ਮੋਦੀ ਸਰਕਾਰ ਹੁਣ ‘ਚਿੰਤਨ ਤੋਂ ਐਕਸ਼ਨ’ ਵੱਲ ਵਧ ਰਹੀ ਹੈ। 30 ਸਤੰਬਰ ਤੇ 1 ਅਕਤੂਬਰ ਨੂੰ ਹੋਣ ਵਾਲੇ ‘ਕੌਂਸਲ ਆਫ ਮਨਿਸਟਰਜ਼ ਚਿੰਤਨ ਸ਼ਿਵਿਰ 2.0’ ਦੇ ਦੂਜੇ ਦੌਰ ’ਚ ਕੇਂਦਰੀ ਮੰਤਰੀਆਂ ਨੂੰ ਇਕ ਵਿਸਤ੍ਰਿਤ ਕਾਰਜ ਯੋਜਨਾ ਪੇਸ਼ ਕੀਤੀ ਜਾਵੇਗੀ।
ਇਹ ਬਲਿਊ ਪ੍ਰਿੰਟ 23-24 ਸਤੰਬਰ ਨੂੰ ‘ਸੇਵਾ ਤੀਰਥ’ ਵਿਖੇ ਹੋਈ ਚਰਚਾ ਦੇ ਪਹਿਲੇ ਦੌਰ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਦਿੱਤੇ ਗਏ ਨਿਰਦੇਸ਼ਾਂ ’ਤੇ ਆਧਾਰਿਤ ਹੋਵੇਗਾ। ਨਾਲ ਹੀ ਉਸ ਪ੍ਰਕਿਰਿਆ ਤੋਂ ਹਾਸਲ ਹੋਏ ਮਾਰਗਦਰਸ਼ਨ ਨੂੰ ਸ਼ਾਮਲ ਕਰੇਗਾ।
ਮੰਤਰੀਆਂ ਲਈ ਸੰਦੇਸ਼ ਸਪੱਸ਼ਟ ਹੈ : ਯੋਜਨਾਵਾਂ ਨੂੰ ਲਾਗੂ ਕਰਨ ਤੋਂ ਅੱਗੇ ਵਧ ਕੇ 100 ਫੀਸਦੀ ਕਵਰੇਜ ਹਾਸਲ ਕਰੋ ਅਤੇ ਇਹ ਯਕੀਨੀ ਬਣਾਉਣ ਲਈ ਯੋਜਨਾਵਾਂ ਵਿਕਸਤ ਕਰੋ ਕਿ ਲੱਗਭਗ 40-45 ਪ੍ਰਮੁੱਖ ਕੇਂਦਰੀ ਭਲਾਈ ਯੋਜਨਾਵਾਂ ਹਰੇਕ ਯੋਗ ਲਾਭਪਾਤਰੀ ਤੱਕ ਪਹੁੰਚ ਜਾਣ।
ਹਰੇਕ ਮੰਤਰੀ ਨੂੰ ਆਪਣੇ ਸਾਥੀਆਂ ਨਾਲ ਮਿਲਣ, ਸ਼ਾਸਨ ਦੇ ਸਬਕ ਨੂੰ ਦਸਤਾਵੇਜ਼ ਬਣਾਉਣ ਤੇ ਉਨ੍ਹਾਂ ਨੂੰ ਆਪਣੇ ਵਿਭਾਗ ਲਈ ਲਾਗੂ ਕਰਨ ਯੋਗ ਉਪਾਵਾਂ ’ਚ ਅਨੁਵਾਦ ਕਰਨ ਲਈ ਕਿਹਾ ਗਿਆ ਹੈ। ਜ਼ਮੀਨੀ ਪੱਧਰ ਦੀ ਮੌਜੂਦਗੀ ’ਤੇ ਵੀ ਜ਼ੋਰ ਦਿੱਤਾ ਗਿਆ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਸਰਕਾਰੀ ਕੰਮ ਦੀਆਂ ਗੁੰਝਲਾਂ ’ਚ ਫਸੇ ਬਿਨਾਂ ਲੋਕਾਂ ਤੱਕ ਲਾਭ ਪਹੁੰਚਣ।
