ਐਸ.ਡੀ.ਐਮ. ਖਰੜ ਨੇ ਬਰਸਾਤ ਦੇ ਮੌਸਮ ਦੌਰਾਨ ਹੜਾਂ ਤੋਂ ਰੋਕਥਾਮ ਲਈ ਵੱਖ ਵੱਖ ਵਿਭਾਗਾਂ ਦੇ ਮੁਖੀਆਂ ਨਾਲ ਕੀਤੀ ਮੀਟਿੰਗ

ਖਰੜ (ਪ੍ਰੀਤ ਪੱਤੀ) : ਅੱਜ ਐਸਡੀਐਮ ਖਰੜ ਦਿਵਿਆ ਪੀ. ਵੱਲੋਂ ਆਗਾਮੀ ਬਰਸਾਤ ਦੇ ਮੌਸਮ ਦੌਰਾਨ ਹੜਾਂ ਤੋਂ ਰੋਕਥਾਮ ਲਈ ਵੱਖ ਵੱਖ ਵਿਭਾਗਾਂ ਦੇ ਮੁਖੀਆਂ ਨਾਲ ਮੀਟਿੰਗ ਕਰਕੇ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ। ਇਸ ਮੀਟਿੰਗ ਵਿੱਚ ਸਬ ਡਵੀਜਨ ਖਰੜ ਅੰਦਰ ਪੈਂਦੇ ਰਿਹਾਇਸ਼ੀ ਇਲਾਕੇ ਜੋ ਕਿ ਲੋਅ ਲੇਇੰਗ ਏਰੀਆ, ਸੁਸਾਇਟੀਆਂ ਜੋ ਪਾਣੀ ਦੇ ਵਹਾਅ, ਨਦੀ ਜਾਂ ਚੋਅ ਦੀ ਕੈਟਾਗਰੀ ਵਿੱਚ ਆਉਂਦੀ ਹੈ ਜਾਂ ਉਹ ਇਲਾਕੇ ਜਿਨਾਂ ਵਿੱਚ ਬੀਤੇ ਸਾਲ ਬਾਰਿਸ਼ਾਂ ਦਾ ਪਾਣੀ ਭਰ ਜਾਣ ਕਾਰਨ ਕਾਫੀ ਨੁਕਸਾਨ ਦਾ ਸਾਹਮਣਾ ਕਰਨਾ ਪਿਆ ਸੀ ਉਹਨਾਂ ਇਲਾਕਿਆਂ ਸਬੰਧੀ ਉਚਿਤ ਪ੍ਰਬੰਧ ਕਰਨ ਬਾਰੇ ਬੀਡੀਪੀਓ ਖਰੜ ਅਤੇ ਕਾਰਜ ਸਾਧਕ ਅਫਸਰ ਖਰੜ ਨੂੰ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ ਹਨ ਤਾਂ ਜੋ ਮਾਨਸੂਨ ਹੜ ਦੇ ਮੌਸਮ ਵਿੱਚ ਅਣਹੋਣੀ ਹੋਣ ਤੋਂ ਬਚਿਆ ਜਾ ਸਕੇ। ਐਸਡੀਐਮ ਖਰੜ ਵੱਲੋਂ ਡਰੇਨੀਜ਼ ਵਿਭਾਗ ਨੂੰ ਸੀਵਰੇਜ ਅਤੇ ਨਾਲਿਆਂ ਆਦਿ ਦੀ ਸਫਾਈ ਅਤੇ ਪਾਣੀ ਦੀ ਨਿਕਾਸੀ ਦੇ ਪ੍ਰਬੰਧਾਂ ਸਬੰਧੀ ਹਦਾਇਤਾਂ ਜਾਰੀ ਕੀਤੀਆਂ। ਉਹਨਾਂ ਡੀਐਸਪੀ ਖਰੜ ਨੂੰ ਗੋਤਾਖੋਰਾਂ ਦੀ ਸੂਚੀ ਸਮੇਤ ਟੈਲੀਫੋਨ ਨੰਬਰ ਡਿਊਟੀ ਸਟਾਫ ਨੂੰ ਉਪਲੱਬਧ ਕਰਵਾਉਣ ਲਈ ਕਿਹਾ। ਉਨ੍ਹਾਂ ਹੜ੍ਹ ਪ੍ਰਭਾਵਿਤ ਇਲਾਕਿਆਂ ਵਿੱਚ ਮੈਡੀਕਲ ਸਿਹਤ ਸੇਵਾਵਾਂ ਪ੍ਰਦਾਨ ਕਰਨ ਸਬੰਧੀ ਐਸ.ਐਮ.ਓ. ਖਰੜ ਨੂੰ ਕਿਹਾ। ਹੜ੍ਹ ਪ੍ਰਭਾਵਿਤ ਇਲਾਕਿਆਂ ਵਿੱਚ ਜਾਨਵਰਾਂ ਦੇ ਰੱਖ ਰਖਾਅ ਸਬੰਧੀ ਸਥਾਨ ਨਿਰਧਾਰਤ ਕਰਨਾ ਅਤੇ ਪ੍ਰਬੰਧ ਕਰਨਾ ਪਸ਼ੂ ਪਾਲਣ ਵਿਭਾਗ ਅਤੇ ਹੜ੍ਹ ਪੀੜਤਾਂ ਲਈ ਰਾਹਤ ਕੈਂਪ ਦਾ ਸਥਾਨ ਨਿਰਧਾਰਤ ਕਰਨਾ ਅਤੇ ਪ੍ਰਬੰਧ ਕਰਨ ਸਬੰਧੀ ਬੀ.