵਧ ਰਿਹਾ ਹੈ। ਸਾਲ 2025 ਵਿਚ ਇਸ ਦਾ ਆਕਾਰ ਲੱਗਭਗ 755 ਕਰੋੜ ਰੁਪਏ ਮਿੱਥਿਆ ਗਿਆ ਹੈ ਅਤੇ 2034 ਤੱਕ ਇਸ ਦੇ 1214 ਕਰੋੜ ਰੁਪਏ ਤੱਕ ਪਹੁੰਚਣ ਦਾ ਅਨੁਮਾਨ ਹੈ। ਕੰਪਨੀਆਂ ਦਾ ਮੰਨਣਾ ਹੈ ਕਿ ਸਿਹਤ ਅਤੇ ਬ੍ਰਾਂਡ ’ਤੇ ਭਰੋਸੇ ਕਾਰਨ ਗਾਹਕ ਇਕ ਵਾਰ ਖਰੀਦਣ ਤੋਂ ਬਾਅਦ ਦੁਬਾਰਾ ਵੀ ਇਨ੍ਹਾਂ ਨੂੰ ਖਰੀਦ ਰਹੇ ਹਨ।
ਮੈਰੀਕੋ ਅਤੇ ਟਾਟਾ ਦੀ ਵੱਡੀ ਤਿਆਰੀ
ਵੱਡੇ ਖਪਤਕਾਰ ਉਤਪਾਦ ਕਾਰੋਬਾਰ ਵੀ ਇਸ ਖੇਤਰ ਵਿਚ ਤੇਜ਼ੀ ਨਾਲ ਵਿਸਥਾਰ ਕਰ ਰਹੇ ਹਨ। ਮੈਰੀਕੋ ਆਪਣੇ ਸਫੋਲਾ ਬ੍ਰਾਂਡ ਦੇ ਤਹਿਤ ਕੋਲਡ-ਪ੍ਰੈੱਸਡ ਤੇਲ ’ਤੇ ਜ਼ਿਆਦਾ ਜ਼ੋਰ ਦੇ ਰਹੀ ਹੈ। ਕੰਪਨੀ ਦੇ ਮੁੱਖ ਕਾਰਜਕਾਰੀ ਸੌਗਤ ਗੁਪਤਾ ਨੇ ਇਸ ਨੂੰ ਉੱਭਰ ਰਿਹਾ ਖਪਤਕਾਰ ਰੁਝਾਨ ਦੱਸਿਆ ਹੈ। ਉਨ੍ਹਾਂ ਦੇ ਅਨੁਸਾਰ, ਇਨ੍ਹਾਂ ਤੇਲਾਂ ਵਿਚ ਕੰਪਨੀ ਦੇ ਰਵਾਇਤੀ ਖਾਣ ਵਾਲੇ ਤੇਲ ਉਤਪਾਦਾਂ ਦੀ ਤੁਲਨਾ ਵਿਚ ਮਾਰਜਿਨ ਵੱਧ ਹੈ। ਟਾਟਾ ਕੰਜ਼ਿਊਮਰ ਪ੍ਰੋਡਕਟਸ ਨੇ ਟਾਟਾ ਸੰਪੰਨ ਦੇ ਰਾਹੀਂ ਇਸ ਬਾਜ਼ਾਰ ਵਿਚ ਪ੍ਰਵੇਸ਼ ਕੀਤਾ ਹੈ।
ਕੰਪਨੀ ਦੇ ਪ੍ਰਮੁੱਖ ਸੁਨੀਲ ਡੀਸੂਜ਼ਾ ਦੇ ਅਨੁਸਾਰ, ਰਿਫਾਇੰਡ ਅਤੇ ਕੋਲਡ-ਪ੍ਰੈੱਸਡ ਤੇਲਾਂ ਨੂੰ ਲੈ ਕੇ ਗਾਹਕਾਂ ਵਿਚ ਭਰੋਸੇ ਦੀ ਘਾਟ ਦਿਖਾਈ ਦਿੰਦੀ ਹੈ। ਟਾਟਾ ਬ੍ਰਾਂਡ ਦੇ ਰਾਹੀਂ ਇਸ ਭਰੋਸੇ ਦੀ ਘਾਟ ਨੂੰ ਦੂਰ ਕਰਨ ਅਤੇ ਕਾਰੋਬਾਰ ਦੇ ਨਾਲ ਮਾਰਜਿਨ ਵਧਾਉਣ ਦਾ ਮੌਕਾ ਦੇਖਿਆ ਜਾ ਰਿਹਾ ਹੈ। ਵਿੱਤੀ ਸਾਲ 2026 ਵਿਚ ਟਾਟਾ ਸੰਪੰਨ ਦੇ ਕੋਲਡ-ਪ੍ਰੈੱਸਡ ਤੇਲ ਕਾਰੋਬਾਰ ਦਾ ਸਾਲਾਨਾ ਰਨ ਰੇਟ ਲੱਗਭਗ 200 ਕਰੋੜ ਰੁਪਏ ਰਿਹਾ।
