ਜੋਧਾਂ : ਸੂਬਾ ਸਰਕਾਰ ਦੀ ਲੈਂਡ ਪੂਲਿੰਗ ਨੀਤੀ ਖਿਲਾਫ਼ ਵੱਡੇ ਮੋਰਚੇ ਦਾ ਐਲਾਨ ਕੀਤਾ ਗਿਆ ਹੈ। ਅੱਜ ਵੱਖ-ਵੱਖ ਕਿਸਾਨ ਜਥੇਬੰਦੀਆਂ ਦੇ ਆਗੂਆਂ ਨੇ ਕਿਹਾ ਕਿ ਸਰਕਾਰਾਂ ਦਾ ਕੰਮ ਲੋਕ ਭਲਾਈ ਦਾ ਹੁੰਦਾ ਹੈ ਨਾ ਕਿ ਜ਼ਮੀਨਾਂ ਦੀ ਦਲਾਲੀ ਕਰਨਾ। ਅੱਜ ਸਰਕਾਰ ਨੇ ਸਿੱਖਿਆ, ਇਲਾਜ ਅਤੇ ਲੋਕਾਂ ਨੂੰ ਨਿਆਂ ਦੇਣ ਵਾਲੇ ਅਦਾਰੇ ਤਾਂ ਠੇਕੇ ਉੱਤੇ ਦੇ ਰੱਖੇ ਹਨ ਪ੍ਰੰਤੂ ਕਿਸਾਨਾਂ ਦੇ ਪੁੱਤਾਂ ਤੋਂ ਪਿਆਰੇ ਉਪਜਾਊ ਖੇਤ ਖੋਹ ਕੇ ਕਾਰਪੋਰੇਟਾਂ ਨੂੰ ਦੇਣ ਲਈ ਸਰਕਾਰ ਪੱਬਾਂ ਭਾਰ ਹੈ। ਅੱਜ ਜੋਧਾਂ ਦੀ ਦਾਣਾ ਮੰਡੀ ਵਿਚ ਜੁੜੇ ਲੁਧਿਆਣਾ ਜ਼ਿਲੇ ਦੇ 32 ਪਿੰਡਾਂ ਦੇ ਕਿਸਾਨਾਂ, ਮਜ਼ਦੂਰਾਂ ਅਤੇ ਦੁਕਾਨਦਾਰ ਇਕੱਤਰ ਹੋਏ। ਇਹ ਪ੍ਰੋਗਰਾਮ "ਕੰਮ ਬਚਾਓ ਖੇਤ ਬਚਾਓ ਪਿੰਡ ਬਚਾਓ" ਐਕਸ਼ਨ ਕਮੇਟੀ ਵੱਲੋਂ ਉਲੀਕਿਆ ਗਿਆ ਸੀ । ਇਸ ਵਿਚ ਜੋਧਾਂ ਪਿੰਡ ਦੀ ਪੰਚਾਇਤ ਸਮੇਤ 12 ਪੀੜਤ ਪਿੰਡਾਂ ਦੇ ਪੰਚ ਸਰਪੰਚ ਹਾਜ਼ਰ ਸਨ । ਕਿਸਾਨ ਆਗੂਆਂ ਨੇ ਕਿਹਾ ਕਿ ਇਹ ਖੇਤ ਗੁਰੂ ਨਾਨਕ ਪਾਤਸ਼ਾਹ ਅਤੇ ਧੰਨੇ ਭਗਤ ਨੇ ਵੀ ਜੋਤੇ ਹਨ। ਇਹ ਪੰਜਾਬ ਦੀ ਸ਼ਾਨ ਵੀ ਹਨ ਤੇ ਪਹਿਚਾਨ ਵੀ ਪਰ ਪੰਜਾਬ ਸਰਕਾਰ ਕੇਂਦਰ ਨਾਲ ਮਿਲ ਕੇ ਪੰਜਾਬ ਨੂੰ ਖੇਤੀ ਤੋਂ ਸਖਣੇ ਕਰਨ ਅਤੇ ਇੱਥੇ ਪਰਵਾਸੀਆਂ ਨੂੰ ਵਸਾ ਕੇ ਇਸਦੀ ਡੈਮੋਗਰਾਫੀ ਤਬਦੀਲ ਕਰਨ ਲਈ ਬਜ਼ਿਦ ਹਨ ।