ਡੀ.ਪੀ.ਓ ਤੇ ਕਾਰਜ ਸਾਧਕ ਅਫਸਰ ਖਰੜ ਨੂੰ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ। ਹੜ੍ਹ ਪੀੜਤਾਂ ਲਈ ਰਾਹਤ ਕੈਂਪਾਂ ਵਿੱਚ ਪੀਣ ਵਾਲੇ ਪਾਣੀ ਅਤੇ ਖਾਣ ਪੀਣ ਦੀਆਂ ਵਸਤਾਂ ਦਾ ਪ੍ਰਬੰਧ ਕਰਨ ਲਈ ਡੀਐਫਐਸਓ ਅਤੇ ਬਿਜਲੀ ਦਾ ਪ੍ਰਬੰਧ ਕਰਨ ਸੰਬੰਧੀ ਪੀਐਸਪੀਐਲ ਦੇ ਅਧਿਕਾਰੀਆਂ ਨੂੰ ਹਦਾਇਤਾਂ ਕੀਤੀਆਂ ਗਈਆਂ। ਉਨ੍ਹਾਂ ਹੜ ਪੀੜਤ ਏਰੀਏ ਵਿੱਚ ਅੱਗ ਜਾਂ ਹੋਰ ਆਫਤ ਤੋਂ ਬਚਣ ਲਈ ਫਾਇਰ ਗੱਡੀਆਂ ਦਾ ਪ੍ਰਬੰਧ ਕਰਨ ਲਈ ਕਿਹਾ ਅਤੇ ਜ਼ਿਲਾ ਸਿੱਖਿਆ ਅਫਸਰ ਪ੍ਰਾਇਮਰੀ/ਸੈਕੰਡਰੀ ਨੂੰ ਹੜ੍ਹ ਪੀੜਤ ਰਾਹਤ ਕੈਂਪ ਨਿਰਧਾਰਤ ਸਕੂਲਾਂ ਨੂੰ ਖੁੱਲੇ ਰੱਖਣ ਦਾ ਪ੍ਰਬੰਧ ਕਰਨ ਸੁਬੰਧੀ ਹਦਾਇਤ ਜਾਰੀ ਕੀਤੀ ਗਈ। ਹੜ੍ਹ ਕਾਰਨ ਹੋਏ ਨੁਕਸਾਨ ਦੀ ਰੋਜਾਨਾ ਰਿਪੋਰਟ ਤਿਆਰ ਕਰਨ, ਰੋਜਾਨਾ ਹੋਈ ਵਰਖਾ ਦੇ ਵਿਵਰਣ ਭੇਜਣ ਸਬੰਧੀ, ਫਲੰਡ ਕੰਟਰੋਲ ਰੂਮ ਚਾਲੂ ਰੱਖਣਾ ਅਤੇ ਸਬੰਧਿਤਾਂ ਡਿਊਟੀ ਕਰਤਾਵਾਂ ਦੀ ਹਾਜਰੀ ਦੀ ਪੜਤਾਲ ਕਰਕੇ ਸੂਚਿਤ ਕਰਨ ਸਬੰਧੀ ਤਹਿਸੀਲਦਾਰ ਖਰੜ ਨੂੰ ਹਦਾਇਤ ਜਾਰੀ ਕੀਤੀ ਗਈ ਹੈ। ਐਸਡੀਐਮ ਖਰੜ ਨੇ ਕਿਹਾ ਕਿ ਬੀ.ਡੀ.ਪੀ.ਓ ਖਰੜ/ਮਾਜਰੀ ਆਪਣੇ ਪਿੰਡਾਂ ਵਿੱਚ ਪੈਂਦੀਆਂ ਚੋਈਆਂ ਦੀ ਚੈਕਿੰਗ ਕਰਨਗੇ ਕਿ ਗੁੱਜਰ ਬਰਾਦਰੀ ਨਾਲ ਸਬੰਧਿਤ ਜਾਂ ਹੋਰ ਕਿਸੇ ਪਬਲਿਕ ਵੱਲੋਂ ਨਦੀਆਂ ਵਿੱਚ ਰਿਹਾਇਸ਼ ਤਾਂ ਨਹੀਂ ਕੀਤੀ ਗਈ, ਕਿਉਂਕਿ ਉੱਪਰੋਂ ਪਹਾੜਾਂ ਵਿੱਚੋਂ ਪਾਣੀ ਆਉਣ ਕਾਰਨ ਜਾਨੀ ਮਾਲੀ ਨੁਕਸਾਨ ਹੋਣ ਦੀ ਸੰਭਾਵਨਾ ਰਹਿੰਦੀ ਹੈ। ਉਹਨਾਂ ਬੀਡੀਪੀਓ ਖਰੜ ਮਾਜਰੀ ਨੂੰ ਆਪਣੀਆਂ ਆਪਣੀਆਂ ਜੇਸੀਬੀ 24 ਘੰਟੇ ਹਾਜ਼ਰ ਰੱਖਣ ਅਤੇ ਜੇਸੀਬੀ ਦੇ ਡਰਾਈਵਰਾਂ ਨੂੰ 24 ਘੰਟੇ ਡਿਊਟੀ ਤੇ ਹਾਜ਼ਰ ਰਹਿਣ ਲਈ ਹਦਾਇਤ ਜਾਰੀ ਕੀਤੀ। ਇਸ ਮੌਕੇ ਸਭ ਡਿਵੀਜ਼ਨ ਖਰੜ ਦੇ ਵੱਖ-ਵੱਖ ਵਿਭਾਗਾਂ ਦੇ ਅਧਿਕਾਰੀ ਹਾਜ਼ਰ ਸਨ।