ਵਾਸ਼ਿੰਗਟਨ : ਅਮਰੀਕੀ ਵਿਦੇਸ਼ ਮੰਤਰਾਲੇ ਨੇ ਸਾਊਦੀ ਅਰਬ ਨੂੰ ਲਗਭਗ 24.3 ਅਰਬ ਅਮਰੀਕੀ ਡਾਲਰ ਦੀ ਅਨੁਮਾਨਿਤ ਲਾਗਤ ਨਾਲ 48 ਐੱਫ-35 ਲਾਈਟਨਿੰਗ 2 ਲੜਾਕੂ ਜਹਾਜ਼ ਅਤੇ ਉਸ ਨਾਲ ਸਬੰਧਤ ਉਪਕਰਣ ਵੇਚਣ ਦੀ ਸੰਭਾਵੀ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਪ੍ਰਸਤਾਵਿਤ ਵੇਚ ਵਿੱਚ ਸਾਧਾਰਨ ਟੇਕ-ਆਫ਼ ਅਤੇ ਲੈਂਡਿੰਗ ਦੀ ਸਮਰੱਥਾ ਵਾਲੇ 48 ਐੱਫ-35 ਜਹਾਜ਼ ਅਤੇ 49 ਪ੍ਰੈਟ ਐਂਡ ਵਿਟਨੀ F135-PW-100 ਇੰਜਣ (ਜਿਨ੍ਹਾਂ ਵਿੱਚ 48 ਸਥਾਪਿਤ ਇੰਜਣ ਅਤੇ 1 ਸਪੇਅਰ ਇੰਜਣ) ਸ਼ਾਮਲ ਹਨ।
ਇਸ ਪੈਕੇਜ ਵਿੱਚ ਸੁਰੱਖਿਅਤ ਸੰਚਾਰ, ਸਟੀਕ ਨੇਵੀਗੇਸ਼ਨ, ਕ੍ਰਿਪਟੋਗ੍ਰਾਫਿਕ ਉਪਕਰਣ, ਇਲੈਕਟ੍ਰਾਨਿਕ ਵਾਰਫੇਅਰ ਡਾਟਾਬੇਸ ਸਪੋਰਟ, ਜਹਾਜ਼ ਤੇ ਹਥਿਆਰ ਸਹਾਇਤਾ ਉਪਕਰਣ, ਸਪੇਅਰ ਪਾਰਟਸ, ਸਿਖਲਾਈ ਉਪਕਰਣ, ਸਿਮੂਲੇਟਰ, ਸਾਫ਼ਟਵੇਅਰ, ਤਕਨੀਕੀ ਦਸਤਾਵੇਜ਼ ਅਤੇ ਲੌਜਿਸਟਿਕਸ ਸਪੋਰਟ ਵੀ ਸ਼ਾਮਲ ਹਨ। ਅਮਰੀਕੀ ਵਿਦੇਸ਼ ਮੰਤਰਾਲੇ ਅਨੁਸਾਰ ਇਹ ਪ੍ਰਸਤਾਵਿਤ ਵੇਚ ਖਾੜੀ ਖੇਤਰ ਵਿੱਚ ਰਾਜਨੀਤਿਕ ਸਥਿਰਤਾ ਅਤੇ ਆਰਥਿਕ ਪ੍ਰਗਤੀ ਲਈ ਕੰਮ ਕਰਨ ਵਾਲੇ ਇੱਕ ਪ੍ਰਮੁੱਖ ਗੈਰ-ਨਾਟੋ ਸਹਿਯੋਗੀ ਦੀ ਸੁਰੱਖਿਆ ਵਿੱਚ ਸੁਧਾਰ ਕਰਕੇ ਅਮਰੀਕਾ ਦੀ ਵਿਦੇਸ਼ ਨੀਤੀ ਅਤੇ ਰਾਸ਼ਟਰੀ ਸੁਰੱਖਿਆ ਉਦੇਸ਼ਾਂ ਦਾ ਸਮਰਥਨ ਕਰੇਗੀ। ਇਸ ਨਾਲ ਸਾਊਦੀ ਅਰਬ ਦੀ ਆਪਣੀ ਰੱਖਿਆ ਨੂੰ ਮਜ਼ਬੂਤ ਕਰਨ ਅਤੇ ਅਮਰੀਕੀ ਬਲਾਂ, ਹੋਰ ਖੇਤਰੀ ਤੇ ਨਾਟੋ ਬਲਾਂ ਨਾਲ ਮਿਲ ਕੇ ਕੰਮ ਕਰਨ ਦੀ ਸਮਰੱਥਾ ਵਿੱਚ ਸੁਧਾਰ ਹੋਵੇਗਾ।
ਮੰਤਰਾਲੇ ਨੇ ਅੱਗੇ ਦੱਸਿਆ ਕਿ ਇਹ ਡੀਲ ਸਾਊਦੀ ਅਰਬ ਦੇ ਸੰਚਾਲਨ ਜਹਾਜ਼ਾਂ ਦਾ ਵਿਸਥਾਰ ਕਰੇਗੀ ਅਤੇ ਉਸ ਦੀ ਹਵਾ ਤੋਂ ਹਵਾ ਅਤੇ ਹਵਾ ਤੋਂ ਜ਼ਮੀਨ 'ਤੇ ਆਤਮ-ਰੱਖਿਆ ਦੀ ਸਮਰੱਥਾ ਨੂੰ ਵਧਾਏਗੀ। ਵਿਦੇਸ਼ ਮੰਤਰਾਲੇ ਅਨੁਸਾਰ ਇਸ ਪ੍ਰਸਤਾਵਿਤ ਵੇਚ ਨਾਲ ਖੇਤਰ ਵਿੱਚ ਫ਼ੌਜੀ ਸੰਤੁਲਨ ਵਿੱਚ ਕੋਈ ਬਦਲਾਅ ਨਹੀਂ ਆਵੇਗਾ। ਟੈਕਸਾਸ ਦੇ ਫੋਰਟ ਵਰਥ ਸਥਿਤ 'ਲਾਕਹੀਡ ਮਾਰਟਿਨ ਏਅਰੋਨਾਟਿਕਸ ਕੰਪਨੀ' ਅਤੇ ਕਨੈਕਟੀਕਟ ਦੇ ਈਸਟ ਹਾਰਟਫੋਰਡ ਸਥਿਤ 'ਪ੍ਰੈਟ ਐਂਡ ਵਿਟਨੀ ਮਿਲਟਰੀ ਇੰਜਣ' ਇਸ ਦੇ ਮੁੱਖ ਠੇਕੇਦਾਰ ਹੋਣਗੇ।ਮੰਤਰਾਲੇ ਨੇ ਕਿਹਾ ਕਿ ਉਸ ਨੂੰ ਇਸ ਸੰਭਾਵੀ ਵੇਚ ਨਾਲ ਸਬੰਧਤ ਕਿਸੇ ਆਫ਼ਸੈੱਟ ਸਮਝੌਤੇ ਦੀ ਜਾਣਕਾਰੀ ਨਹੀਂ ਹੈ ਅਤੇ ਅਜਿਹਾ ਕੋਈ ਵੀ ਸਮਝੌਤਾ ਸਾਊਦੀ ਅਰਬ ਅਤੇ ਠੇਕੇਦਾਰਾਂ ਵਿਚਕਾਰ ਗੱਲਬਾਤ ਰਾਹੀਂ ਤੈਅ ਹੋਵੇਗਾ। ਇਸ ਤੋਂ ਇਲਾਵਾ, ਇਸ ਪ੍ਰਸਤਾਵਿਤ ਵੇਚ ਨੂੰ ਲਾਗੂ ਕਰਨ ਲਈ ਸਾਊਦੀ ਅਰਬ ਵਿੱਚ ਵਾਧੂ ਅਮਰੀਕੀ ਸਰਕਾਰੀ ਜਾਂ ਠੇਕੇਦਾਰ ਪ੍ਰਤੀਨਿਧੀਆਂ ਦੀ ਨਿਯੁਕਤੀ ਦੀ ਲੋੜ ਨਹੀਂ ਹੋਵੇਗੀ।