ਜੀ. ਐੱਸ. ਟੀ. ’ਚ ਪਿਛਲੇ ਸਾਲ ਸਤੰਬਰ ’ਚ ਕੀਤੇ ਸੁਧਾਰਾਂ ਨਾਲ ਬਾਅਦ ਦੇਸ਼ ’ਚ ਵਾਹਨਾਂ ਦੀ ਵਿਕਰੀ ’ਚ ਤੇਜ਼ੀ ਦਾ ਸਿਲਸਿਲਾ ਅਗਸਤ ’ਚ ਵੀ ਜਾਰੀ ਰਿਹਾ। ਪ੍ਰਮੁੱਖ ਵਾਹਨ ਕੰਪਨੀਆਂ ਦੀ ਵਿਕਰੀ ਲਗਾਤਾਰ 12ਵੇਂ ਮਹੀਨੇ ਵਧੀ।
ਯਾਤਰੀ ਵਾਹਨਾਂ, ਦੋਪਹੀਆ ਅਤੇ ਵਪਾਰਕ ਵਾਹਨਾਂ ਨਾਲ ਇਲੈਕਟ੍ਰਿਕ ਵਾਹਨਾਂ ਦੀ ਮੰਗ ’ਚ ਵੀ ਮਜ਼ਬੂਤ ਵਾਧਾ ਦਰਜ ਹੋਇਆ। ਦੇਸ਼ ਦੀ ਸਭ ਤੋਂ ਵੱਡੀ ਯਾਤਰੀ ਵਾਹਨ ਕੰਪਨੀ ਮਾਰੂਤੀ ਸੁਜ਼ੂਕੀ ਦੀ ਘਰੇਲੂ ਵਿਕਰੀ ਅਗਸਤ ’ਚ 34.34 ਫੀਸਦੀ ਵਧ ਕੇ 1,80,078 ਇਕਾਈਆਂ ਰਹੀ। ਯਾਤਰੀ ਵਾਹਨਾਂ ਦੀ ਵਿਕਰੀ 34.81 ਫੀਸਦੀ ਵਧ ਕੇ 1,76,971 ਇਕਾਈਆਂ ਹੋ ਗਈ। ਕੁਲ ਵਿਕਰੀ 21.33 ਫੀਸਦੀ ਵਧ ਕੇ 2,19,220 ਇਕਾਈਆਂ ’ਤੇ ਪਹੁੰਚ ਗਈ।
ਟਾਟਾ ਅਤੇ ਮਹਿੰਦਰਾ ਨੇ ਵੀ ਦਿਖਾਇਆ ਦਮ
ਅਗਸਤ ’ਚ ਟਾਟਾ ਅਤੇ ਮਹਿੰਦਰਾ ਨੇ ਵੀ ਦਮ ਦਿਖਾਇਆ। ਟਾਟਾ ਮੋਟਰਜ਼ ਪੈਸੰਜਰ ਵ੍ਹੀਕਲਜ਼ ਦੀ ਵਿਕਰੀ 56 ਫੀਸਦੀ ਵਧ ਕੇ 67,753 ਇਕਾਈਆਂ ਰਹੀ। ਕੰਪਨੀ ਦੇ ਇਲੈਕਟ੍ਰਿਕ ਵਾਹਨਾਂ ਦੀ ਵਿਕਰੀ 94 ਫੀਸਦੀ ਵਧ ਕੇ 16,549 ਇਕਾਈਆਂ ਹੋ ਗਈ। ਮਹਿੰਦਰਾ ਆਟੋ ਦੀ ਯੂਟੀਲਿਟੀ ਵਾਹਨਾਂ ਦੀ ਵਿਕਰੀ 50 ਫੀਸਦੀ ਵਧ ਕੇ 59,257 ਇਕਾਈਆਂ ਰਹੀ, ਜਦੋਂਕਿ ਕੁਲ ਵਿਕਰੀ 42 ਫੀਸਦੀ ਵਧੀ।
ਹੁੰਡਈ ਮੋਟਰ ਇੰਡੀਆ ਦੀ ਕੁਲ ਵਿਕਰੀ ਅਗਸਤ ’ਚ 8.8 ਫੀਸਦੀ ਵਧ ਕੇ 65,796 ਇਕਾਈਆਂ ਰਹੀ। ਜੇ. ਐੱਸ. ਡਬਲਯੂ. ਐੱਮ. ਜੀ. ਮੋਟਰ ਇੰਡੀਆ ਦੀ ਵਿਕਰੀ 14 ਫੀਸਦੀ ਵਧ ਕੇ 7,508 ਇਕਾਈਆਂ ਰਹੀ। ਨਿਸਾਨ ਮੋਟਰ ਇੰਡੀਆ ਨੇ ਘਰੇਲੂ ਬਾਜ਼ਾਰ ’ਚ 3,426 ਅਤੇ ਵਿਦੇਸ਼ੀ ਬਾਜ਼ਾਰਾਂ ’ਚ 5,924 ਵਾਹਨ ਵੇਚੇ।
ਦੋਪਹੀਆ ਅਤੇ ਇਲੈਕਟ੍ਰਿਕ ਵਾਹਨਾਂ ਦੀ ਮੰਗ ਮਜ਼ਬੂਤ
ਹੁੰਡਈ ਦੀ ਕੁਲ ਵਿਕਰੀ 8.8 ਫੀਸਦੀ ਵਧੀ। ਟੀ. ਵੀ. ਐੱਸ. ਮੋਟਰ ਦੀ ਕੁਲ ਵਿਕਰੀ 21 ਫੀਸਦੀ ਵਧ ਕੇ 6,16,540 ਇਕਾਈਆਂ ਰਹੀ। ਇਸ ਦੇ ਇਲੈਕਟ੍ਰਿਕ ਵਾਹਨਾਂ ਦੀ ਵਿਕਰੀ 137 ਫੀਸਦੀ ਉਛਲੀ। ਬਜਾਜ ਆਟੋ ਦੀ ਕੁਲ ਦੋਪਹੀਆ ਵਿਕਰੀ 30 ਫੀਸਦੀ ਵਧੀ। ਅਸ਼ੋਕ ਲੇਲੈਂਡ ਦੀ ਕੁਲ ਵਿਕਰੀ 38 ਫੀਸਦੀ ਅਤੇ ਰਾਇਲ ਐਨਫੀਲਡ ਦੀ ਵਿਕਰੀ 11 ਫੀਸਦੀ ਵਧੀ।