ਸੁਨਾਮ (ਰਮੇਸ਼ ਗਰਗ) : ਸੁਨਾਮ ਦੇ ਮਾਇਆ ਗਾਰਡਨ ਵਿਖੇ ਸਥਿਤ ਸ਼੍ਰੀ ਸ਼ਿਵ ਮੰਦਰ ਦੇ ਵਿੱਚ ਚੱਲ ਰਹੀ ਸੱਤ ਰੋਜ਼ਾ ਸ਼੍ਰੀਮਦ ਭਾਗਵਤ ਕਥਾ ਗਿਆਨ ਯਗ ਦੇ ਚੌਥੇ ਦਿਨ ਭਗਵਾਨ ਸ਼੍ਰੀਕ੍ਰਿਸ਼ਨ ਦਾ ਜਨਮ ਉਤਸਵ ਧੂਮਧਾਮ ਨਾਲ ਮਨਾਇਆ ਗਿਆ। ਕਥਾ ਦੌਰਾਨ ਜਦੋਂ ਪ੍ਰਸਿੱਧ ਭਜਨ “ਨੰਦ ਕੇ ਘਰ ਆਨੰਦ ਭਯੋ, ਜੈ ਕਨ੍ਹਈਆ ਲਾਲ ਕੀ” ਗੂੰਜਿਆ, ਤਾਂ ਪੂਰਾ ਕਥਾ ਪੰਡਾਲ ਭਗਤੀ ਰਸ ਵਿੱਚ ਝੂਮ ਉਠਿਆ। ਭਗਤਾਂ ਨੇ ਭਗਵਾਨ ਦੇ ਜਨਮ ਦੀ ਖੁਸ਼ੀ ਵਿੱਚ ਨਾਚ ਗੀਤਾਂ ਨਾਲ ਝੂਮ ਕੇ ਮਹੌਲ ਨੂੰ ਭਗਤੀਮਈ ਬਣਾ ਦਿੱਤਾ।
ਕਥਾ ਪੰਡਾਲ ਨੂੰ ਗੁਬਾਰਿਆਂ ਅਤੇ ਫੁੱਲਾਂ ਦੀਆਂ ਮਾਲਾਵਾਂ ਨਾਲ ਸੁੰਦਰ ਢੰਗ ਨਾਲ ਸਜਾਇਆ ਗਿਆ ਸੀ। ਕਥਾਵਾਚਕ ਸਵਾਮੀ ਰਮੇਸ਼ਾਨੰਦ ਜੀ ਮਹਾਰਾਜ ਨੇ ਸ਼੍ਰੀਕ੍ਰਿਸ਼ਨ ਦੀਆਂ ਬਾਲ ਲੀਲਾਵਾਂ ਦਾ ਮਨਮੋਹਕ ਵਰਣਨ ਕੀਤਾ ਅਤੇ ਧਰਮ, ਅਰਥ, ਕਾਮ ਅਤੇ ਮੋਖ ਦੇ ਮਹੱਤਵ ’ਤੇ ਵਿਸਤ੍ਰਿਤ ਚਰਚਾ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਜਦੋਂ ਵੀ ਦੁਨੀਆਂ ਵਿੱਚ ਅਨਿਆਇ ਅਤੇ ਅਧਰਮ ਵਧਦਾ ਹੈ, ਤਦੋਂ ਪ੍ਰਭੂ ਵੱਖ-ਵੱਖ ਰੂਪਾਂ ਵਿੱਚ ਅਵਤਾਰ ਧਾਰਨ ਕਰਕੇ ਧਰਮ ਦੀ ਸਥਾਪਨਾ ਕਰਦੇ ਹਨ। ਕੰਸ ਦੇ ਅਤਿਆਚਾਰਾਂ ਦਾ ਅੰਤ ਕਰਨ ਲਈ ਭਗਵਾਨ ਸ਼੍ਰੀਕ੍ਰਿਸ਼ਨ ਦਾ ਜਨਮ ਹੋਇਆ ਸੀ।
ਜਦੋਂ ਕਥਾ ਦੌਰਾਨ ਬਾਸੁਦੇਵ ਤੇ ਬਾਲ ਗੋਪਾਲ ਦੀ ਝਾਂਕੀ ਦਰਸ਼ਨ ਲਈ ਪ੍ਰਦਰਸ਼ਿਤ ਕੀਤੀ ਗਈ, ਤਾਂ ਸਾਰੇ ਸ਼ਰਧਾਲੂਆਂ ਨੇ “ਜੈ ਕਨ੍ਹਈਆ ਲਾਲ ਕੀ” ਦੇ ਨਾਅਰੇ ਲਗਾ ਕੇ ਭਗਤੀਮਈ ਨ੍ਰਿਤ ਕਰਨਾ ਸ਼ੁਰੂ ਕਰ ਦਿੱਤਾ।