ਪ੍ਰੋਗਰਾਮ ਵਿਚ ਕਿਸਾਨ ਜਥੇਬੰਦੀਆਂ ਦੇ ਵੱਡੇ ਆਗੂ ਮਨਜੀਤ ਸਿੰਘ ਧਨੇਰ, ਬੂਟਾ ਸਿੰਘ ਬੁਰਜ ਗਿੱਲ, ਰੁਲਦੂ ਸਿੰਘ ਮਾਨਸਾ, ਗੁਰਮੀਤ ਸਿੰਘ ਸੂਬਾ ਸਕੱਤਰ ਕੇ. ਕੇ. ਯੂ, ਪਰਮਿੰਦਰ ਸਿੰਘ ਚਲਾਕੀ ਕਿਸਾਨ ਯੂਨੀਅਨ ਰਾਜੇਵਾਲ, ਸਾਧੂ ਸਿੰਘ ਕ੍ਰਾਂਤੀਕਾਰੀ ਕਿਸਾਨ ਯੂਨੀਅਨ ਢੁੱਡੀਕੇ, ਪਰਕਾਸ਼ ਸਿੰਘ ਹਿੱਸੋਵਾਲ ਪ੍ਰਧਾਨ ਭੱਠਾ ਮਜ਼ਦੂਰ, ਰਘੁਬੀਰ ਸਿੰਘ ਜਮਹੂਰੀ ਕਿਸਾਨ ਸਭਾ ਸਮੇਤ ਲਗਭਗ 12 ਕਿਸਾਨ ਜਥੇਬੰਦੀਆਂ ਦੇ ਦੂਜੀ ਕਤਾਰ ਦੇ ਸਥਾਨਕ ਲੀਡਰ ਪਹੁੰਚੇ ਸਨ । ਕਾਮਰੇਡ ਤਰਸੇਮ ਜੋਧਾਂ ਅਤੇ ਬਲਵਿੰਦਰ ਸਿੰਘ ਲੋਕ ਅਧਿਕਾਰ ਲਹਿਰ ਵੱਲੋਂ ਸਟੇਜ ਸਕੱਤਰ ਦੀ ਭੂਮਿਕਾ ਨਿਭਾਈ ਗਈ ।
ਇਸ ਮੌਕੇ ਸਾਰੇ ਆਗੂ ਇਕਮੱਤ ਸਨ ਕਿ ਇਹ ਦਿੱਲ੍ਹੀ ਅੰਦੋਲਨ ਵਾਂਗ ਲੰਬਾ ਘੋਲ ਲੜਨਾ ਪਵੇਗਾ। ਉਨ੍ਹਾਂ ਸੰਘਰਸ਼ ਦੀ ਰੂਪ ਰੇਖਾ ਉਲੀਕਣ ਲਈ ਜਲਦੀ ਹੀ ਐੱਸ. ਕੇ. ਐੱਮ. ਅਤੇ ਬਾਕੀ ਫੋਰਮਾਂ ਦੀ ਮੀਟਿੰਗ ਕੀਤੀ ਜਾਵੇਗੀ। 16 ਜੂਨ ਨੂੰ 10 ਵਜੇ ਚੋਣ ਹਲਕੇ ਵਿਚ ਸਰਕਾਰ ਖ਼ਿਲਾਫ਼ ਗਲਾਡਾ ਤਕ ਟਰੈਕਟਰ ਮਾਰਚ ਉਲੀਕਿਆ ਗਿਆ ਹੈ। ਇਸ ਮੌਕੇ ਕਰਨੈਲ ਸਿੰਘ ਜਖੇਪਲ, ਕੌਮੀ ਇਨਸਾਫ਼ ਮੋਰਚਾ ਮੋਹਾਲੀ ਤੋਂ ਬਾਬਾ ਫਤਹਿ ਸਿੰਘ, ਬਾਬਾ ਹਰਦੀਪ ਸਿੰਘ ਸੁਖਦੇਵ ਸਿੰਘ ਸਰਪੰਚ ਦੋਲੋਂ ਕਲਾਂ, ਪਰਕਾਸ਼ ਸਿੰਘ ਸਰਪੰਚ ਜੋਧਾਂ, ਅਮਰਜੀਤ ਸਿੰਘ ਸਾਬਕਾ ਸਰਪੰਚ, ਹਰਦੇਵ ਸਿੰਘ, ਜਸਜੀਤ ਸਿੰਘ ਮਨਸੂਰਾਂ, ਚਮਕੌਰ ਸਿੰਘ ਉੱਭੀ, ਬਲਦੇਵ ਸਿੰਘ ਢੇਪਈ, ਬਹਾਦੁਰ ਸਿੰਘ ਸਰਪੰਚ ਮਨਸੂਰਾਂ, ਸਰਪੰਚ ਗੁਰਵਿੰਦਰ ਸਿੰਘ ਪੋਨਾ, ਪੰਮ ਜੋਧਾਂ ਐੱਨ. ਆਰ. ਆਈ ਸਭਾ, ਸ਼ਮਸ਼ੇਰ ਸਿੰਘ ਆਸੀ, ਨੌਜਵਾਨ ਸਭਾ ਦੇ ਮੈਂਬਰ ਰਾਜਾ ਜੋਧਾ, ਦਿਲਬੀਰ ਸਿੰਘ, ਜਸਵੰਤ ਸਿੰਘ ਘੋਲੀ, ਚਰਨਜੀਤ ਸਿੰਘ ਹਮਾਯੂਪੁਰ, ਪਰਮਜੀਤ ਪਮਾ ਮਾਰਕੀਟ ਪ੍ਰਧਾਨ ਆਦਿ ਹਾਜ਼ਰ ਸਨ।