ਤਮਿਲਨਾਡੂ ਵਿਧਾਨ ਸਭਾ ਚੋਣਾਂ ਵਿੱਚ 108 ਸੀਟਾਂ ਜਿੱਤ ਕੇ ਸਭ ਤੋਂ ਵੱਡੀ ਪਾਰਟੀ ਵਜੋਂ ਉਭਰਨ ਤੋਂ ਇੱਕ ਦਿਨ ਬਾਅਦ, ਤਮਿਲਗਾ ਵੇਤਰੀ ਕੜਗਮ (TVK) ਦੇ ਮੁਖੀ ਵਿਜੇ ਨੇ ਮੰਗਲਵਾਰ ਨੂੰ ਚੇਨਈ ਸਥਿਤ ਪਾਰਟੀ ਹੈੱਡਕੁਆਰਟਰ ਵਿੱਚ ਨਵੇਂ ਚੁਣੇ ਗਏ ਵਿਧਾਇਕਾਂ ਨਾਲ ਅਹਿਮ ਬੈਠਕ ਕੀਤੀ। 23 ਅਪ੍ਰੈਲ ਨੂੰ ਹੋਈਆਂ ਚੋਣਾਂ ਦੇ ਨਤੀਜੇ ਸੋਮਵਾਰ (4 ਮਈ) ਨੂੰ ਐਲਾਨੇ ਗਏ ਸਨ, ਜਿਸ ਵਿੱਚ ਵਿਜੇ ਦੀ ਪਾਰਟੀ ਨੇ ਸੂਬੇ ਦੀ ਸਿਆਸਤ ਦੇ ਦੋ ਵੱਡੇ ਥੰਮ੍ਹਾਂ- ਡੀ.ਐੱਮ.ਕੇ. (DMK) ਅਤੇ ਏ.ਆਈ.ਏ.ਡੀ.ਐੱਮ.ਕੇ. (AIADMK) ਨੂੰ ਪਿੱਛੇ ਛੱਡ ਦਿੱਤਾ ਹੈ।
ਬੈਠਕ ਸ਼ੁਰੂ ਕਰਨ ਤੋਂ ਪਹਿਲਾਂ ਵਿਜੇ ਨੇ ਪਾਰਟੀ ਦੇ ਵਿਚਾਰਧਾਰਕ ਆਦਰਸ਼ਾਂ- ਪੇਰੀਆਰ ਈ.ਵੀ. ਰਾਮਾਸਾਮੀ, ਬੀ.ਆਰ. ਅੰਬੇਡਕਰ, ਕੇ. ਕਾਮਰਾਜ, ਵੇਲੂ ਨਾਚਿਆਰ ਅਤੇ ਅੰਜਲਾਈ ਅੰਮਲ ਦੀਆਂ ਤਸਵੀਰਾਂ 'ਤੇ ਫੁੱਲ ਮਾਲਾਵਾਂ ਭੇਂਟ ਕੀਤੀਆਂ। ਪਾਰਟੀ ਦੇ ਇੱਕ ਵਿਧਾਇਕ ਅਨੁਸਾਰ, ਇਸ ਬੈਠਕ ਦਾ ਮੁੱਖ ਮਕਸਦ ਵਿਧਾਇਕ ਦਲ ਦੇ ਨੇਤਾ ਦੀ ਚੋਣ ਕਰਨਾ ਅਤੇ ਵਿਧਾਨ ਸਭਾ ਵਿੱਚ ਪਾਰਟੀ ਦੇ ਵਿਵਹਾਰ ਅਤੇ ਰਣਨੀਤੀ 'ਤੇ ਚਰਚਾ ਕਰਨਾ ਸੀ। ਇਸ ਦੌਰਾਨ ਸਾਰੇ ਨਵੇਂ ਚੁਣੇ ਗਏ ਵਿਧਾਇਕਾਂ ਨੇ ਆਪਣੇ ਜਿੱਤ ਦੇ ਸਰਟੀਫਿਕੇਟ ਪਾਰਟੀ ਮੁਖੀ ਵਿਜੇ ਨੂੰ ਸੌਂਪੇ।
ਜ਼ਿਕਰਯੋਗ ਹੈ ਕਿ ਤਮਿਲਨਾਡੂ ਦੀ 234 ਮੈਂਬਰੀ ਵਿਧਾਨ ਸਭਾ ਵਿੱਚ ਬਹੁਮਤ ਲਈ 118 ਸੀਟਾਂ ਦੀ ਲੋੜ ਹੈ। ਇਨ੍ਹਾਂ ਚੋਣਾਂ 'ਚ TVK ਨੂੰ 108 ਸੀਟਾਂ ਮਿਲੀਆਂ ਹਨ, ਪਰ ਉਹ ਹਾਲੇ ਵੀ ਬਹੁਮਤ ਤੋਂ 10 ਸੀਟਾਂ ਘੱਟ ਪਿੱਛੇ ਹੈ। ਸੱਤਾਧਾਰੀ ਡੀ.ਐੱਮ.ਕੇ. ਨੂੰ 59 ਅਤੇ ਏ.ਆਈ.ਡੀ.ਐੱਮ.ਕੇ. ਨੂੰ 47 ਸੀਟਾਂ ਮਿਲੀਆਂ ਹਨ।
ਇਸ ਦੌਰਾਨ ਪਾਰਟੀ ਨੇਤਾ ਨੰਜਿਲ ਸੰਪਤ ਨੇ ਭਰੋਸਾ ਜਤਾਇਆ ਹੈ ਕਿ ਵਿਜੇ ਜਲਦੀ ਹੀ ਬਾਕੀ 10 ਵਿਧਾਇਕਾਂ ਦਾ ਸਮਰਥਨ ਜੁਟਾ ਕੇ ਸਰਕਾਰ ਬਣਾਉਣ ਦਾ ਹੱਲ ਕੱਢ ਲੈਣਗੇ। ਉਨ੍ਹਾਂ ਕਿਹਾ, "ਮੈਨੂੰ ਪੂਰਾ ਵਿਸ਼ਵਾਸ ਹੈ ਕਿ ਜਲਦੀ ਹੀ ਚੰਗੀ ਖ਼ਬਰ ਮਿਲੇਗੀ।"