ਸਵਾਮੀ ਜੀ ਨੇ ਆਪਣੇ ਪ੍ਰਵਚਨ ਦੌਰਾਨ ਕਿਹਾ ਕਿ ਜੇਕਰ ਜੀਵਨ ਵਿੱਚ ਸਹੀ ਰਾਹ ਤੇ ਤੁਰਨਾ ਹੈ, ਤਾਂ ਸੱਚੇ ਸੰਕਲਪ ਲੈਣੇ ਬਹੁਤ ਜ਼ਰੂਰੀ ਹਨ। ਹਰ ਬੱਚੇ ਨੂੰ ਆਪਣੇ ਮਾਤਾ-ਪਿਤਾ ਅਤੇ ਗੁਰੂ ਦੀ ਗੱਲ ਮੰਨਣੀ ਚਾਹੀਦੀ ਹੈ, ਕਿਉਂਕਿ ਜਿਨ੍ਹਾਂ ਬੱਚਿਆਂ ’ਤੇ ਮਾਤਾ-ਪਿਤਾ ਦਾ ਆਸ਼ੀਰਵਾਦ ਹੁੰਦਾ ਹੈ, ਉਹਨਾਂ ਨੂੰ ਸੰਸਾਰ ਦੀ ਹਰ ਖੁਸ਼ੀ ਪ੍ਰਾਪਤ ਹੁੰਦੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਮਾਤਾ-ਪਿਤਾ ਨੂੰ ਚਾਹੀਦਾ ਹੈ ਕਿ ਉਹ ਆਪਣੇ ਬੱਚਿਆਂ ਨੂੰ ਭਾਗਵਤ ਕਥਾ, ਸਤਸੰਗ ਅਤੇ ਕੀਰਤਨ ਵਰਗੇ ਧਾਰਮਿਕ ਸਮਾਗਮਾਂ ਵਿੱਚ ਜ਼ਰੂਰ ਲੈ ਕੇ ਜਾਣ, ਤਾਂ ਜੋ ਬੱਚਿਆਂ ਵਿੱਚ ਚੰਗੇ ਸੰਸਕਾਰ ਵਿਕਸਤ ਹੋਣ।
ਕਥਾ ਦੌਰਾਨ ਵਿਆਸ ਪੂਜਾ, ਭਜਨ, ਝਾਂਕੀ ਅਤੇ ਆਰਤੀ ਦੇ ਸਮੇਂ ਸ਼ਰਧਾਲੂਆਂ ਦਾ ਉਤਸ਼ਾਹ ਦੇਖਣ ਵਾਲਾ ਸੀ। ਮਾਇਆ ਗਾਰਡਨ ਪੂਰੀ ਤਰ੍ਹਾਂ ਭਗਤੀ ਰਸ ਵਿੱਚ ਡੁੱਬਿਆ ਹੋਇਆ ਦਿਖਾਈ ਦਿੱਤਾ।
ਕਥਾ ਦੇ ਅੰਤ ’ਤੇ ਪ੍ਰਸਿੱਧ ਆਰਤੀ “ਸ਼੍ਰੀ ਭਾਗਵਤ ਭਗਵਾਨ ਕੀ ਹੈ ਆਰਤੀ, ਪਾਪੀਆਂ ਕੋ ਪਾਪ ਸੇ ਹੈ ਤਾਰਤੀ” ਦਾ ਸਮੂਹਿਕ ਗਾਇਨ ਕੀਤਾ ਗਿਆ। ਇਸ ਤੋਂ ਬਾਅਦ ਸਾਰੇ ਸ਼ਰਧਾਲੂਆਂ ਵਿੱਚ ਮਹਾਪ੍ਰਸਾਦ ਦਾ ਵਿਤਰਨ ਕੀਤਾ ਗਿਆ।
ਇਸ ਧਾਰਮਿਕ ਸਮਾਗਮ ਦੀ ਪ੍ਰਧਾਨਗੀ ਸਵਾਮੀ ਦਾਮੋਦਰ ਸ਼ਰਣ ਜੀ (ਹਰਿਦੁਆਰ) ਨੇ ਕੀਤੀ, ਜਦਕਿ ਸਵਾਮੀ ਸ਼ੰਕਰ ਮੁਨੀ ਜੀ ਮਹਾਰਾਜ (ਨਿਲੋਵਾਲ ਵਾਲੇ) ਨੇ ਭਗਤਾਂ ਨੂੰ ਸੰਬੋਧਨ ਕਰਦੇ ਹੋਏ ਧਰਮ ਅਨੁਸਾਰ ਜੀਵਨ ਜੀਉਣ ਦਾ ਸੰਦੇਸ਼ ਦਿੱਤਾ।
ਅੱਜ ਕਥਾ ਵਿੱਚ ਨਰਿੰਦਰਪਾਲ ਸ਼ਰਮਾ ਸੈਕਟਰੀ ਮਾਰਕੀਟ ਕਮੇਟੀ ਅਤੇ ਬ੍ਰਿਜ ਬਾਲਾ, ਐਡਵੋਕੇਟ ਪੁਰਸ਼ੋਤਮ ਬਾਂਸਲ ਅਤੇ ਸੁਮਿਤਰਾ ਬਾਂਸਲ, ਉਦਯੋਗਪਤੀ ਭੂਸ਼ਣ ਕਾਂਸਲ ਅਤੇ ਮੀਨੂ ਕਾਂਸਲ, ਅਜੈ ਕਾਂਸਲ, ਅੰਕਿਤ ਕਾਂਸਲ ਅਤੇ ਹੋਰ ਕਮੇਟੀ ਸ਼ਿਵ ਮੰਦਰ ਅੰਗਾਰੀਆਂ ਵਾਲਾ, ਸੁਬੇਦਾਰ ਦਰਸ਼ਨ ਸਿੰਘ, ਜਗਦੀਸ਼ ਵਰਮਾ ਅਤੇ ਰਾਜੇਸ਼ ਕੁਮਾਰ ਸਾਬਕਾ ਪ੍ਰਧਾਨ ਸ਼੍ਰੀ ਨੈਨਾ ਦੇਵੀ ਮੰਦਰ ਕਮੇਟੀ ਨੂੰ ਸਨਮਾਨਿਤ ਕੀਤਾ ਗਿਆ।