ਤਿਰੂਵਨੰਤਪੁਰਮ : ਕੇਰਲ ਵਿਧਾਨ ਸਭਾ ਚੋਣਾਂ ਵਿੱਚ ਕਾਂਗਰਸ ਦੀ 100 ਤੋਂ ਵੱਧ ਸੀਟਾਂ ਨਾਲ ਹੋਈ ਸ਼ਾਨਦਾਰ ਜਿੱਤ ਨੇ ਜਿੱਥੇ ਸਿਆਸੀ ਮਾਹਰਾਂ ਨੂੰ ਹੈਰਾਨ ਕਰ ਦਿੱਤਾ ਹੈ, ਉੱਥੇ ਹੀ ਇਸ ਜਿੱਤ ਦੇ ਪਿੱਛੇ ਕੰਮ ਕਰਨ ਵਾਲੇ ਰਣਨੀਤੀਕਾਰਾਂ ਦੀ ਚਰਚਾ ਵੀ ਤੇਜ਼ ਹੋ ਗਈ ਹੈ। ਇਸ ਜਿੱਤ ਦੇ ਮੁੱਖ ਸੂਤਰਧਾਰਾਂ ਵਿੱਚੋਂ ਇੱਕ ਨਾਂ ਪੰਜਾਬ ਦੇ ਗੌਤਮ ਸੇਠ ਦਾ ਸਾਹਮਣੇ ਆ ਰਿਹਾ ਹੈ, ਜਿਨ੍ਹਾਂ ਨੇ ਪਾਰਟੀ ਦੀ ਸੰਚਾਰ ਰਣਨੀਤੀ ਨੂੰ ਨਵੀਂ ਦਿਸ਼ਾ ਦੇਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ।
ਦੀਪਾ ਦਾਸਮੁਸ਼ੀ ਦੀ ਅਗਵਾਈ ਹੇਠ ਤਿਆਰ ਕੀਤੀ ਰਣਨੀਤੀ
ਗੌਤਮ ਸੇਠ ਨੇ ਇਹ ਜ਼ਿੰਮੇਵਾਰੀ ਕੇਰਲ ਮੁਹਿੰਮ ਦੀ ਮੁੱਖ ਰਣਨੀਤੀਕਾਰ ਦੀਪਾ ਦਾਸਮੁਸ਼ੀ ਦੀ ਅਗਵਾਈ ਹੇਠ ਨਿਭਾਈ। 2026 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਸੇਠ ਨੇ ਮੀਡੀਆ ਆਪਰੇਸ਼ਨਾਂ ਦੀ ਕਮਾਨ ਸੰਭਾਲੀ, ਜਿਸ ਵਿੱਚ ਪ੍ਰੈਸ ਕਾਨਫਰੰਸਾਂ ਦਾ ਤਾਲਮੇਲ, ਬੁਲਾਰਿਆਂ ਦੀ ਲਾਈਨ ਤੈਅ ਕਰਨਾ ਅਤੇ ਵਿਰੋਧੀ ਧਿਰਾਂ ਦੇ ਹਮਲਿਆਂ ਦਾ ਸਮੇਂ ਸਿਰ ਅਤੇ ਪ੍ਰਭਾਵਸ਼ਾਲੀ ਜਵਾਬ ਦੇਣਾ ਸ਼ਾਮਲ ਸੀ। ਇਸ ਸੁਚੱਜੀ ਰਣਨੀਤੀ ਕਾਰਨ ਹੀ ਪੂਰੀ ਚੋਣ ਮੁਹਿੰਮ ਦੌਰਾਨ ਕਾਂਗਰਸ ਦਾ ਸੰਦੇਸ਼ ਸਪੱਸ਼ਟ ਅਤੇ ਇੱਕਸਾਰ ਰਿਹਾ।
ਗੌਤਮ ਸੇਠ ਦਾ ਸਿਆਸੀ ਸਫ਼ਰ ਕਾਫ਼ੀ ਦਿਲਚਸਪ ਰਿਹਾ ਹੈ। 