ਬਿਹਾਰ ਦੇ ਮਖਾਣੇ ਨੇ ਵਿਦੇਸ਼ਾਂ 'ਚ ਵਧਾਈ ਧੱਕ: ਪੂਰਨੀਆ ਤੋਂ ਦੁਬਈ ਭੇਜੀ ਗਈ ਪਹਿਲੀ ਇਤਿਹਾਸਕ ਖੇਪ

ਵਿੱਤੀ ਸਾਲ 2025-26 ਬਿਹਾਰ ਦੇ ਮਖਾਣੇ ਲਈ ਇਤਿਹਾਸਕ ਰਿਹਾ ਹੈ। ਹੁਣ ਬਿਹਾਰ ਦਾ ਮਖਾਣਾ ਦੇਸ਼ ਹੀ ਨਹੀਂ ਸਗੋਂ ਵਿਦੇਸ਼ਾਂ ਵਿੱਚ ਵੀ ਇੱਕ ਮਜ਼ਬੂਤ ਬ੍ਰਾਂਡ ਵਜੋਂ ਉੱਭਰਿਆ ਹੈ। ਇਸ ਸਫਲਤਾ ਦੀ ਇੱਕ ਵੱਡੀ ਮਿਸਾਲ ਉਦੋਂ ਦੇਖਣ ਨੂੰ ਮਿਲੀ ਜਦੋਂ ਪੂਰਨੀਆ ਜ਼ਿਲ੍ਹੇ ਤੋਂ 2 ਮੀਟ੍ਰਿਕ ਟਨ ਜੀ.ਆਈ. ਟੈਗ ਪ੍ਰਾਪਤ 'ਮਿਥਿਲਾ ਮਖਾਣਾ' ਦੀ ਪਹਿਲੀ ਖੇਪ ਸਮੁੰਦਰੀ ਰਸਤੇ ਰਾਹੀਂ ਦੁਬਈ (ਯੂ.ਏ.ਈ.) ਭੇਜੀ ਗਈ।

5 ਲੱਖ ਕਿਸਾਨਾਂ ਦੀ ਬਦਲੀ ਕਿਸਮਤ
ਕੇਂਦਰ ਸਰਕਾਰ ਵੱਲੋਂ ਸਤੰਬਰ 2025 ਵਿੱਚ 'ਰਾਸ਼ਟਰੀ ਮਖਾਣਾ ਬੋਰਡ' ਦੇ ਗਠਨ ਨਾਲ ਰਾਜ ਦੇ ਲਗਭਗ 5 ਲੱਖ ਮਖਾਣਾ ਕਿਸਾਨਾਂ ਦੀ ਕਿਸਮਤ ਬਦਲ ਗਈ ਹੈ। ਜ਼ਿਕਰਯੋਗ ਹੈ ਕਿ ਬਿਹਾਰ ਦੇਸ਼ ਦੇ ਕੁੱਲ ਮਖਾਣਾ ਉਤਪਾਦਨ ਦਾ ਲਗਭਗ 85 ਫੀਸਦੀ ਹਿੱਸਾ ਪੈਦਾ ਕਰਦਾ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ 15 ਸਤੰਬਰ 2025 ਨੂੰ ਪੂਰਨੀਆ ਵਿੱਚ ਇਸ ਬੋਰਡ ਦਾ ਰਸਮੀ ਉਦਘਾਟਨ ਕੀਤਾ ਸੀ। ਇਸ ਦੇ ਨਾਲ ਹੀ ਕੇਂਦਰ ਸਰਕਾਰ ਨੇ 2025-26 ਤੋਂ 2030-31 ਤੱਕ ਲਈ 476.03 ਕਰੋੜ ਰੁਪਏ ਦੀ ਕੇਂਦਰੀ ਮਖਾਣਾ ਵਿਕਾਸ ਯੋਜਨਾ ਨੂੰ ਵੀ ਮਨਜ਼ੂਰੀ ਦਿੱਤੀ ਹੈ।

ਖੇਤੀ ਦੇ ਰਕਬੇ ਵਿੱਚ ਤਿੰਨ ਗੁਣਾ ਵਾਧਾ
ਸਰਕਾਰੀ ਹੱਲਾਸ਼ੇਰੀ ਅਤੇ ਮਖਾਣਾ ਵਿਕਾਸ ਯੋਜਨਾ ਸਦਕਾ ਮਖਾਣੇ ਦੀ ਖੇਤੀ ਹੇਠਲਾ ਰਕਬਾ ਤਿੰਨ ਗੁਣਾ ਵਧ ਗਿਆ ਹੈ। ਸਾਲ 2012 ਵਿੱਚ ਜਿੱਥੇ ਇਹ ਲਗਭਗ 13,000 ਹੈਕਟੇਅਰ ਸੀ, ਉੱਥੇ ਹੀ ਹੁਣ ਇਹ 35,000 ਹੈਕਟੇਅਰ ਤੱਕ ਪਹੁੰਚ ਗਿਆ ਹੈ। ਰਾਜ ਦੇ ਦਰਭੰਗਾ, ਮਧੂਬਨੀ, ਕਟਿਹਾਰ, ਪੂਰਨੀਆ, ਸਹਰਸਾ ਅਤੇ ਹੋਰ ਜ਼ਿਲ੍ਹਿਆਂ ਵਿੱਚ ਇਸ ਦਾ ਭਾਰੀ ਉਤਪਾਦਨ ਹੋ ਰਿਹਾ ਹੈ।

'ਬ੍ਰਾਂਡ ਬਿਹਾਰ' ਵਜੋਂ ਮਿਲੀ ਮਾਨਤਾ
ਬਿਹਾਰ ਦੇ ਖੇਤੀਬਾੜੀ ਮੰਤਰੀ ਰਾਮ ਕ੍ਰਿਪਾਲ ਯਾਦਵ ਨੇ ਦੱਸਿਆ ਕਿ ਦੁਬਈ ਤੱਕ ਸਮੁੰਦਰੀ ਮਾਰਗ ਰਾਹੀਂ ਨਿਰਯਾਤ ਕਰਨਾ ਸੂਬੇ ਲਈ ਇੱਕ ਵੱਡੀ ਪ੍ਰਾਪਤੀ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਮਖਾਣੇ ਨੂੰ 'ਬ੍ਰਾਂਡ ਬਿਹਾਰ' ਵਜੋਂ ਸਥਾਪਿਤ ਕਰਨ ਲਈ ਵਚਨਬੱਧ ਹੈ। ਇਸ ਪਹਿਲਕਦਮੀ ਨਾਲ ਨਾ ਸਿਰਫ਼ ਕਿਸਾਨਾਂ ਦੀ ਆਮਦਨ ਵਿੱਚ ਵਾਧਾ ਹੋਇਆ ਹੈ, ਸਗੋਂ ਬਿਹਾਰ ਹੁਣ ਅੰਤਰਰਾਸ਼ਟਰੀ ਗੁਣਵੱਤਾ ਮਾਪਦੰਡਾਂ ਅਤੇ ਪੈਕੇਜਿੰਗ ਵਿੱਚ ਵੀ ਪੂਰੀ ਤਰ੍ਹਾਂ ਸਮਰੱਥ ਹੋ ਚੁੱਕਾ ਹੈ।