ਨਵੀਂ ਦਿੱਲੀ : ਫੌਜ ਨੂੰ ਇਕ ਟੈਕਨਾਲੋਜੀ ਕੰਪਨੀ ਨੇ 106 ਟਰਬੋਜੈੱਟ-ਚਾਲਿਤ ‘ਕਾਮਿਕੇਜ਼’ ਡਰੋਨ ਸੌਂਪੇ ਹਨ। ਇਨ੍ਹਾਂ ਨੂੰ ਦੁਸ਼ਮਣ ਦੇ ਇਲਾਕੇ ’ਚ ਅੰਦਰ ਤੱਕ ਜਾ ਕੇ ਅਹਿਮ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਉਣ ਅਤੇ ਬਿਜਲਈ-ਚੁੰਬਕੀ (ਇਲੈਕਟ੍ਰੋ-ਮੈਗਨੈਟਿਕ) ਵਾਤਾਵਰਣ ’ਚ ਕੰਮ ਕਰਨ ਲਈ ਵਿਕਸਿਤ ਕੀਤਾ ਗਿਆ ਹੈ। ਇਕ ਬਿਆਨ ’ਚ ਇਹ ਜਾਣਕਾਰੀ ਦਿੱਤੀ ਗਈ ਹੈ।
ਰੱਖਿਆ ਟੈਕਨਾਲੋਜੀ ਕੰਪਨੀ ਐੱਸ.ਐੱਮ.ਪੀ.ਪੀ. ਨੇ ਦੱਸਿਆ ਕਿ 180 ਕਿਲੋਮੀਟਰ ਤੱਕ ਦੀ ਮਾਰਕ ਸਮਰੱਥਾ ਅਤੇ 450 ਕਿਲੋਮੀਟਰ ਪ੍ਰਤੀ ਘੰਟੇ ਤੱਕ ਦੀ ਰਫ਼ਤਾਰ ਵਾਲਾ ਡਰੋਨ ‘ਅਗਨੀਵੇਗ’ ਅਹਿਮ ਫੌਜੀ ਬੁਨਿਆਦੀ ਢਾਂਚੇ, ਸਾਜੋ-ਸਾਮਾਨ ਕੇਂਦਰ, ਕਮਾਂਡ ਸੈਂਟਰ, ਰਾਡਾਰ ਅਤੇ ਹੋਰ ਰਣਨੀਤਕ ਟਿਕਾਣਿਆਂ ’ਤੇ ਖ਼ੁਦ ਸਟੀਕ ਹਮਲੇ ਕਰਨ ’ਚ ਸਮਰੱਥ ਹੈ। ਬਿਆਨ ਅਨੁਸਾਰ, ‘‘ਲੰਬੀ ਦੂਰੀ ਤੱਕ ਦੀ ਮਾਰਕ ਸਮਰੱਥਾ, ਸਟੀਕ ਹਮਲੇ ਦੀ ਕਾਬਲੀਅਤ ਅਤੇ ਬਹੁਤ ਤੇਜ਼ ਰਫਤਾਰ ਨਾਲ ਹਮਲਾ ਕਰਨ ਦੀ ਖ਼ੂਬੀ ਨਾਲ ਇਹ ਪ੍ਰਣਾਲੀ ਭਾਰਤੀ ਫੌਜ ਨੂੰ ਸੰਵੇਦਨਸ਼ੀਲ ਨਿਸ਼ਾਨਿਆਂ ’ਤੇ ਹਮਲਾ ਕਰਨ ਲਈ ਲਚਕਦਾਰ ਅਤੇ ਕਿਫ਼ਾਇਤੀ ਬਦਲ ਦਿੰਦੀ ਹੈ। ਨਾਲ ਹੀ ਇਹ ਡਰੋਨ ਫੌਜ ਦੇ ਜਵਾਨਾਂ ਲਈ ਜੋਖਮ ਵੀ ਘੱਟ ਕਰਦਾ ਹੈ।’’