ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਦੇ ਮੁੱਖ ਕੋਚ ਗੌਤਮ ਗੰਭੀਰ ਨੇ ਸੰਕੇਤ ਦਿੱਤਾ ਹੈ ਕਿ ਨਿਊਜ਼ੀਲੈਂਡ ਦੇ ਆਗਾਮੀ ਦੌਰੇ ਦੌਰਾਨ ਭਾਰਤ ਦੇ ਕੁਝ ਸੀਨੀਅਰ ਬੱਲੇਬਾਜ਼ਾਂ ਨੂੰ ਵਾਈਟ-ਬਾਲ (ਓ.ਡੀ.ਆਈ. ਅਤੇ ਟੀ-20) ਕ੍ਰਿਕਟ ਤੋਂ ਆਰਾਮ ਦਿੱਤਾ ਜਾ ਸਕਦਾ ਹੈ, ਤਾਂ ਜੋ ਉਹ ਟੈਸਟ ਕ੍ਰਿਕਟ ਦੀਆਂ ਤਿਆਰੀਆਂ 'ਤੇ ਧਿਆਨ ਕੇਂਦਰਿਤ ਕਰ ਸਕਣ। ਉਨ੍ਹਾਂ ਨੇ ਘੱਟ ਸਮੇਂ ਵਿੱਚ 50 ਓਵਰਾਂ ਦੇ ਫਾਰਮੈਟ ਤੋਂ ਪੰਜ ਦਿਨਾਂ ਟੈਸਟ ਕ੍ਰਿਕਟ ਵਿੱਚ ਢਲਣ ਦੀ ਚੁਣੌਤੀ ਨੂੰ ਮਹੱਤਵਪੂਰਨ ਦੱਸਿਆ।
ਭਾਰਤ ਦਾ ਨਿਊਜ਼ੀਲੈਂਡ ਦੌਰਾ ਕਾਫ਼ੀ ਲੰਬਾ ਹੈ, ਜਿਸ ਵਿੱਚ ਵੱਖ-ਵੱਖ ਫਾਰਮੈਟਾਂ ਦੇ ਕੁੱਲ 12 ਮੈਚ ਖੇਡੇ ਜਾਣਗੇ। ਵੈਲਿੰਗਟਨ ਵਿੱਚ ਪਹਿਲਾ ਟੈਸਟ ਮੈਚ 19 ਨਵੰਬਰ ਤੋਂ ਸ਼ੁਰੂ ਹੋਵੇਗਾ, ਜੋ ਕਿ ਪੰਜਵੇਂ ਅਤੇ ਆਖਰੀ ਵਨਡੇ ਤੋਂ ਸਿਰਫ਼ ਤਿੰਨ ਦਿਨ ਬਾਅਦ ਹੈ। ਭਾਰਤੀ ਘਰੇਲੂ ਸੀਜ਼ਨ ਤੋਂ ਪਹਿਲਾਂ ਗੱਲਬਾਤ ਕਰਦਿਆਂ ਗੰਭੀਰ ਨੇ ਕਿਹਾ, "ਟੈਸਟ ਮੈਚ ਦੀ ਚੰਗੀ ਤਿਆਰੀ ਲਈ ਕਈ ਵਾਰ ਬੱਲੇਬਾਜ਼ਾਂ ਨੂੰ ਵਾਈਟ-ਬਾਲ ਕ੍ਰਿਕਟ ਤੋਂ ਬ੍ਰੇਕ ਦੇਣੀ ਪੈਂਦੀ ਹੈ, ਕਿਉਂਕਿ ਟੀ-20 ਤੋਂ ਵਨਡੇ ਵਿੱਚ ਢਲਣਾ ਆਸਾਨ ਹੁੰਦਾ ਹੈ, ਪਰ ਟੈਸਟ ਲਈ ਵੱਖਰੀ ਤਿਆਰੀ ਦੀ ਲੋੜ ਹੁੰਦੀ ਹੈ।"
ਇਸ ਫੈਸਲੇ ਕਾਰਨ ਕਪਤਾਨ ਸ਼ੁਭਮਨ ਗਿਲ, ਕੇ.ਐੱਲ. ਰਾਹੁਲ, ਯਸ਼ਸਵੀ ਜਾਇਸਵਾਲ, ਜਸਪ੍ਰੀਤ ਬੁਮਰਾਹ, ਮੁਹੰਮਦ ਸਿਰਾਜ, ਰਵਿੰਦਰ ਜਡੇਜਾ ਅਤੇ ਨੀਤੀਸ਼ ਰੈੱਡੀ ਵਰਗੇ ਪ੍ਰਮੁੱਖ ਖਿਡਾਰੀ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦੇ ਮੈਚਾਂ ਦੀ ਤਿਆਰੀ ਲਈ ਕੁੱਝ ਵਨਡੇ ਮੈਚਾਂ ਤੋਂ ਬਾਹਰ ਰਹਿ ਸਕਦੇ ਹਨ। ਗੰਭੀਰ ਨੇ ਇਹ ਵੀ ਮੰਨਿਆ ਕਿ ਭਵਿੱਖ ਵਿੱਚ ਤਿੰਨੋਂ ਫਾਰਮੈਟ ਖੇਡਣ ਵਾਲੇ ਖਿਡਾਰੀਆਂ ਦੀ ਗਿਣਤੀ ਘੱਟਦੀ ਜਾਵੇਗੀ।
2027 ਵਿਸ਼ਵ ਕੱਪ ਲਈ ਬੁਮਰਾਹ ਅਤੇ ਹਾਰਦਿਕ ਅਹਿਮ
ਭਾਰਤ ਵੈਸਟਇੰਡੀਜ਼ ਖ਼ਿਲਾਫ਼ ਘਰੇਲੂ ਵਨਡੇ ਲੜੀ ਨਾਲ 2027 ਵਿਸ਼ਵ ਕੱਪ ਦੀਆਂ ਤਿਆਰੀਆਂ ਸ਼ੁਰੂ ਕਰੇਗਾ। ਗੰਭੀਰ ਨੇ ਸਪੱਸ਼ਟ ਕੀਤਾ ਕਿ ਜਸਪ੍ਰੀਤ ਬੁਮਰਾਹ ਅਤੇ ਹਾਰਦਿਕ ਪੰਡਿਆ 2027 ਦੇ ਵਿਸ਼ਵ ਕੱਪ ਦੀਆਂ ਯੋਜਨਾਵਾਂ ਲਈ ਬਹੁਤ ਮਹੱਤਵਪੂਰਨ ਹਨ। ਉਨ੍ਹਾਂ ਕਿਹਾ, "ਦੱਖਣੀ ਅਫ਼ਰੀਕਾ ਵਿੱਚ ਹੋਣ ਵਾਲੇ ਵਿਸ਼ਵ ਕੱਪ ਲਈ ਬੁਮਰਾਹ ਅਤੇ ਹਾਰਦਿਕ ਦੋਵੇਂ ਸਾਡੇ ਲਈ ਬਹੁਤ ਅਹਿਮ ਹਨ। ਹਾਰਦਿਕ ਵਰਗਾ ਖਿਡਾਰੀ ਜੋ 10 ਓਵਰ ਗੇਂਦਬਾਜ਼ੀ ਦੇ ਨਾਲ-ਨਾਲ ਨੰਬਰ 6 ਜਾਂ 7 'ਤੇ ਬੱਲੇਬਾਜ਼ੀ ਕਰ ਸਕੇ, ਬਹੁਤ ਘੱਟ ਟੀਮਾਂ ਕੋਲ ਹੁੰਦਾ ਹੈ।"