ਰਾਸ਼ਟਰੀ ਜਾਂਚ ਏਜੰਸੀ (NIA) ਨੇ ਲਾਲ ਕਿਲਾ ਇਲਾਕੇ ਵਿੱਚ ਹੋਏ ਕਾਰ ਬੰਬ ਧਮਾਕੇ ਦੇ ਮਾਮਲੇ ਵਿੱਚ 10 ਮੁਲਜ਼ਮਾਂ ਵਿਰੁੱਧ 7,500 ਪੰਨਿਆਂ ਦੀ ਚਾਰਜਸ਼ੀਟ ਦਾਇਰ ਕੀਤੀ ਹੈ। ਪਿਛਲੇ ਸਾਲ 10 ਨਵੰਬਰ ਨੂੰ ਹੋਏ ਇਸ ਭਿਆਨਕ ਧਮਾਕੇ ਵਿੱਚ 11 ਲੋਕਾਂ ਦੀ ਮੌਤ ਹੋ ਗਈ ਸੀ ਅਤੇ ਕਈ ਹੋਰ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋਏ ਸਨ। ਇਹ ਚਾਰਜਸ਼ੀਟ ਦਿੱਲੀ ਦੀ ਪਟਿਆਲਾ ਹਾਊਸ ਕੋਰਟ ਸਥਿਤ NIA ਦੀ ਵਿਸ਼ੇਸ਼ ਅਦਾਲਤ ਵਿੱਚ ਪੇਸ਼ ਕੀਤੀ ਗਈ ਹੈ।
ਅੱਤਵਾਦੀ ਸੰਗਠਨ ਅਤੇ 'ਆਪ੍ਰੇਸ਼ਨ ਹੈਵਨਲੀ ਹਿੰਦ'
ਜਾਂਚ ਅਨੁਸਾਰ ਮੁੱਖ ਮੁਲਜ਼ਮ ਡਾ. ਉਮਰ ਉਨ ਨਬੀ (ਮ੍ਰਿਤਕ) ਸਮੇਤ ਸਾਰੇ 10 ਮੁਲਜ਼ਮ ਅਲ-ਕਾਇਦਾ ਦੇ ਸਹਾਇਕ ਸੰਗਠਨ 'ਅੰਸਾਰ ਗਜ਼ਵਤ-ਉਲ-ਹਿੰਦ' ਨਾਲ ਜੁੜੇ ਹੋਏ ਸਨ। ਮੁਲਜ਼ਮਾਂ ਨੇ 'ਆਪ੍ਰੇਸ਼ਨ ਹੈਵਨਲੀ ਹਿੰਦ' ਨਾਮ ਦੀ ਇੱਕ ਸਾਜ਼ਿਸ਼ ਰਚੀ ਸੀ, ਜਿਸਦਾ ਮੁੱਖ ਉਦੇਸ਼ ਭਾਰਤ ਦੀ ਲੋਕਤੰਤਰੀ ਸਰਕਾਰ ਨੂੰ ਉਖਾੜ ਕੇ ਸ਼ਰੀਅਤ ਸ਼ਾਸਨ ਲਾਗੂ ਕਰਨਾ ਸੀ। ਇਸ ਦੇ ਲਈ ਉਨ੍ਹਾਂ ਨੇ ਨਵੇਂ ਮੈਂਬਰਾਂ ਦੀ ਭਰਤੀ ਕੀਤੀ ਅਤੇ ਹਿੰਸਕ ਵਿਚਾਰਧਾਰਾ ਦਾ ਪ੍ਰਚਾਰ ਕੀਤਾ।
ਮੈਡੀਕਲ ਪੇਸ਼ੇਵਰਾਂ ਦੀ ਸ਼ਮੂਲੀਅਤ
ਹੈਰਾਨੀਜਨਕ ਤੌਰ 'ਤੇ ਇਸ ਸਾਜ਼ਿਸ਼ ਵਿੱਚ ਕਈ ਕੱਟੜਪੰਥੀ ਬਣੇ ਮੈਡੀਕਲ ਪੇਸ਼ੇਵਰ ਸ਼ਾਮਲ ਸਨ। ਮੁੱਖ ਮੁਲਜ਼ਮ ਡਾ. ਉਮਰ ਉਨ ਨਬੀ, ਜੋ ਫਰੀਦਾਬਾਦ ਦੀ ਅਲ-ਫਲਾਹ ਯੂਨੀਵਰਸਿਟੀ ਵਿੱਚ ਸਹਾਇਕ ਪ੍ਰੋਫੈਸਰ ਸੀ, ਇੱਕ ਆਤਮਘਾਤੀ ਹਮਲੇ ਵਿੱਚ ਮਾਰਿਆ ਜਾ ਚੁੱਕਾ ਹੈ। ਚਾਰਜਸ਼ੀਟ ਵਿੱਚ ਸ਼ਾਮਲ ਹੋਰ ਮੁਲਜ਼ਮਾਂ ਵਿੱਚ ਆਮਿਰ ਰਾਸ਼ਿਦ ਮੀਰ, ਜਾਸਿਰ ਬਿਲਾਲ ਵਾਨੀ, ਡਾ. ਮੁਜ਼ੱਮਿਲ ਸ਼ਕੀਲ, ਡਾ. ਆਦਿਲ ਅਹਿਮਦ ਰਾਥਰ, ਡਾ. ਸ਼ਾਹੀਨ ਸਈਦ ਅਤੇ ਹੋਰ ਕਈ ਨਾਮ ਸ਼ਾਮਲ ਹਨ।
ਵਿਆਪਕ ਜਾਂਚ ਤੇ ਵਿਗਿਆਨਕ ਸਬੂਤ
NIA ਨੇ ਇਸ ਮਾਮਲੇ ਦੀ ਜਾਂਚ ਦੇਸ਼ ਦੇ ਕਈ ਸੂਬੇ ਜਿਵੇਂ ਜੰਮੂ-ਕਸ਼ਮੀਰ, ਹਰਿਆਣਾ, ਉੱਤਰ ਪ੍ਰਦੇਸ਼, ਮਹਾਰਾਸ਼ਟਰ ਅਤੇ ਗੁਜਰਾਤ ਵਿੱਚ ਕੀਤੀ। ਜਾਂਚ ਦੌਰਾਨ 588 ਗਵਾਹਾਂ ਦੇ ਬਿਆਨ, 395 ਦਸਤਾਵੇਜ਼ ਅਤੇ 200 ਤੋਂ ਵੱਧ ਜ਼ਬਤ ਕੀਤੀ ਗਈ ਸਮੱਗਰੀ ਸਬੂਤ ਵਜੋਂ ਪੇਸ਼ ਕੀਤੀ ਗਈ ਹੈ,। NIA ਨੇ ਡੀਐਨਏ ਫਿੰਗਰਪ੍ਰਿੰਟਿੰਗ ਰਾਹੀਂ ਮ੍ਰਿਤਕ ਮੁਲਜ਼ਮ ਡਾ. ਉਮਰ ਦੀ ਪਛਾਣ ਸਥਾਪਿਤ ਕੀਤੀ।
ਘਾਤਕ ਵਿਸਫੋਟਕਾਂ ਅਤੇ ਡਰੋਨਾਂ ਦਾ ਪ੍ਰੀਖਣ
ਮੁਲਜ਼ਮਾਂ ਨੇ ਬਾਜ਼ਾਰ ਵਿੱਚ ਆਸਾਨੀ ਨਾਲ ਮਿਲਣ ਵਾਲੇ ਰਸਾਇਣਾਂ ਦੀ ਵਰਤੋਂ ਕਰਕੇ TATP ਨਾਮ ਦਾ ਵਿਸਫੋਟਕ ਤਿਆਰ ਕੀਤਾ ਸੀ। ਜਾਂਚ ਵਿੱਚ ਇਹ ਵੀ ਖੁਲਾਸਾ ਹੋਇਆ ਕਿ ਉਨ੍ਹਾਂ ਨੇ ਸੁਰੱਖਿਆ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਉਣ ਲਈ ਰਾਕਟ ਅਤੇ ਡਰੋਨਾਂ ਰਾਹੀਂ ਲਗਾਏ ਜਾਣ ਵਾਲੇ ਆਈਈਡੀ (IED) ਦਾ ਪ੍ਰੀਖਣ ਵੀ ਕੀਤਾ ਸੀ। ਇਸ ਮਾਮਲੇ ਵਿੱਚ ਹੁਣ ਤੱਕ ਕੁੱਲ 11 ਗ੍ਰਿਫ਼ਤਾਰੀਆਂ ਹੋਈਆਂ ਹਨ ਅਤੇ ਫਰਾਰ ਮੁਲਜ਼ਮਾਂ ਦੀ ਭਾਲ ਜਾਰੀ ਹੈ।