ਮੰਤਰੀਆਂ ਨੂੰ ਜ਼ਮੀਨੀ ਹਕੀਕਤਾਂ ਨੂੰ ਸਮਝਣ ਤੇ ਨਾਂਹਪੱਖੀ ਬਿਰਤਾਂਤਾਂ ਦਾ ਜਵਾਬ ਦੇਣ ਲਈ ਤਿਆਰ ਰਹਿਣ ਲਈ ਵੀ ਕਿਹਾ ਗਿਆ ਹੈ। ਉਮੀਦ ਹੈ ਕਿ ਯੋਜਨਾਵਾਂ ਦੀ ਵੰਡ ਸਮੇਂ ਨੌਜਵਾਨਾਂ ਤੇ ਔਰਤਾਂ ’ਤੇ ਵਿਸ਼ੇਸ਼ ਧਿਆਨ ਦਿੱਤਾ ਜਾਵੇਗਾ। ਮੁੱਖ ਵਿਸ਼ਾ ‘ਜਨ ਵਿਸ਼ਵਾਸ ਸੇ ਜਨ ਆਧਾਰ’ ਹੈ ਭਾਵ ਪ੍ਰਭਾਵਸ਼ਾਲੀ ਸ਼ਾਸਨ ਤੇ ਵੰਡ ਰਾਹੀਂ ਲੋਕਾਂ ਦਾ ਭਰੋਸਾ ਜਿੱਤਣਾ।
ਮੋਦੀ ਨੇ ਏਜੰਡੇ ’ਤੇ ਕੰਮ ਕਰਨ ਤੇ 2029 ਤੱਕ ਸਰਕਾਰ ਦੇ ਬਾਕੀ ਕਾਰਜਕਾਲ ਲਈ ਇਕ ਵਿਆਪਕ ਕਾਰਜ ਯੋਜਨਾ ਤਿਆਰ ਕਰਨ ਲਈ ਮੰਤਰੀਆਂ ਦੇ 8 ਗਰੁੱਪ ਬਣਾਏ ਸਨ। ਪਹਿਲੇ ਦੌਰ ’ਚ ‘ਵਿਕਸਤ ਭਾਰਤ @ 2047’ ਲਈ ਰੋਡਮੈਪ ’ਤੇ ਵੀ ਚਰਚਾ ਕੀਤੀ ਗਈ।
ਇਸ ਚਰਚਾ ’ਚ ਸੀਨੀਅਰ ਮੰਤਰੀ ਰਾਜਨਾਥ ਸਿੰਘ, ਅਮਿਤ ਸ਼ਾਹ, ਨਿਰਮਲਾ ਸੀਤਾਰਾਮਨ, ਪਿਊਸ਼ ਗੋਇਲ, ਹਰਦੀਪ ਸਿੰਘ ਪੁਰੀ, ਸ਼ਿਵਰਾਜ ਸਿੰਘ ਚੌਹਾਨ ਤੇ ਅਸ਼ਵਿਨੀ ਵੈਸ਼ਨਵ ਸ਼ਾਮਲ ਹੋਏ। ਉਮੀਦ ਹੈ ਕਿ ਇਸ ਸੈਸ਼ਨ ’ਚ ਕੈਂਪ ਦੇ ਵਿਆਪਕ ਸੁਝਾਵਾਂ ਨੂੰ ਵਿਭਾਗ-ਵਾਰ ਟੀਚਿਆਂ, ਵੰਡ ਪ੍ਰਣਾਲੀਆਂ ਤੇ ਮਾਪਣਯੋਗ ਕਾਰਜ ਬਿੰਦੂਆਂ ’ਚ ਬਦਲਿਆ ਜਾਵੇਗਾ।