ਮੁੰਬਈ : ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ. ਸੀ. ਸੀ. ਆਈ.) ਨੇ ਆਈ. ਪੀ. ਐੱਲ. ਫ੍ਰੈਂਚਾਈਜ਼ੀਅਾਂ ਤੋਂ ਲੀਗ ਦੇ ਸਭ ਤੋਂ ਚਰਚਿਤ ਵਿਸ਼ੇ ‘ਇੰਪੈਕਟ ਪਲੇਅਰ’ ਨਿਯਮ ’ਤੇ ਰਾਏ ਮੰਗੀ ਹੈ। ਫ੍ਰੈਂਚਾਈਜ਼ੀਆਂ ਨੂੰ ਸੋਮਵਾਰ (31 ਅਗਸਤ) ਤੱਕ ਇਸ ਵਿਵਾਦਪੂਰਣ ‘12ਵੇਂ ਖਿਡਾਰੀ’ ਵਾਲੇ ਨਿਯਮ ’ਤੇ ਆਪਣੀ ਰਾਏ ਦੇਣ ਲਈ ਕਿਹਾ ਗਿਆ ਸੀ। ਇਸ ਨਿਯਮ ਨੇ ਲੀਗ ’ਚ ਵੱਖ-ਵੱਖ ਵਿਚਾਰਾਂ ਪੈਦਾ ਕੀਤੀਆਂ ਹਨ, ਖਾਸ ਤੌਰ ’ਤੇ ਪਿਛਲੇ ਸੈਸ਼ਨ ’ਚ, ਜਦੋਂ ਕਈ ਹਾਈ-ਸਕੋਰਿੰਗ ਮੈਚ ਹੋਏ ਤੇ ਬੇਬੱਸ ਗੇਂਦਬਾਜ਼ਾਂ ਨੂੰ ਲੈ ਕੇ ਚਿੰਤਾਵਾਂ ਜਤਾਈਆਂ ਗਈਆਂ।
ਬੀ. ਸੀ. ਸੀ. ਆਈ. ਨੇ ਕਈ ਹੋਰ ਮੁੱਦਿਆਂ ’ਤੇ ਵੀ ਫ੍ਰੈਂਚਾਈਜ਼ੀਆਂ ਦੀ ਰਾਏ ਮੰਗੀ ਹੈ, ਜਿਨ੍ਹਾਂ ’ਚ ਪੀ. ਐੱਮ. ਓ. ਏ. ਮਾਮਲੇ, ਅੰਪਾਇਰਿੰਗ, ਪ੍ਰੈਕਟਿਸ ਸੈਸ਼ਨ ਤੇ ਖੇਡਣ ਦੀਆਂ ਸ਼ਰਤਾਂ ਸ਼ਾਮਲ ਹਨ। ਪਰ ਟੀਮਾਂ ਨੂੰ ਭੇਜੇ ਗਏ ਹਾਲੀਆ ਸੰਖੇਪ ਸੰਦੇਸ਼ ’ਚ ਸਭ ਤੋਂ ਮਹੱਤਵਪੂਰਨ ਵਿਸ਼ਾ ‘ਇੰਪੈਕਟ ਪਲੇਅਰ’ ਕਲਾਜ਼ ਸੀ ਹਾਲ ਹੀ ’ਚ ਖਤਮ ਹੋਏ ਸੈਸ਼ਨ ’ਤੇ ਇਨਪੁਟ ਮੰਗਣਾ ਆਈ. ਪੀ. ਐੱਲ. ’ਚ ਇਕ ਆਮ ਪ੍ਰਕਿਰਿਆ ਹੈ ਪਰ ‘ਇੰਪੈਕਟ ਪਲੇਅਰ’ ਕਲਾਜ਼ ’ਤੇ ਵਿਸ਼ੇਸ਼ ਰੂਪ ਨਾਲ ਪ੍ਰਤੀਕਿਰਿਆ ਮੰਗਣਾ ਉਮੀਦ ਦੇ ਉਲਟ ਲੱਗਦਾ ਹੈ, ਕਿਉਂਕਿ ਇਹ ਮੰਨਿਆ ਜਾ ਰਿਹਾ ਸੀ ਕਿ ਇਹ ਨਿਯਮ ਘੱਟੋ-ਘੱਟ ਇਕ ਹੋਰ ਸੈਸ਼ਨ ਤੱਕ ਜਾਰੀ ਰਹੇਗਾ। ਬੀ. ਸੀ. ਸੀ. ਆਈ./ਆਈ. ਪੀ. ਐੱਲ. ਅਧਿਕਾਰੀਆਂ ਨੇ ਪਿਛਲੇ ਸਾਲ ਪ੍ਰੀ-ਸੈਸ਼ਨ ਕਪਤਾਨਾਂ ਦੀ ਮੀਟਿੰਗ ’ਚ ਸੰਕੇਤ ਦਿੱਤਾ ਸੀ ਕਿ ਇਹ ਨਿਯਮ ਇਕ ਹੋਰ ਸਾਲ ਤੱਕ ਲਾਗੂ ਰਹੇਗਾ।
ਦਿਲਚਸਪ ਗੱਲ ਇਹ ਹੈ ਕਿ ਬੀ. ਸੀ. ਸੀ. ਆਈ. ਦੇ ਸੰਦੇਸ਼ ’ਚ ਉਸੇ ਕਪਤਾਨਾਂ ਦੀ ਮੀਟਿੰਗ ਦਾ ਜ਼ਿਕਰ ਕੀਤਾ ਗਿਆ ਹੈ। ਰੋਹਿਤ ਸ਼ਰਮਾ, ਹਾਰਦਿਕ ਪੰਡਯਾ, ਅਕਸ਼ਰ ਪਟੇਲ ਤੇ ਸ਼ੁਭਮਨ ਗਿੱਲ ਵਰਗੇ ਕਈ ਧਾਕੜ ਖਿਡਾਰੀਆਂ ਨੇ ਖੁੱਲ੍ਹ ਕੇ ਇਸ ਵਿਚਾਰ ਦਾ ਵਿਰੋਧ ਕੀਤਾ ਹੈ। ਆਈ. ਪੀ. ਐੱਲ. ਤੋਂ ਜਿਹੜੀ ਗੱਲ ਸਾਹਮਣੇ ਆ ਰਹੀ ਹੈ, ਉਹ ਇਹ ਹੈ ਕਿ ਇਸ ਨਿਯਮ ਦੇ ਸਮਰਥਕ ਵੀ ਹਨ। ਹਾਲਾਂਕਿ, ਜਦੋਂ ਇਹ ਮਾਮਲਾ ਸੁਲਝਿਆ ਹੋਇਆ ਲੱਗ ਰਿਹਾ ਸੀ, ਤਦ ਇਸ ਨੂੰ ਫਿਰ ਤੋਂ ਚੁੱਕਣਾ ਇਕ ਅਨਿਸ਼ਚਿਤ ਸਥਿਤੀ ਪੈਦਾ ਕਰਦਾ ਹੈ। ਕੀ ਅਗਲੇ ਸੈਸ਼ਨ ’ਚ ਇਸ ਨਿਯਮ ਦੀ ਸਮੀਖਿਆ ਕੀਤੀ ਜਾਵੇਗੀ, ਇਹ ਅਜੇ ਵੀ ਇਕ ਖੁੱਲ੍ਹਾ ਸਵਾਲ ਹੈ।