ਨਵੀਂ ਦਿੱਲੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਐਤਵਾਰ ਨੂੰ ਆਪਣੇ ਮਹੀਨਾਵਾਰ ਰੇਡੀਓ ਪ੍ਰੋਗਰਾਮ 'ਮਨ ਕੀ ਬਾਤ' ਦੇ 134ਵੇਂ ਐਪੀਸੋਡ ਰਾਹੀਂ ਦੇਸ਼ ਵਿੱਚ ਪੈ ਰਹੀ ਭਿਆਨਕ ਗਰਮੀ ਅਤੇ ਲੂ ਤੋਂ ਬਚਣ ਲਈ ਦੇਸ਼ਵਾਸੀਆਂ ਨੂੰ ਖ਼ਾਸ ਸਲਾਹ ਦਿੱਤੀ ਹੈ। ਪੀ.ਐੱਮ. ਮੋਦੀ ਨੇ ਕਿਹਾ ਕਿ ਤੇਜ਼ ਧੁੱਪ ਅਤੇ ਸੇਕ ਦੌਰਾਨ ਸਰੀਰ 'ਚ ਪਾਣੀ ਦੀ ਕਮੀ ਨਾ ਹੋਣ ਦੇਣ ਲਈ ਸਰਕਾਰੀ ਗਾਈਡਲਾਈਨਜ਼ ਦੀ ਪਾਲਣਾ ਕਰੋ ਅਤੇ ਗਰਮੀ ਨੂੰ ਮਾਤ ਦੇਣ ਲਈ ਰਸੋਈਆਂ 'ਚ ਮੌਜੂਦ ਰਵਾਇਤੀ 'ਦੇਸੀ ਡ੍ਰਿੰਕਸ' ਦਾ ਆਨੰਦ ਲਓ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਗਰਮੀ ਵਧਣ ਨਾਲ ਸਾਡੇ ਘਰਾਂ ਦੀ ਰਸੋਈ ਦਾ ਸਵਾਦ ਬਦਲ ਜਾਂਦਾ ਹੈ। ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਸਦੀਆਂ ਤੋਂ ਚੱਲੇ ਆ ਰਹੇ ਇਹ ਦੇਸੀ ਡ੍ਰਿੰਕਸ ਬਿਨਾਂ ਕਿਸੇ ਵੱਡੀ ਬ੍ਰਾਂਡਿੰਗ ਦੇ ਸਾਡੀਆਂ ਪੀੜ੍ਹੀਆਂ ਦੇ ਤਜ਼ਰਬੇ ਨੂੰ ਦਰਸਾਉਂਦੇ ਹਨ ਅਤੇ 'ਇੱਕ ਭਾਰਤ ਸ਼੍ਰੇਸ਼ਠ ਭਾਰਤ' ਦੀ ਭਾਵਨਾ ਨੂੰ ਮਜ਼ਬੂਤ ਕਰਦੇ ਹਨ।
ਉਨ੍ਹਾਂ ਕਿਹਾ ਕਿ ਉੱਤਰ ਭਾਰਤ ਵਿੱਚ ਕੱਚੇ ਅੰਬਾਂ ਦਾ 'ਆਮ ਪੰਨਾ' ਗਰਮੀ ਤੋਂ ਰਾਹਤ ਦਿਵਾਉਂਦਾ ਹੈ। ਪੰਜਾਬ ਅਤੇ ਹਰਿਆਣਾ ਵਿੱਚ ਵੱਡੇ ਗਲਾਸਾਂ ਵਿੱਚ ਲੱਸੀ ਅਤੇ ਰਾਜਸਥਾਨ ਤੇ ਗੁਜਰਾਤ ਵਿੱਚ ਛਾਛ ਗਰਮੀ 'ਚ ਖਾਣੇ ਦਾ ਸਾਥੀ ਬਣਦੀ ਹੈ, ਜਦਕਿ ਬਿਹਾਰ, ਝਾਰਖੰਡ ਤੇ ਪੂਰਬੀ ਯੂਪੀ ਦਾ ਤਾਕਤਵਰ 'ਸੱਤੂ ਸ਼ਰਬਤ', ਕੋਂਕਣ ਤੇ ਗੋਆ ਦਾ 'ਕੋਕਮ ਸ਼ਰਬਤ ਅਤੇ ਸੋਲ ਕੜ੍ਹੀ', ਓਡੀਸ਼ਾ ਦਾ 'ਬੇਲ ਪਨਾ' ਅਤੇ ਦੱਖਣ ਭਾਰਤ ਦੇ 'ਪਾਨਕਮ, ਨੀਰ ਮੋਰ ਤੇ ਸੰਬਾਰਮ' ਸਿਰਫ਼ ਡ੍ਰਿੰਕਸ ਨਹੀਂ ਬਲਕਿ ਸਾਡੀ ਪਰੰਪਰਾ ਦਾ ਹਿੱਸਾ ਹਨ।
ਪ੍ਰਧਾਨ ਮੰਤਰੀ ਨੇ ਗਰਮੀਆਂ ਵਿੱਚ ਹਰ ਘਰ ਦੀ ਚਰਚਾ ਦਾ ਵਿਸ਼ਾ ਬਣਨ ਵਾਲੇ 'ਫਲਾਂ ਦੇ ਰਾਜੇ' ਅੰਬ ਦੀਆਂ ਵੱਖ-ਵੱਖ ਕਿਸਮਾਂ ਦਾ ਵੀ ਜ਼ਿਕਰ ਕੀਤਾ। ਉਨ੍ਹਾਂ ਮਹਾਰਾਸ਼ਟਰ ਦੇ 'ਹਾਪੁਸ' (ਅਲਫਾਂਸੋ), ਗੁਜਰਾਤ ਦੇ 'ਕੇਸਰ' ਅਤੇ ਬਿਹਾਰ ਦੇ 'ਜ਼ਰਦਾਲੂ' ਸਣੇ ਦੱਖਣ ਦੇ 'ਬੰਗਨਪੱਲੀ' ਅਤੇ ਬੰਗਾਲ ਦੇ 'ਹਿਮਸਾਗਰ' ਦਾ ਨਾਂ ਲਿਆ। ਉਨ੍ਹਾਂ ਆਪਣੇ ਸੰਸਦੀ ਖੇਤਰ ਦੇ ਅੰਬ ਦਾ ਜ਼ਿਕਰ ਕਰਦਿਆਂ ਕਿਹਾ, "ਮੇਰੀ ਕਾਸ਼ੀ ਦੇ 'ਲੰਗੜਾ' ਅੰਬ ਦੀ ਇਹ ਖ਼ਾਸੀਅਤ ਹੈ ਕਿ ਇਹ ਪੱਕਣ ਤੋਂ ਬਾਅਦ ਵੀ ਅਕਸਰ ਹਰਾ ਹੀ ਦਿਖਾਈ ਦਿੰਦਾ ਹੈ।"
ਪੀ.ਐੱਮ. ਮੋਦੀ ਨੇ ਅੰਬਾਂ ਦੀ ਖੇਤੀ ਕਰਨ ਵਾਲੇ ਦੇਸ਼ ਦੇ ਕਿਸਾਨ ਭਰਾਵਾਂ-ਭੈਣਾਂ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਅੰਬਾਂ ਦਾ ਸਫ਼ਰ ਹੁਣ ਪਿੰਡਾਂ ਤੋਂ ਨਿਕਲ ਕੇ ਗਲੋਬਲ ਮਾਰਕੀਟ ਤੱਕ ਪਹੁੰਚ ਚੁੱਕਾ ਹੈ। ਸਾਡੇ ਕਿਸਾਨ ਕੋਈ ਆਮ ਕਿਸਾਨ ਨਹੀਂ ਹਨ, ਬਲਕਿ ਉਹ ਦੇਸ਼ ਦੀ ਖੇਤੀਬਾੜੀ ਆਰਥਿਕਤਾ ਨੂੰ ਮਜ਼ਬੂਤ ਕਰਨ ਵਿੱਚ ਬਹੁਤ ਵਿਸ਼ੇਸ਼ ਭੂਮਿਕਾ ਨਿਭਾ ਰਹੇ ਹਨ।