ਸੇਲਾਯੰਗ : ਭਾਰਤ ਦੀ ਅੰਡਰ-17 ਮਹਿਲਾ ਫੁੱਟਬਾਲ ਟੀਮ ਨੇ ਏ. ਐੱਫ. ਸੀ. ਅੰਡਰ-17 ਮਹਿਲਾ ਏਸ਼ੀਆਈ ਕੱਪ ਚੀਨ 2027 ਕੁਆਲੀਫਾਇਰ ਦੇ ਗਰੁੱਪ ਈ ਦੇ ਆਪਣੇ ਦੂਸਰੇ ਮੁਕਾਬਲੇ ’ਚ ਵੀਰਵਾਰ ਨੂੰ ਸੀਰੀਆ ਨੂੰ 2-0 ਨਾਲ ਹਰਾ ਕੇ ਆਪਣੇ ਅਭਿਆਨ ’ਚ ਇਕ ਹੋਰ ਮਹੱਤਵਪੂਰਨ ਕਦਮ ਵਧਾਇਆ।
ਇਰਾਕ ਖਿਲਾਫ ਪਹਿਲੇ ਮੈਚ ’ਚ ਭਾਰਤ ਦੀ ਰਿਕਾਰਡ 14-0 ਦੀ ਜਿੱਤ ’ਚ 5 ਗੋਲ ਕਰਨ ਵਾਲੀ ਅਨੁਸ਼ਕਾ ਨੇ ਦੋਨੋਂ ਹਾਫ ’ਚ 1-1 ਗੋਲ ਕਰ ਕੇ ਕੁਆਲੀਫਾਇਰ ’ਚ ਆਪਣੇ ਗੋਲ ਦੀ ਗਿਣਤੀ 7 ਕਰ ਲਈ। ਇਸ ਜਿੱਤ ਨਾਲ ਭਾਰਤ ਦੇ 2 ਮੈਚਾਂ ’ਚ 6 ਅੰਕ ਹੋ ਗਏ ਹਨ। ਹੁਣ ਗਰੁੱਪ ਈ ’ਚ ਉਸ ਦਾ ਆਖਰੀ ਮੁਕਾਬਲਾ 11 ਅਕਤੂਬਰ ਨੂੰ ਮੇਜ਼ਬਾਨ ਮਲੇਸ਼ੀਆ ਨਾਲ ਹੋਵੇਗਾ। ਸਿਰਫ ਗਰੁੱਪ ’ਚ ਟਾਪ ’ਤੇ ਰਹਿਣ ਵਾਲੀ ਟੀਮ ਹੀ ਏ. ਐੱਫ. ਸੀ. ਅੰਡਰ-17 ਮਹਿਲਾ ਏਸ਼ੀਆਈ ਕੱਪ ਚੀਨ 2027 ਲਈ ਕੁਆਲੀਫਾਈ ਕਰੇਗੀ। ਸੀਰੀਆ ਨੂੰ ਆਪਣੇ ਸ਼ੁਰੂਆਤੀ ਮੁਕਾਬਲੇ ’ਚ ਮਲੇਸ਼ੀਆ ਦੇ ਹੱਥੋਂ 0-1 ਨਾਲ ਹਾਰ ਮਿਲੀ ਸੀ।