ਪੰਜਾਬੀ ਸੰਗੀਤ ਜਗਤ ਦੇ ਦਿੱਗਜ ਗਾਇਕ ਅਤੇ ਅਦਾਕਾਰ ਸਤਿੰਦਰ ਸਰਤਾਜ ਅਕਸਰ ਆਪਣੀ ਗਾਇਕੀ ਅਤੇ ਸਾਦਗੀ ਲਈ ਚਰਚਾ ਵਿੱਚ ਰਹਿੰਦੇ ਹਨ। ਹਾਲ ਹੀ ਵਿੱਚ ਸਰਤਾਜ ਨੇ 'ਧੁਰੰਦਰ: ਦਿ ਰਿਵੇਂਜ' ਦੇ ਆਪਣੇ ਮਕਬੂਲ ਗੀਤ ‘ਸਾਨੂੰ ਸਾਰੀਆਂ ਵਿਸਰ ਗਈਆਂ ਰਾਹਾਂ’ ਦੇ ਬਣਨ ਪਿੱਛੇ ਦੀ ਇੱਕ ਬਹੁਤ ਹੀ ਦਿਲਚਸਪ ਅਤੇ ਹੈਰਾਨੀਜਨਕ ਕਹਾਣੀ ਸਾਂਝੀ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਗੀਤ ਕਿਸੇ ਲੰਬੀ ਯੋਜਨਾ ਦਾ ਹਿੱਸਾ ਨਹੀਂ ਸੀ, ਸਗੋਂ ਬਹੁਤ ਹੀ ਘੱਟ ਸਮੇਂ ਵਿੱਚ ਅਚਾਨਕ ਤਿਆਰ ਹੋਇਆ ਸੀ।
ਸਰਤਾਜ ਨੇ ਦੱਸਿਆ ਕਿ ਇਹ ਸਾਰਾ ਸਿਲਸਿਲਾ 15 ਮਾਰਚ ਦੀ ਦੁਪਹਿਰ 2 ਵਜੇ ਸ਼ੁਰੂ ਹੋਇਆ ਸੀ, ਜਦੋਂ ਫਿਲਮ ਦਾ ਮਿਊਜ਼ਿਕ 17 ਮਾਰਚ ਨੂੰ ਰਿਲੀਜ਼ ਹੋਣਾ ਸੀ। ਉਨ੍ਹਾਂ ਨੂੰ ਮਿਊਜ਼ਿਕ ਡਾਇਰੈਕਟਰ ਸ਼ਾਸਵਤ ਸਚਦੇਵ ਦਾ ਫੋਨ ਆਇਆ, ਜਿਨ੍ਹਾਂ ਨੇ ਬੇਨਤੀ ਕੀਤੀ ਕਿ ਜੇਕਰ ਉਹ ਇਸ ਗੀਤ ਵਿੱਚ ਇੱਕ ਲਾਈਨ ਗਾ ਦੇਣ ਤਾਂ ਗਾਣੇ ਦੀ ਫਿਲਮ ਵਿੱਚ ਪਲੇਸਮੈਂਟ ਹੋ ਜਾਵੇਗੀ। ਉਸ ਵਕਤ ਤੱਕ ਇਹ ਗੀਤ ਫਿਲਮ ਦਾ ਹਿੱਸਾ ਵੀ ਨਹੀਂ ਸੀ। ਸਰਤਾਜ ਮੁਤਾਬਕ ਸਥਿਤੀ ਕਾਫ਼ੀ ਨਾਜ਼ੁਕ ਸੀ, ਕਿਉਂਕਿ ਓਵਰਸੀਜ਼ (ਵਿਦੇਸ਼ਾਂ) ਵਿੱਚ ਭੇਜਣ ਲਈ ਫਿਲਮ ਦੇ ਪ੍ਰਿੰਟ ਦੁਪਹਿਰ 3:30 ਵਜੇ ਤੱਕ ਨਿਕਲਣੇ ਸਨ। ਸਰਤਾਜ ਖੁਦ ਉਸ ਸਮੇਂ ਲੁਧਿਆਣੇ ਵਿੱਚ ਇੱਕ ਸ਼ੋਅ ਲਈ ਜਾਣ ਦੀ ਤਿਆਰੀ ਕਰ ਰਹੇ ਸਨ, ਪਰ ਮਿਊਜ਼ਿਕ ਡਾਇਰੈਕਟਰ ਦੇ ਪਿਆਰ ਅਤੇ ਸਤਿਕਾਰ ਨੂੰ ਦੇਖਦੇ ਹੋਏ ਉਨ੍ਹਾਂ ਨੇ ਇਸ ਕੰਮ ਲਈ ਹਾਮੀ ਭਰ ਦਿੱਤੀ।
2 ਮਿੰਟ 'ਚ ਲਿਖਿਆ ਤੇ 15 ਮਿੰਟ 'ਚ ਕੀਤਾ ਰਿਕਾਰਡ
ਸਰਤਾਜ ਨੇ ਖੁਲਾਸਾ ਕੀਤਾ ਕਿ ਜਸਮੀਨ ਸੈਂਡਲਾਸ ਦਾ ਹਿੱਸਾ ਪਹਿਲਾਂ ਹੀ ਰਿਕਾਰਡ ਸੀ ਪਰ ਫ਼ਿਲਮ ਦੀ ਸਿਚੁਏਸ਼ਨ ਮੁਤਾਬਕ ਉਸ ਵਿੱਚ ਕੁਝ ਕਮੀ ਸੀ। ਮੈਨੂੰ ਕਿਹਾ ਗਿਆ ਕਿ ਮੈਂ ਉਸੇ ਮਾਹੌਲ ਅਤੇ ਅਹਿਸਾਸ ਨੂੰ ਧਿਆਨ ਵਿੱਚ ਰੱਖਦਿਆਂ ਕੁਝ ਅਜਿਹਾ ਲਿਖਾਂ ਕਿ ਸਭ ਕੁਝ ਪੂਰੀ ਤਰ੍ਹਾਂ ਮੈਚ ਹੋ ਜਾਵੇ। ਉਨ੍ਹਾਂ ਨੇ ਦਿੱਤੀ ਗਈ ਸਥਿਤੀ ਅਤੇ ਭਾਵਨਾਵਾਂ ਨੂੰ ਸਮਝਦੇ ਹੋਏ ਮਹਿਜ਼ 2 ਤੋਂ 5 ਮਿੰਟਾਂ ਵਿੱਚ ਗੀਤ ਦੀ ਰੰਗਤ ਅਤੇ ਦਾਇਰਾ ਤਿਆਰ ਕੀਤਾ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਆਪਣੇ ਸਟੂਡੀਓ ਵਿੱਚ ਇਕੱਲਿਆਂ ਹੀ ਮਹਿਜ਼ 15 ਮਿੰਟਾਂ ਵਿੱਚ ਇਸ ਨੂੰ ਡਬ ਕਰਕੇ ਟੀਮ ਨੂੰ ਭੇਜ ਦਿੱਤਾ। ਇਸ ਤਰ੍ਹਾਂ ਇਹ ਖੂਬਸੂਰਤ ਗੀਤ 'ਸਾਨੂੰ ਸਾਰੀਆਂ ਵਿਸਰ ਗਈਆਂ ਰਾਹਾਂ, ਕਿਹੜੇ ਪਾਸੇ ਜਾਈਏ ਸੱਜਣਾ' ਹੋਂਦ ਵਿੱਚ ਆਇਆ, ਜਿਸ ਨੂੰ ਅੱਜ ਸਰੋਤਿਆਂ ਵੱਲੋਂ ਬੇਹੱਦ ਪਸੰਦ ਕੀਤਾ ਜਾ ਰਿਹਾ ਹੈ।