ਨਵੀਂ ਦਿੱਲੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਐਤਵਾਰ ਨੂੰ ਆਪਣੇ ਮਾਸਿਕ ਰੇਡੀਓ ਪ੍ਰੋਗਰਾਮ 'ਮਨ ਕੀ ਬਾਤ' ਦੇ 134ਵੇਂ ਐਪੀਸੋਡ ਦੌਰਾਨ ਨਾਗਰਿਕਾਂ ਦੁਆਰਾ ਕੀਤੇ ਗਏ ਵਾਤਾਵਰਣ ਅਤੇ ਸਮਾਜਿਕ ਸੁਧਾਰਾਂ ਦੇ ਯਤਨਾਂ ਦੀ ਪ੍ਰਸ਼ੰਸਾ ਕੀਤੀ। ਉਨ੍ਹਾਂ ਨੇ ਦੱਸਿਆ ਕਿ ਕਿਵੇਂ ਆਮ ਲੋਕ ਸ਼ਿਕਾਇਤਾਂ ਕਰਨ ਦੀ ਬਜਾਏ ਸਿੱਧੀ ਕਾਰਵਾਈ ਕਰਕੇ ਸਮਾਜ 'ਚ ਬਦਲਾਅ ਲਿਆ ਰਹੇ ਹਨ।
ਮਨੋਰਮਾ ਨਦੀ ਦੀ ਸਫਾਈ
ਪ੍ਰਧਾਨ ਮੰਤਰੀ ਨੇ ਉੱਤਰ ਪ੍ਰਦੇਸ਼ ਦੇ ਬਸਤੀ ਜ਼ਿਲ੍ਹੇ ਦੇ ਅਕਾਸ਼ ਗੁਪਤਾ ਅਤੇ ਉਨ੍ਹਾਂ ਦੇ ਦੋਸਤਾਂ ਦੀ ਕਹਾਣੀ ਸਾਂਝੀ ਕੀਤੀ। ਅਕਾਸ਼ ਆਪਣੇ ਪਿੰਡ ਦੀ ਮਨੋਰਮਾ ਨਦੀ 'ਚ ਵੱਧ ਰਹੀ ਗੰਦਗੀ ਅਤੇ ਪਲਾਸਟਿਕ ਨੂੰ ਦੇਖ ਕੇ ਕਾਫੀ ਦੁਖੀ ਸਨ। ਉਨ੍ਹਾਂ ਨੇ 'ਕੋਈ ਸ਼ਿਕਾਇਤ ਨਹੀਂ, ਇਕ ਨਵੀਂ ਸ਼ੁਰੂਆਤ' ਦੇ ਮੰਤਰ ਨਾਲ ਨਦੀ ਨੂੰ ਸਾਫ਼ ਕਰਨ ਦਾ ਫੈਸਲਾ ਕੀਤਾ। ਇਹ ਨੌਜਵਾਨ ਜਾਲ, ਕਹੀ ਅਤੇ ਟੋਕਰੀਆਂ ਲੈ ਕੇ ਨਦੀ 'ਚ ਉਤਰ ਜਾਂਦੇ ਅਤੇ ਪਾਣੀ ਦੀ ਕੁੰਭੀ ਅਤੇ ਪਲਾਸਟਿਕ ਦਾ ਕੂੜਾ ਬਾਹਰ ਕੱਢਦੇ ਸਨ। ਉਹ ਇਕ ਦਿਨ 'ਚ 50-60 ਕਿਲੋਗ੍ਰਾਮ ਤੱਕ ਕੂੜਾ ਸਾਫ਼ ਕਰਦੇ ਸਨ, ਜਿਸ ਨਾਲ ਨਦੀ ਦਾ ਉਹ ਹਿੱਸਾ ਫਿਰ ਤੋਂ ਸਾਫ਼ ਹੋਣਾ ਸ਼ੁਰੂ ਹੋ ਗਿਆ ਅਤੇ ਆਸ-ਪਾਸ ਦੇ ਲੋਕਾਂ 'ਚ ਸਫਾਈ ਪ੍ਰਤੀ ਜਾਗਰੂਕਤਾ ਵਧੀ।
ਗੋਆ 'ਚ ਪਾਣੀ ਦੀ ਸਮੱਸਿਆ ਦਾ ਹੱਲ
ਇਸ ਦੇ ਨਾਲ ਹੀ ਪੀ.ਐੱਮ ਮੋਦੀ ਨੇ ਗੋਆ ਦੇ ਇਕ ਸੇਵਾਮੁਕਤ ਅਧਿਆਪਕ ਬਾਲਕ੍ਰਿਸ਼ਨ ਅਈਆ ਦੇ ਯੋਗਦਾਨ ਦਾ ਵੀ ਜ਼ਿਕਰ ਕੀਤਾ। ਬਾਲਕ੍ਰਿਸ਼ਨ ਨੇ ਮਾਡੀ-ਟੋਲਾਪ ਇਲਾਕੇ 'ਚ ਪਾਣੀ ਦੀ ਭਾਰੀ ਕਿੱਲਤ ਨੂੰ ਦੇਖਦੇ ਹੋਏ ਉੱਥੇ ਪਾਈਪਲਾਈਨਾਂ ਵਿਛਾਉਣ 'ਚ ਅਹਿਮ ਭੂਮਿਕਾ ਨਿਭਾਈ। ਉਨ੍ਹਾਂ ਦੇ ਇਸ ਯਤਨ ਸਦਕਾ ਕਈ ਘਰਾਂ 'ਚ ਪਾਣੀ ਪਹੁੰਚਿਆ, ਜਿਸ ਨਾਲ ਰੋਜ਼ਾਨਾ ਪਾਣੀ ਲਈ ਸੰਘਰਸ਼ ਕਰ ਰਹੇ ਪਰਿਵਾਰਾਂ ਨੂੰ ਵੱਡੀ ਰਾਹਤ ਮਿਲੀ।
ਪ੍ਰਧਾਨ ਮੰਤਰੀ ਨੇ ਇਨ੍ਹਾਂ ਉਦਾਹਰਣਾਂ ਰਾਹੀਂ ਇਹ ਸੰਦੇਸ਼ ਦਿੱਤਾ ਕਿ ਦ੍ਰਿੜ ਇਰਾਦੇ ਨਾਲ ਕੀਤੇ ਗਏ ਛੋਟੇ ਯਤਨ ਵੀ ਵੱਡੇ ਬਦਲਾਅ ਲਿਆ ਸਕਦੇ ਹਨ।