ਛੋਟੀਆਂ ਕੰਪਨੀਆਂ ਨੂੰ ਵੀ ਮਿਲ ਰਿਹਾ ਫਾਇਦਾ
ਹਾਊਸ ਆਫ ਗੁਲਾਬ ਦੇ ਅਨੁਸਾਰ ਉਸ ਦਾ ਕੋਲਡ-ਪ੍ਰੈੱਸਡ ਤੇਲ ਕਾਰੋਬਾਰ ਪਿਛਲੇ ਸਾਲ ਲੱਗਭਗ 40 ਕਰੋੜ ਤੋਂ ਵਧ ਕੇ ਇਸ ਸਾਲ 70 ਕਰੋੜ ਰੁਪਏ ਤੱਕ ਪਹੁੰਚ ਸਕਦਾ ਹੈ। ਅਗਲੇ ਸਾਲ 120 ਕਰੋੜ ਰੁਪਏ ਪਾਰ ਕਰਨ ਦਾ ਅਨੁਮਾਨ ਹੈ। ਇਨ੍ਹਾਂ ਤੇਲਾਂ ਦੀ ਕੀਮਤ ਆਮ ਤੇਲਾਂ ਤੋਂ ਲੱਗਭਗ 1.7 ਤੋਂ 1.8 ਗੁਣਾ ਵੱਧ ਹੈ। ਅਾਦਿਆ ਆਰਗੈਨਿਕਸ ਦੇ ਮੁਤਾਬਕ ਵੁੱਡ-ਪ੍ਰੈੱਸਡ ਤੇਲ ਖਰੀਦਣ ਵਾਲੇ ਗਾਹਕ ਕੀਮਤ ਵੱਧ ਹੋਣ ਦੇ ਬਾਵਜੂਦ ਦੁਬਾਰਾ ਖਰੀਦਦਾਰੀ ਕਰ ਰਹੇ ਹਨ। ਸਰ੍ਹੋਂ ਸਭ ਤੋਂ ਵੱਡੀ ਸ਼੍ਰੇਣੀ ਹੈ, ਜਿਸ ਤੋਂ ਬਾਅਦ ਮੂੰਗਫਲੀ ਤੇਲ ਦਾ ਸਥਾਨ ਹੈ।
ਰਿਫਾਇੰਡ ਤੇਲ ਤੋਂ ਵੱਖਰੀ ਪ੍ਰਕਿਰਿਆ
ਕੋਲਡ-ਪ੍ਰੈੱਸਡ ਤੇਲ ਘੱਟ ਤਾਪਮਾਨ ’ਤੇ ਬੀਜਾਂ ਤੋਂ ਕੱਢੇ ਜਾਂਦੇ ਹਨ। ਵੁੱਡ-ਪ੍ਰੈੱਸਡ ਤੇਲ ਰਵਾਇਤੀ ਲੱਕੜ ਦੀ ਘਾਣੀ ਤੋਂ ਤਿਆਰ ਕੀਤੇ ਜਾਂਦੇ ਹਨ, ਜਦਕਿ ਕੋਲਡ-ਪ੍ਰੈੱਸਡ ਤੇਲ ਵੱਖ-ਵੱਖ ਪ੍ਰਕਾਰ ਦੀਆਂ ਪ੍ਰੈੱਸ ਮਸ਼ੀਨਾਂ ਤੋਂ ਕੱਢੇ ਜਾ ਸਕਦੇ ਹਨ। ਤੇਲ ਬੀਜ ਅਤੇ ਖੋਪਰਾ ਵਰਗੇ ਕੱਚੇ ਮਾਲ ਦੀ ਕੀਮਤ ਵਧਣ ਨਾਲ ਕੰਪਨੀਆਂ ਦੇ ਮਾਰਜਿਨ ’ਤੇ ਦਬਾਅ ਹੈ। ਕੀਮਤ ਵਧਾਉਣ ’ਤੇ ਗਾਹਕ ਦੂਰ ਹੋ ਸਕਦੇ ਹਨ, ਇਸ ਲਈ ਕੰਪਨੀਆਂ ਫਿਲਹਾਲ ਇਸ ਦਾ ਕੁਝ ਅਸਰ ਖੁਦ ਬਰਦਾਸ਼ਤ ਕਰ ਰਹੀਆਂ ਹਨ। ਹਾਲਾਂਕਿ ਕੱਚੇ ਅਤੇ ਰਿਫਾਇੰਡ ਖਾਣ ਵਾਲੇ ਤੇਲਾਂ ’ਤੇ ਇੰਪੋਰਟ ਡਿਊਟੀ ਵਿਚ ਹਾਲੀਆ ਕਮੀ ਨਾਲ ਆਮ ਤੇਲ ਸਸਤੇ ਹੋਣ ਦੀ ਸਥਿਤੀ ਵਿਚ ਪ੍ਰੀਮੀਅਮ ਤੇਲ ਅਤੇ ਆਮ ਤੇਲ ਦੇ ਵਿਚਕਾਰ ਕੀਮਤ ਦਾ ਅੰਤਰ ਵਧ ਸਕਦਾ ਹੈ।