ਭਾਰਤੀ ਵਿਲੱਖਣ ਪਛਾਣ ਅਥਾਰਟੀ (UIDAI) ਨੇ ਇੱਕ ਅਹਿਮ ਐਲਾਨ ਕਰਦਿਆਂ ਸਪੱਸ਼ਟ ਕੀਤਾ ਹੈ ਕਿ ਆਧਾਰ ਕਾਰਡ ਨੂੰ ਹੁਣ ਜਨਮ ਮਿਤੀ (DOB) ਦੇ ਅਧਿਕਾਰਤ ਸਬੂਤ ਵਜੋਂ ਵਰਤਿਆ ਨਹੀਂ ਜਾ ਸਕੇਗਾ। UIDAI ਅਨੁਸਾਰ, ਆਧਾਰ ਕਾਰਡ ਸਿਰਫ਼ ਵਿਅਕਤੀ ਦੀ ਪਛਾਣ ਅਤੇ ਉਸ ਦੇ ਘਰ ਦੇ ਪਤੇ ਦਾ ਪ੍ਰਮਾਣ ਹੋਵੇਗਾ ਨਾ ਕਿ ਉਮਰ ਜਾਂ ਜਨਮ ਮਿਤੀ ਦਾ।
ਆਧਾਰ ਕਾਰਡ ਕਿਉਂ ਨਹੀਂ ਹੈ ਜਨਮ ਮਿਤੀ ਦਾ ਸਬੂਤ?
ਸਰੋਤਾਂ ਅਨੁਸਾਰ, UIDAI ਦਾ ਕਹਿਣਾ ਹੈ ਕਿ ਆਧਾਰ ਬਣਾਉਂਦੇ ਸਮੇਂ ਅਕਸਰ ਲੋਕ ਬਿਨਾਂ ਕਿਸੇ ਪੁਖ਼ਤਾ ਦਸਤਾਵੇਜ਼ ਦੇ ਅੰਦਾਜ਼ੇ ਨਾਲ ਆਪਣੀ ਜਨਮ ਮਿਤੀ ਦਰਜ ਕਰਵਾ ਦਿੰਦੇ ਹਨ, ਜਿਸ ਕਾਰਨ ਇਸ ਵਿੱਚ ਦਰਜ ਤਾਰੀਖ਼ ਗਲਤ ਹੋ ਸਕਦੀ ਹੈ। ਦੇਸ਼ ਦੀਆਂ ਕਈ ਅਦਾਲਤਾਂ ਅਤੇ ਸਰਕਾਰੀ ਵਿਭਾਗਾਂ ਨੇ ਵੀ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਆਧਾਰ ਕਾਰਡ ਨੂੰ ਉਮਰ ਦਾ ਪੱਕਾ ਸਬੂਤ ਨਹੀਂ ਮੰਨਿਆ ਜਾ ਸਕਦਾ।
UIDAI ਅਨੁਸਾਰ, ਜਨਮ ਮਿਤੀ ਜਾਂ ਉਮਰ ਦੀ ਤਸਦੀਕ ਲਈ ਹੇਠ ਲਿਖੇ ਦਸਤਾਵੇਜ਼ਾਂ ਨੂੰ ਹੀ ਮਾਨਤਾ ਦਿੱਤੀ ਜਾਵੇਗੀ:
ਜਨਮ ਸਰਟੀਫਿਕੇਟ (Birth Certificate)
ਸਕੂਲ ਸਰਟੀਫਿਕੇਟ ਜਾਂ 10ਵੀਂ ਦੀ ਮਾਰਕਸ਼ੀਟ (SSLC)
ਵੈਧ ਭਾਰਤੀ ਪਾਸਪੋਰਟ
ਪੈਨਸ਼ਨਰ ਫੋਟੋ ਸ਼ਨਾਖਤੀ ਕਾਰਡ
ਸਰਕਾਰੀ ਅਧਿਕਾਰੀ ਦੁਆਰਾ ਜਾਰੀ ਕੀਤਾ ਜਨਮ ਸਰਟੀਫਿਕੇਟ
ਕੀ ਆਧਾਰ ਕਾਰਡ ਦੀ ਅਹਿਮੀਅਤ ਖ਼ਤਮ ਹੋ ਜਾਵੇਗੀ?
ਨਹੀਂ, ਆਧਾਰ ਕਾਰਡ ਅਜੇ ਵੀ ਭਾਰਤੀ ਹੋਣ ਦੀ ਪਛਾਣ ਵਜੋਂ ਸਭ ਤੋਂ ਮਹੱਤਵਪੂਰਨ ਦਸਤਾਵੇਜ਼ ਰਹੇਗਾ। ਬੈਂਕ ਖਾਤੇ ਲਿੰਕ ਕਰਨ, ਸਰਕਾਰੀ ਸਕੀਮਾਂ ਦਾ ਲਾਭ ਲੈਣ ਅਤੇ ਡਰਾਈਵਿੰਗ ਲਾਇਸੈਂਸ ਵਰਗੇ ਕੰਮਾਂ ਲਈ ਆਧਾਰ ਦੀ ਵਰਤੋਂ ਪਹਿਲਾਂ ਵਾਂਗ ਹੀ ਜਾਰੀ ਰਹੇਗੀ। UIDAI ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਇਹ ਕੋਈ ਨਵਾਂ ਨਿਯਮ ਨਹੀਂ ਹੈ, ਸਗੋਂ ਪਹਿਲਾਂ ਤੋਂ ਬਣੇ ਨਿਯਮਾਂ ਨੂੰ ਹੀ ਹੋਰ ਸਪੱਸ਼ਟ ਕੀਤਾ ਗਿਆ ਹੈ।
ਜੇਕਰ ਤੁਹਾਡੇ ਕੋਲ ਜਨਮ ਮਿਤੀ ਦਾ ਕੋਈ ਹੋਰ ਪੁਖ਼ਤਾ ਸਬੂਤ ਨਹੀਂ ਹੈ, ਤਾਂ ਤੁਹਾਡੇ ਕਈ ਜ਼ਰੂਰੀ ਕੰਮ ਅਟਕ ਸਕਦੇ ਹਨ, ਇਸ ਲਈ ਸਮਾਂ ਰਹਿੰਦੇ ਆਪਣੇ ਦਸਤਾਵੇਜ਼ ਦਰੁਸਤ ਕਰਵਾ ਲੈਣੇ ਚਾਹੀਦੇ ਹਨ।