16 ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਨੇ ਰਾਹੁਲ ਗਾਂਧੀ ਨੂੰ ਲਗਾਤਾਰ 118 ਦਿਨਾਂ ਤੱਕ ਈਮੇਲ ਲਿਖੇ, ਜਿਸ ਤੋਂ ਬਾਅਦ ਮਿਲੇ ਜਵਾਬ ਨੇ ਉਨ੍ਹਾਂ ਦੀ ਜ਼ਿੰਦਗੀ ਦਾ ਰੁਖ ਬਦਲ ਦਿੱਤਾ। ਉਨ੍ਹਾਂ ਨੇ ਆਸਕਰ ਫਰਨਾਂਡਿਸ ਵਰਗੇ ਦਿੱਗਜ ਨੇਤਾਵਾਂ ਨਾਲ ਇੰਟਰਨ ਵਜੋਂ ਕੰਮ ਕੀਤਾ ਅਤੇ ਸ਼ੀਲਾ ਦੀਕਸ਼ਿਤ, ਬੂਟਾ ਸਿੰਘ ਅਤੇ ਮੋਹਸਿਨਾ ਕਿਦਵਈ ਵਰਗੇ ਸੀਨੀਅਰ ਆਗੂਆਂ ਨਾਲ ਰਹਿ ਕੇ ਸੰਗਠਨਾਤਮਕ ਸਮਝ ਵਿਕਸਿਤ ਕੀਤੀ।
ਪੰਜਾਬ ਨਾਲ ਸਬੰਧਤ ਗੌਤਮ ਸੇਠ ਮਹਿਜ਼ 19 ਸਾਲ ਦੀ ਉਮਰ ਵਿੱਚ ਪੰਜਾਬ ਕਾਂਗਰਸ ਦੇ ਬੁਲਾਰੇ ਬਣ ਗਏ ਸਨ। ਇਸ ਤੋਂ ਇਲਾਵਾ ਉਹ 25 ਸਾਲ ਦੀ ਉਮਰ ਵਿੱਚ ਪੰਜਾਬ ਕਾਂਗਰਸ ਦੇ ਸਭ ਤੋਂ ਨੌਜਵਾਨ ਜਨਰਲ ਸੈਕਟਰੀ (ਸੰਗਠਨ) ਵਜੋਂ ਵੀ ਸੇਵਾਵਾਂ ਨਿਭਾ ਚੁੱਕੇ ਹਨ। 2019 ਤੋਂ 2021 ਤੱਕ ਉਨ੍ਹਾਂ ਨੇ ਯੂਥ ਕਾਂਗਰਸ ਦੇ ਰਾਸ਼ਟਰੀ ਬੁਲਾਰੇ ਵਜੋਂ ਵੀ ਕੰਮ ਕੀਤਾ।
ਗੌਤਮ ਸੇਠ ਦੀ ਰਣਨੀਤਕ ਮਹਾਰਤ ਤੇਲੰਗਾਨਾ ਵਿਧਾਨ ਸਭਾ ਚੋਣਾਂ ਵਿੱਚ ਵੀ ਦੇਖਣ ਨੂੰ ਮਿਲੀ ਸੀ, ਜਿੱਥੇ ਕਾਂਗਰਸ ਨੇ ਜਿੱਤ ਦਰਜ ਕੀਤੀ ਸੀ। ਇਸ ਤੋਂ ਬਾਅਦ 2024 ਦੀਆਂ ਲੋਕ ਸਭਾ ਚੋਣਾਂ ਵਿੱਚ ਕੇਰਲ ਦੀਆਂ 20 ਵਿੱਚੋਂ 18 ਸੀਟਾਂ ਜਿੱਤਣ ਵਿੱਚ ਵੀ ਉਨ੍ਹਾਂ ਦੀ ਮੀਡੀਆ ਰਣਨੀਤੀ ਦਾ ਵੱਡਾ ਯੋਗਦਾਨ ਰਿਹਾ।
ਸਿਆਸੀ ਵਿਸ਼ਲੇਸ਼ਕਾਂ ਅਨੁਸਾਰ, ਕੇਰਲ ਦੀ ਇਹ ਜਿੱਤ ਸਿਰਫ਼ ਜਨਤਕ ਸਮਰਥਨ ਹੀ ਨਹੀਂ, ਸਗੋਂ ਗੌਤਮ ਸੇਠ ਵਰਗੇ ਨੌਜਵਾਨ ਰਣਨੀਤੀਕਾਰਾਂ ਦੀ ਸੁਚੱਜੀ ਯੋਜਨਾਬੰਦੀ ਅਤੇ 'ਵਾਰ ਰੂਮ' ਦੇ ਪ੍ਰਭਾਵਸ਼ਾਲੀ ਪ੍ਰਬੰਧਨ ਦਾ ਨਤੀਜਾ ਹੈ। ਸੇਠ ਅੱਜ ਕਾਂਗਰਸ ਦੀ ਉਸ ਨਵੀਂ ਪੀੜ੍ਹੀ ਦੀ ਨੁਮਾਇੰਦਗੀ ਕਰ ਰਹੇ ਹਨ ਜੋ ਸੁਰਖੀਆਂ ਤੋਂ ਦੂਰ ਰਹਿ ਕੇ ਪਾਰਟੀ ਲਈ ਮਜ਼ਬੂਤ ਨੀਂਹ ਤਿਆਰ ਕਰ ਰਹੀ ਹੈ।