ਫਿਲੌਰ : ਪੰਜਾਬ ਦੇ ਫਿਲੌਰ ਸਥਿਤ ਪਿੰਡ ਸੰਗ ਢੇਸੀਆਂ 'ਚ ਅੱਜ ਇੱਕ ਵੱਡੀ ਘਟਨਾ ਵਾਪਰੀ ਹੈ। ਦੱਸ ਦੇਈਏ ਕਿ ਇੱਥੇ ਇੱਕ 10 ਸਾਲਾ ਮੁੰਡੇ ਦੇ ਹੱਥ 'ਚ mobile phone ਫਟ ਗਿਆ। ਜਾਣਕਾਰੀ ਮੁਤਾਬਕ ਇਹ ਦਰਦਨਾਕ ਹਾਦਸਾ ਉਦੋਂ ਵਾਪਰਿਆ ਜਦੋਂ ਬੱਚਾ ਬਾਥਰੂਮ 'ਚ ਫੋਨ ਚਲਾ ਰਿਹਾ ਸੀ। ਇਹ ਧਮਾਕਾ ਇੰਨਾ ਭਿਆਨਕ ਸੀ ਕਿ ਇਸ ਧਮਾਕੇ 'ਚ ਬੱਚੇ ਦਾ ਹੱਥ ਝੁਲਸ ਗਿਆ ਹੈ, ਜਦਕਿ ਫੋਨ ਪੂਰੀ ਤਰ੍ਹਾਂ ਸੜ ਕੇ ਸੁਆਹ ਹੋ ਗਿਆ।
ਬਾਥਰੂਮ 'ਚੋਂ ਆਈ ਚੀਕ, ਮਾਂ ਰਹਿ ਗਈ ਸੁੰਨ
ਪਰਿਵਾਰ ਦੇ ਮੈਂਬਰ ਛੋਟੂ ਯਾਦਵ ਅਨੁਸਾਰ, ਉਨ੍ਹਾਂ ਦਾ 10 ਸਾਲਾ ਪੁੱਤਰ ਬਾਥਰੂਮ 'ਚ mobile phone ਚਲਾ ਰਿਹਾ ਸੀ। ਇਸੇ ਦੌਰਾਨ, ਅਚਾਨਕ ਫੋਨ ਉਸਦੇ ਹੱਥ 'ਚ ਹੀ ਬਲਾਸਟ ਕਰ ਗਿਆ। ਧਮਾਕੇ ਦੇ ਨਾਲ ਹੀ ਬੱਚਾ ਚੀਕਦਾ ਹੋਇਆ ਬਾਥਰੂਮ ਤੋਂ ਬਾਹਰ ਭੱਜਿਆ। ਜਦੋਂ ਉਸਦੀ ਮਾਂ ਅੰਦਰ ਪਹੁੰਚੀ, ਤਾਂ ਉਨ੍ਹਾਂ ਨੇ ਦੇਖਿਆ ਕਿ ਮੋਬਾਈਲ ਪੂਰੀ ਤਰ੍ਹਾਂ ਸੜ ਕੇ ਸੁਆਹ ਹੋ ਚੁੱਕਿਆ ਸੀ।
ਪਿਤਾ ਦੀ ਅਪੀਲ: "ਬੱਚਿਆਂ ਨੂੰ ਖੇਡ-ਕੁੱਦ ਲਈ ਭੇਜੋ"
ਬੱਚੇ ਦੇ ਪਿਤਾ ਨੇ ਇਸ ਘਟਨਾ 'ਤੇ ਚਿੰਤਾ ਜ਼ਾਹਰ ਕਰਦਿਆਂ ਕਿਹਾ, "ਇਹ ਹਾਦਸਾ ਕਿਸੇ ਨਾਲ ਵੀ ਵਾਪਰ ਸਕਦਾ ਹੈ।" ਉਨ੍ਹਾਂ ਨੇ ਸਾਰੇ ਮਾਤਾ-ਪਿਤਾ ਨੂੰ ਅਪੀਲ ਕੀਤੀ ਕਿ ਉਹ ਬੱਚਿਆਂ ਨੂੰ ਮੋਬਾਈਲ ਦੇਣ ਦੀ ਬਜਾਏ, ਉਨ੍ਹਾਂ ਨੂੰ ਖੇਡ-ਕੁੱਦ ਅਤੇ ਬਾਹਰੀ ਗਤੀਵਿਧੀਆਂ ਲਈ ਉਤਸ਼ਾਹਿਤ ਕਰਨ।
ਇਹ ਘਟਨਾ ਸਾਰੇ ਮਾਪਿਆਂ ਲਈ ਇੱਕ ਵੱਡੀ ਸਿੱਖਿਆ ਹੈ ਕਿ ਬੱਚਿਆਂ ਨੂੰ ਮੋਬਾਈਲ ਦੀ ਲਤ ਤੋਂ ਦੂਰ ਰੱਖਿਆ ਜਾਵੇ ਅਤੇ ਉਨ੍ਹਾਂ ਦੀ ਸੁਰੱਖਿਆ ਨੂੰ ਸਭ ਤੋਂ ਵੱਧ ਤਰਜੀਹ ਦਿੱਤੀ ਜਾਵੇ।