ਮੋਕੀ (ਚੀਨ) : ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਚੀਨ ਦੇ ਮੋਕੀ ਵਿਖੇ ਖੇਡੇ ਗਏ ਫਾਈਨਲ ਮੁਕਾਬਲੇ ਵਿੱਚ ਮੇਜ਼ਬਾਨ ਚੀਨ ਨੂੰ 1-0 ਨਾਲ ਹਰਾ ਕੇ ਲਗਾਤਾਰ ਤੀਜੀ ਵਾਰ ਏ.ਐੱਚ.ਐੱਫ਼. (AHF) ਜੂਨੀਅਰ ਏਸ਼ੀਆ ਕੱਪ ਦਾ ਖ਼ਿਤਾਬ ਆਪਣੇ ਨਾਮ ਕਰ ਲਿਆ ਹੈ। ਇਸ ਇਤਿਹਾਸਕ ਜਿੱਤ ਦੇ ਨਾਲ ਹੀ ਭਾਰਤ ਨੇ ਜੂਨੀਅਰ ਹਾਕੀ ਵਿਸ਼ਵ ਕੱਪ ਲਈ ਵੀ ਸਿੱਧਾ ਕੁਆਲੀਫਾਈ ਕਰ ਲਿਆ ਹੈ। ਮੌਜੂਦਾ ਚੈਂਪੀਅਨ ਭਾਰਤੀ ਟੀਮ ਲਈ ਮੈਚ ਦਾ ਨਿਰਣਾਇਕ ਗੋਲ 17ਵੇਂ ਮਿੰਟ ਵਿੱਚ ਸਾਨਿਕਾ ਚੰਦਰਕਾਂਤ ਮਾਨੇ ਨੇ ਕੀਤਾ । ਸਾਨਿਕਾ ਨੇ ਸ਼ਾਨਦਾਰ ਸੂਝ-ਬੂਝ ਦਾ ਪ੍ਰਦਰਸ਼ਨ ਕਰਦੇ ਹੋਏ ਚੀਨੀ ਡਿਫੈਂਡਰ ਦੇ ਪਿੱਛੇ ਜਗ੍ਹਾ ਬਣਾਈ ਅਤੇ ਸਰਕਲ ਵਿੱਚ ਆਏ ਇੱਕ ਲੰਬੇ ਸਲੈਪ-ਪੁਸ਼ 'ਤੇ ਸਟਿਕ ਲਗਾ ਕੇ ਗੇਂਦ ਨੂੰ ਚੀਨੀ ਗੋਲਕੀਪਰ ਸ਼ੂ ਮੇਂਗਜੀਆਓ ਨੂੰ ਝਕਾਨੀ ਦਿੰਦੇ ਹੋਏ ਨੈੱਟ ਵਿੱਚ ਪਹੁੰਚਾ ਦਿੱਤਾ।
ਚੀਨ ਦੀ ਟੀਮ ਨੇ ਮੈਚ ਵਿੱਚ ਬਰਾਬਰੀ ਕਰਨ ਲਈ ਪੂਰਾ ਜ਼ੋਰ ਲਗਾਇਆ, ਪਰ ਭਾਰਤੀ ਖਿਡਾਰੀਆਂ ਨੇ ਧੀਰਜ ਅਤੇ ਮਜ਼ਬੂਤ ਰੱਖਿਆਤਮਕ (ਡਿਫੈਂਸ) ਰਣਨੀਤੀ ਨਾਲ ਚੀਨ ਨੂੰ ਗੋਲ ਕਰਨ ਦਾ ਕੋਈ ਸਪੱਸ਼ਟ ਮੌਕਾ ਨਹੀਂ ਦਿੱਤਾ। ਚੀਨ ਨੂੰ ਮਿਲੇ ਇੱਕ ਪੈਨਲਟੀ ਕਾਰਨਰ 'ਤੇ ਗੋਲ ਵੀ ਸ਼ਾਟ ਦੀ ਉੱਚਾਈ ਨਿਯਮਾਂ ਤੋਂ ਜ਼ਿਆਦਾ ਹੋਣ ਕਾਰਨ ਰੱਦ ਕਰ ਦਿੱਤਾ ਗਿਆ। ਭਾਰਤੀ ਟੀਮ ਪੂਰੇ ਟੂਰਨਾਮੈਂਟ ਵਿੱਚ ਇੱਕ ਵੀ ਮੈਚ ਹਾਰੇ ਬਿਨਾਂ ਅਜੇਤੂ ਰਹੀ। ਐਲੀਟ ਪੂਲ ਵਿੱਚ ਤਿੰਨ ਜਿੱਤਾਂ ਅਤੇ ਇੱਕ ਡਰਾਅ ਨਾਲ ਸ਼ੀਰਸ਼ 'ਤੇ ਰਹਿਣ ਤੋਂ ਬਾਅਦ ਭਾਰਤ ਨੇ ਸੈਮੀਫਾਈਨਲ ਵਿੱਚ ਦੱਖਣੀ ਕੋਰੀਆ ਨੂੰ 5-1 ਨਾਲ ਕਰਾਰੀ ਮਾਤ ਦਿੱਤੀ ਸੀ ਅਤੇ ਫਿਰ ਫਾਈਨਲ ਵਿੱਚ ਚੀਨ ਨੂੰ 1-0 ਨਾਲ ਹਰਾ ਕੇ ਟਰਾਫ਼ੀ ਆਪਣੇ ਨਾਮ ਕੀਤੀ।
ਇਸ ਸ਼ਾਨਦਾਰ ਪ੍ਰਾਪਤੀ 'ਤੇ ਹਾਕੀ ਇੰਡੀਆ ਨੇ ਟੀਮ ਦੀ ਹਰ ਇੱਕ ਖਿਡਾਰਨ ਨੂੰ 3 ਲੱਖ ਰੁਪਏ ਅਤੇ ਸਪੋਰਟ ਸਟਾਫ਼ ਦੇ ਹਰੇਕ ਮੈਂਬਰ ਨੂੰ 1.5 ਲੱਖ ਰੁਪਏ ਦਾ ਨਕਦ ਇਨਾਮ ਦੇਣ ਦਾ ਐਲਾਨ ਕੀਤਾ ਹੈ।