ਉੱਤਰ ਪ੍ਰਦੇਸ਼ ਦੇ ਸਿਧਾਰਥਨਗਰ ਜ਼ਿਲ੍ਹੇ ਵਿੱਚ ਇੱਕ ਦਿਲ ਕੰਬਾਊ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਪਾਣੀ ਦੀ ਟੰਕੀ 'ਤੇ ਫਸੇ ਦੋ ਜਵਾਕਾਂ ਨੂੰ ਭਾਰਤੀ ਵਾਯੂ ਸੈਨਾ (IAF) ਨੇ ਇੱਕ ਚੁਣੌਤੀਪੂਰਨ ਮਿਸ਼ਨ ਰਾਹੀਂ ਸੁਰੱਖਿਅਤ ਬਾਹਰ ਕੱਢ ਲਿਆ। ਇਹ ਬੱਚੇ ਪਿਛਲੇ 15 ਘੰਟਿਆਂ ਤੋਂ ਮੌਤ ਅਤੇ ਜ਼ਿੰਦਗੀ ਦੇ ਵਿਚਕਾਰ ਝੂਲ ਰਹੇ ਸਨ। ਇਹ ਘਟਨਾ ਸ਼ਨੀਵਾਰ ਦੁਪਹਿਰ ਕਰੀਬ ਦੋ ਵਜੇ ਦੀ ਹੈ ਜਦੋਂ ਕਾਂਸ਼ੀਰਾਮ ਆਵਾਸ ਸਥਿਤ ਪਾਣੀ ਦੀ ਟੰਕੀ 'ਤੇ ਪੰਜ ਬੱਚੇ ਚੜ੍ਹੇ ਹੋਏ ਸਨ। ਅਚਾਨਕ ਟੈਂਕੀ ਦੀ ਜਰਜਰ ਪੋੜੀ ਟੁੱਟ ਕੇ ਹੇਠਾਂ ਡਿੱਗ ਗਈ। ਇਸ ਹਾਦਸੇ ਵਿੱਚ ਤਿੰਨ ਬੱਚੇ ਹੇਠਾਂ ਡਿੱਗ ਗਏ, ਜਿਨ੍ਹਾਂ ਵਿੱਚੋਂ ਇੱਕ ਦੀ ਦੁਖਦਾਈ ਮੌਤ ਹੋ ਗਈ ਤੇ ਦੋ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਏ। ਦੋ ਹੋਰ ਪਵਨ ਅਤੇ ਕੱਲੂ, ਟੰਕੀ ਦੇ ਸਭ ਤੋਂ ਉਪਰਲੇ ਹਿੱਸੇ 'ਤੇ ਹੀ ਫਸੇ ਰਹਿ ਗਏ।
ਰਾਤ ਭਰ ਡਰੋਨ ਰਾਹੀਂ ਪਹੁੰਚਾਈ ਮਦਦ
ਭਾਰੀ ਬਾਰਿਸ਼ ਅਤੇ ਸੁਰੱਖਿਅਤ ਰਸਤਾ ਨਾ ਹੋਣ ਕਾਰਨ ਐਸ.ਡੀ.ਆਰ.ਐਫ. (SDRF) ਦੀ ਟੀਮ ਰੇਸਕਿਊ ਆਪ੍ਰੇਸ਼ਨ ਸ਼ੁਰੂ ਨਹੀਂ ਕਰ ਸਕੀ। ਪ੍ਰਸ਼ਾਸਨ ਨੇ ਬੱਚਿਆਂ ਤੱਕ ਮਦਦ ਪਹੁੰਚਾਉਣ ਲਈ ਡਰੋਨ ਦਾ ਸਹਾਰਾ ਲਿਆ, ਜਿਸ ਰਾਹੀਂ ਉਨ੍ਹਾਂ ਨੂੰ ਰੱਸੀ, ਪਾਣੀ ਦੀਆਂ ਬੋਤਲਾਂ, ਬਿਸਕੁਟ ਅਤੇ ਰਾਤ ਦਾ ਖਾਣਾ ਪਹੁੰਚਾਇਆ ਗਿਆ।
ਵਾਯੂ ਸੈਨਾ ਦਾ 'ਦੇਵਦੂਤ' ਬਣ ਕੇ ਆਉਣਾ
ਜਦੋਂ ਜ਼ਮੀਨ ਤੋਂ ਰੇਸਕਿਊ ਸੰਭਵ ਨਹੀਂ ਲੱਗ ਰਿਹਾ ਸੀ, ਤਾਂ ਭਾਰਤੀ ਵਾਯੂ ਸੈਨਾ ਦੇ Mi-17 V5 ਹੈਲੀਕਾਪਟਰ ਨੂੰ ਤਾਇਨਾਤ ਕੀਤਾ ਗਿਆ। ਐਤਵਾਰ ਸਵੇਰੇ ਕਰੀਬ ਪੰਜ ਵਜੇ ਵਾਯੂ ਸੈਨਾ ਦੇ ਜਵਾਨਾਂ ਨੇ ਆਪਣੀ ਕੁਸ਼ਲਤਾ ਨਾਲ ਇੱਕ-ਇੱਕ ਕਰਕੇ ਦੋਵਾਂ ਨਾਬਾਲਗਾਂ ਨੂੰ ਸੁਰੱਖਿਅਤ ਹੇਠਾਂ ਉਤਾਰ ਲਿਆ। ਬੱਚਿਆਂ ਦੇ ਸਹੀ-ਸਲਾਮਤ ਵਾਪਸ ਆਉਣ 'ਤੇ ਪਰਿਵਾਰਾਂ ਅਤੇ ਪ੍ਰਸ਼ਾਸਨ ਨੇ ਸੁਖ ਦਾ ਸਾਹ ਲਿਆ।